3 ¹ Nây nyâuh yâuf pez zâyf numđ buz nzeetx blangc cănh zanyb buz max? nyâuh phătc buz năngđ pitc đomc munh sămv zuc nyâuh yâuf pez nyăngz jeenx phunz buz nzâyz ninyh lănv bux munh pâyz buz max? ² Six nyâuh cănh ayx buz nyăngz jeenx, ja ănz buz nyăngz nyâuđ, phunz songx munh pâyz. ³ Nyâuh yâuf pez goib yangh lănv coong nyâuh six Njâuv Zâu nyăngz jeenx jaoz phunz buz nzâyz ninyh, six max zâyf nongc makc ja ănz woa njauz payh. Six Săngh mengc nyăngz Zâu Tênb-Hungh nongc Singx lingh ja ănz munh nyăngz nyâuđ njaf. ⁴ Wâyc zuc năngđ nâyx, buz songđ nzađ coong, “Buz zeen Njâuv Zâu songđ pâyz tuz Tênb-Hungh six zeen tuz wăn nyăngz Zâu. ⁵ Buz max nzađ coong buz cănh hayh ayx tuz seetb laiv hungđ dlayc, six Tênb-Hungh stăngc buz ayx tuz muif hungđ dlayc. ⁶ Zâu phunz buz naih (caz năngh) bokc dlic nănh nyăngz săngb nyunc woac, max zâyf nongc pătx ja, six nongc singx lingh ja taih, nongc đăngc ja taih nyăngz Đoouc-lif gâyf six phunz munh zuc tayc, six nongc Singx lingh ja taih six phunz munh tuz naih mengc Săngh. ⁷ Phunz munh zuc tayc nyăngz Đoouc-lif gâyf nongc đăngc ja ănz njauz payh, Tênb-Hungh nyăngz gwăngz-eng syux phunz Mô-sê nyăngz mynb gwăngz-eng ayx phunz Y-sa-la-ên munh mangc nănh nyăngz mynb max tuz, six blătc woa woax hungđ gwăngz-eng hayh jac. ⁸ Ha max zâyf Singx lingh ayx nyăngz cumh pâuz năngx gwăngz-eng têx mah? ⁹ Six coong ayx phunz munh zuc tayc woax tyuh jau năngx tuz naih gwăngz-eng têx, naih dlih Tênb-Hungh Njâuv munh woax stynz jau zâyf năngx tuz gwăngz-eng têx tymb. ¹⁰ Lôx noib nyăngz gwăngz-eng nâyx zanyf jac platb max gwăngz nzof gôh, wâyc zuc nâyx zanyf săngb nyăngz gwăngz-eng syux zâyf năngx gwăngz têx tymb. ¹¹ Six coong cungb yămz ah dlapc nyăngz gwăngz-eng bix năngx tuz yămz têx, Stâyv quâyx yămz nyăngz gwăngz-eng năngx naih phănc têx tymb. ¹² Wâyc năngđ nâyx buz nzongđ pungx stymz lănv naih tync mungc nyăngz gâyf. ¹³ Buz max năngđ Mô-sê, năngx zuc nongc buyx pongz mynb, wâyc max oix phunz Y-sa-la-ên munh phătc nănh hayh jac nyăngz gwăngz-eng. ¹⁴ Six nănh stiz nyăngz nyâuđ nhlengc nzongf, tauv nâyx zanyf, nănh stiz toc lôx nhlengc stâub, nănh stiz nyăngz nyâuđ songđ năngđ naih ah lepz buyx pongz đipc mungh, cungb zeen Njâuv Zâu nzăngđ tuz zoz woax lepz buyx seetb gâyh nănh stiz. ¹⁵ Tauv nâyx zanyf, nănh stiz laiv zanyf toc Mô-sê nyăngz Đoouc-lif gâyf stâub, songđ năngx naih woax lepz buyx tăng nănh stiz. ¹⁶ Six nănh stiz laiv lanh coi nyâuđ taih lêpc Zâu Yê-su, nzăngđ tuz woax lepz buyx gâyh nănh stiz. ¹⁷ Zâu six Singx lingh, Zâu nyăngz Singx lingh yămz laiv, yămz woa tix munh songđ tuz pungx goib. ¹⁸ Pănh max zuc tăng mynb, pănh yâuc tuz phătc Zâu nyăngz gwăngz-eng, nzof pănh yâuc năngx tuz pyênv wav cayx năngđ Nănh. Nâyx hungđ pyênv wav cun ayx cun gwăngz-eng, wâyc zuc nâyx hungđ gwăngz-eng six tăng Zâu nyăngz Singx lingh taih. Huv saix zaub ănz nib enz njaf