1 ¹ Yaz Si-môn, Phê-rơ, ayx Njâuv Zâu Yê-su nyăngz pâuz, yaz ja jeenx phunz coouv pănh pengh stymz nyăngz Tênb-Hungh cloon Njâuv Zâu Yê-su tuz cloon pănh songc ah hungđ saix nzongf nyăngz gâyf woax đomc munh. ² Yaz jođ Tênb-Hungh sađ pôz sađ pengh oonz phunz nyâuh yâuf pez pâu đungx staox, wâyc zuc nyâuh pâyz yaz, yâuc pâyz Zâu Yê-su. Tênb-Hungh sađ đungx hungđ sâuđ nyâyc ³ Tênb-Hungh nongc nănh naih lanyf nyăngz quênh zany pănh yămz nây stâyv sangc, wâyc zeen gongx Tênb-Hungh sămv nongc nyăngz muif hungđ, nănh songđ sađ phunz nyâuh yâuf pez, năngđ nâyx wâyc zuc nyâuh pâyz nănh, six êu pănh taih songc nongc nănh nyăngz muif hungđ gwăngz-eng woax tauh. ⁴ Nănh nyunc lub saix nzongf nyăngz woac phunz pănh, phunz pănh hayh coouv nâyx đomc nyunc nyăngz woac, tuz songc Tênb-Hungh nyăngz stymz nyâuđ, yâuc hayh tyuv tuz đutb bamh canz nyăngz huđ dlayc, six bamh munh âyz stymz nyâuđ nyâyh seetb taih hayh ayx hoiđ munh nyăngz dlayc. ⁵ Wâyc năngđ nâyx, nyâuh yâuf pez songđ zuc nongc dlăngc nyâuđ ayx phunz nyâuh nyăngz seenz stymz pâyz ayx gongx nyăngz dlayc pâu đungx staox, yâuc pâyz tuz Tênb-Hungh. ⁶ Pâyz tuz Tênb-Hungh yâuc cun tuz phănc stynb, cun tuz phănc stynb yâuc zuc naih noic tanyđ, yâuc ayx gongx dlayc lêpc Tênb-Hungh. ⁷ Lêpc gongx Tênb-Hungh yâuc stăngz zeen Yê-su nyăngz yâuf pez năngx đungx staox, stăngz zeen Yê-su nyăngz yâuf pez cloon songx munh. ⁸ Six coong nyâuh naih nâyx đomc ayx gongx nyăngz dlayc pâu đungx staox, Zâu songđ phunz nyâuh naih bănh sangz, yâuc naih săngh nongc nyăngz stymz nyâuđ pâyz tuz pănh nyăngz Njâuv Zâu Yê-su. ⁹ Six laiv lanh năngđ max naih nâyx đomc ayx gongx nyăngz dlayc têx, woax lanh six mâyc blâuf mangc max tuz côz, yâuc nyâuđ cob nănh cah đangc noib ayx nyăngz stoif tuz đaox dlăngc. ¹⁰ Yâuf pez lex, wâyc năngđ nâyx nyâuh six zuc joomz nyâuđ ayx, wâyc tuz Tênb-Hungh sên taih nyăngz munh, nyâuh ayx năngđ nâyx songđ stâyv quâyx max zuc glinyf. ¹¹ Năngđ naz, Tênb-Hungh songđ phunz nyâuh yâuf pez naih gâyf nzac pănh Njâuv Zâu Yê-su clakx clunh nyăngz côkz. ¹² Max cun nyâuh pâyz tuz nyâuh coouv wăn, nyâuh stipx taih nyăngz gâyf, six yaz yâuc oix muif dlih đamv phunz nyâuh săngx tauv nâyx đomc dlayc. ¹³ Yaz nyâyh taih, yaz năngx săngh yămz nây yangh stâyv sax stoiz, yaz songđ hopđ zuc stăngc nyâuh săngx tauv nâyx đomc dlayc. ¹⁴ Yaz pâyz tuz max naih lauh yaz songđ zuc quanyf yaz nâyx nomz hayh tayc nyăngz stynb,* năngđ pănh nyăngz Njâuv Zâu Yê-su coong manyf bux yaz woa nâyx. ¹⁵ Yaz oix nongc nzuf jab lov jau wâyc phunz nyâuh yâuf pez zu tauv yaz quaix stâyv blătc nyâuh songđ muif dlih săngx tauv nâyx đomc woac. Pănh tuz phătc Tênb-Hungh nyăngz gwăngz-eng ¹⁶ Buz max zâyf nongc stanyz tongb munh lănv câu bux nyâuh pâyz tuz pănh nyăngz Njâuv Zâu Yê-su nyăngz quênh, cloon nănh năngx săngh taih woax đomc gâyf, six seenz cănh buz nyăngz mâyc tuz mangc phătc yox. ¹⁷ Nzangc pha Tênb-Hungh pâuh nănh, phunz nănh tuz gwăngz-eng woax zanyf, naih stingb yămz woa gwăngz-eng tync coong, “nâyx tauh six yaz stăngz nyăngz toonz, “yaz seenz numđ nyađ nănh. ¹⁸ Buz tuz cloon nănh yămz woa đăngb zengh nyăngz zoongz zâyc woax zanyf, buz yâuc tuz numđ nâyx đomc woac stingb coong seetb woa Tênb-toongh côkz taih. ¹⁹ Wâyc năngđ nâyx pănh songđ săngx tauv tâuc woac munh lănv taih nyăngz woac six seenz, nyâuh six zuc nongc stymz nyâuđ nyâyh tauv nâyx đomc dlayc năngx gongx, songđ wâyc năngđ ah zây toongz syux nzac nzămc nyăngz tync ninyh, yâuc năngđ tauv gungh gwăngz plongx yangh syux nzac nyâuh yâuf pez nyăngz stymz nyâuđ ninyh. ²⁰ Nyâuh yâuf zuc pâyz, max naih mănv cănh hayh nongc stymz nyâuđ nyâyh pob manyf tâuc woac munh ja ănz Canyx-stâub nyăngz woac. ²¹ Wâyc zuc max naih mănv cănh hayh âyz nănh nyăngz nyâuđ lănv Tênb-Hungh nyăngz woac, munh lănv Tênb-Hungh nyăngz woac, six cungb âyz singx- lingh yeenv nănh stiz coong. Za stênx stengb