7 ¹ Stăngz nyăngz yâuf pez toic lex! pănh tuz numđ Zâu nâyx đomc nyunc woac, six zuc ayx đăngb zengh nyăngz munh lif pănh nyăngz stynb năngx dlăngc, năngx gâyf bây pănh nyăngz mengc hoonh naih wâyx, six zuc cumh nzav Tênb-Hungh. Phao-lô numđ nyađ Cô-lin-tô munh coi nyâuđ ² Nyâuh yâuf pez six zuc ayx nyâuđ năngx quăng stipx buz, buz max ayx peo hoiđ laiv lanh, yâuc max hox laiv lanh ayx huđ dlayc, buz max ayx munz laiv lanh nyăngz seenz stymz. ³ Yaz coong năngđ nâyx six max zâyf oix tingc nyâuh ayx longđ, yaz songđ coong quaix yaz seenz stăngz nyâuh yâuf pez, max cun săngh mah six tayc, buz nyunc tayc wâyc nyâuh yâuf pez ayx ah đuiz lauf tuz. ⁴ Yaz seenz pungx stymz zeen tingc nyâuh yâuf pez, nzof yaz yâuc numđ nyađ tuz nyâuh yâuf pez oonz yaz nyăngz nyâuđ đungx nzongf, max cun pongh zuc laiv hungđ dlauc wâyb, buz yâuc nzuf jab numđ nyađ. ⁵ Buz ninyh tauv Ma-si-đoan, max tuz pungx stymz yâuc zuc iz pôz nganc munh hukb buz, cungh ngwoaic yâuc cloon munh tinyh nzengz, cah njaf lauf numđ cumh nzav. ⁶ Tênb-Hungh six stăngc numđ stauh nyăngz munh zay stauh, phunz Titv, taih lov buz, songđ oonz buz nyăngz nyâuđ. ⁷ Titv, nănh yâuc max zâyf cungb taih cungv, nănh taih lănv bux yaz coong nyâuh yâuf pez năngđ laix nâyx oonz nănh nyăngz nyâuđ, nănh lănv coong nyâuh yâuf pez seenz mungc oix tuz phătc yaz, nănh stiz yâuf pez seenz numđ nhleenx nănh stiz ayx nyăngz dlayc. Nănh yâuc phunz yaz pâyz coong nyâuh yâuf pez numđ stauh phunz yaz, yaz songđ năngx numđ nyađ têx. ⁸ Max cun lôx noib yaz ja woax zây jeenx ayx phunz nyâuh yâuf pez numđ stauh, six yaz lauf max yônx nâyx đomc dlayc, songđ wâyc yaz ayx phunz nyâuh numđ stauh ah dlapc lêc đêh. ⁹ Six nâyx zanyf yaz numđ nyađ, max zâyf wâyc yaz ayx phunz nyâuh yâuf pez numđ stauh, six wâyc nâyx đomc stauh nyăngz jau ayx phunz nyâuh yâuf pez coi nyâuđ, nyâuh âyz Tênb-Hungh nyăngz âyx stauh. buz max zâyf hoiđ nyâuh yâuf pez laiv lanh munz stymz. ¹⁰ Wâyc zuc munh âyz Tênb-Hungh nyăngz âyx stauh, nâyx hungđ stauh six phunz munh coi nyâuđ bix tuz Njâuv, năngđ ha munh songđ max numđ nhleenx, six coong âyz bamh munh nyăngz âyx stauh têx, six phunz munh zuc tayc. ¹¹ Nyâyh mangc jađ! Tênb-Hungh âyz nănh nyăngz zux ix năngđ laix nâyx nongc nyâuh yâuf pez nyăngz stauh stymz, stăngc nyâuh yâuf pez zay stauh? nâyx đomc dlayc phunz nyâuh yâuf pez joomz nyâuđ, nâyx đomc dlayc ayx phunz nyâuh yâuf pez numđ nhleenx, numđ stauh, yâuc numđ cumh nzav, nâyx đomc ayx dlayc phunz nyâuh yâuf pez oix pongh yaz, yâuc tingc ayx longđ munh nyăngz Stoif, tăng woax đomc dlayc phunz nyâuh yâuf pez max ayx longđ dlayc. ¹² Yaz ja woax zây jeenx, six max zâyf wâyc ayx longđ nyăngz munh mah six wâyc dlauc huđ nyăngz munh bix ja, yaz ja nyăngz âyx six oix phunz nyâuh yâuf pez saz tuz nyâuh cloon buz six yămz Zâu Tênb-Hungh nyăngz cah đangc. ¹³ Nâyx đomc yeetx stong dlayc songđ oonz tuz buz nyăngz nyâuđ, max zâyf cungb oonz tuz buz nyăngz nyâuđ cungv, nyâuh năngx phunz Titv, tuz oonz loc, buz songđ tuz oonz loc. ¹⁴ Yaz tanv nyâuh yâuf pez phunz Titv, mungv, nyâuh yâuf pez songđ lănv yaz coong nyăngz woac six seenz nyăngz, nyâuh yâuf pez lănv yaz zanyb Titv nyăngz muif hungđ six seenz nyăngz. ¹⁵ Titv, stăngz nyâuh yâuf pez nyăngz jau cun ayx cun đungx staox, Titv, songđ săngx tauv nyâuh yâuf pez mungv nănh nyăngz woac, nyâuh yâuf pez stipx nănh, nănh seenz numđ cumh nzav tuz stynb synx nzuf. ¹⁶ Yaz seenz numđ nyađ nzongf, wâyc zuc yaz songđ pungx stymz zeen nyâuh yâuf pez tauv tauh. Lêpc Zâu munh songc stymz căpx nyanh