13 ¹ Nây six yaz oix ninyh tayđ nyâuh yâuf pez tah stamz hâyđ, hănđ six laiv hungđ dlayc yâuc zuc nongc iz pôz lanh ayx zanyx manyf munh. ² Yaz ninyh tayđ nyâuh yâuf pez tah nyâyc woax hâyđ, Yaz tôn woax đomc pamf Stoif nyăngz munh. Nâyx zanyf yaz hănđ max naih mynb cloon nyâuh yâuf pez yămz, six yaz năngx tôn nănh stiz cloon pitc đomc munh ah hâyđ tymb, six coong yaz năngđ năngx ninyh nyâuh woa yaz songđ max nyangc nănh stiz nzof gôh. ³ Nyâuh yâuf pez oix phătc Njâuv Zâu Nănh nongc yaz lănv Nănh nyăngz woac. Njâuv Zâu bênc nyâuh nyăngz dlayc Nănh max numđ đoonh, six Nănh seenz yongb nzongf. ⁴ Max cun Njâuv Zâu Nănh zuc tingz yămz đăngc zax tayc Nănh seenz đoonh nzongf, six Tênb-Hungh nyăngz quênh phunz Nănh săngh phunb stengb taih. Nzof yaz lauf năngđ Nănh đoonh nâyx, Six wâyc Zâu Tênb-Hungh nyăngz jab buz yâuc tuz cloon Njâuv Zâu songc mengc săngh. ⁵ Nyâuh yâuf pez six zuc zah mangc jađ! Nyâuh yâuf pez naih seenz stymz max naih? Nyâuh yâuf pez max pâyz tuz Njâuv Zâu Yê-su săngh yămz nyâuh yâuf pez cah njaf, six coong nyâuh max coouv tuz wăn têx nyâuh lauf pâyz. ⁶ Yaz zeen coong nyâuh yâuf pez pâyz tuz yaz coouv tuz wăn max stâyb. ⁷ Yaz jođ Zâu Tênb-Hungh max oix phunz nyâuh yâuf pez ayx laiv hungđ huđ dlayc. Nây max zâyf wâyc phunz yaz coouv tuz gongx, six wâyc phunz nyâuh ayx gongx nyăngz jau. ⁸ Yaz max hayh ayx laiv hungđ zengv cloon seenz gâyf, six cungb canyx bongc seenz gâyf cungv. ⁹ Buz laiv zanyf đoonh nyâuh yâuf pez yongb, buz numđ nyađ, yaz jođ Zâu phunz nyâuh yâuf pez săngh munh njoongh. ¹⁰ Wâyc nâyx yaz max cloon nyâuh yâuf pez yămz nyăngz săngx huđ, yaz songđ ja nâyx zây jeenx. Tu yaz ninyh tauv nyâuh yâuf pez woa yaz songđ max zâuđ nongc Zâu phunz yaz nyăngz quênh bênc nyâuh nyăngz dlayc. Zâu phunz yaz nyăngz quênh six nongc zâyv nyâuh, max zâyf tou nyâuh. Môtc jêtz woac ¹¹ Nâyx zanyf yaz jođ đaic phunz biêtc nyâuh tinyh đoih yâuf pez. six zuc ayx pênx Clakx-clunh nyăngz munh. Yâuc zuc ayx âyz yaz bux nyăngz woac. Seenz zuc hopđ stymz dlongh âyx pengh oonz yămz. Tênb-Hungh stăngz nyăngz pengh stymz songđ cloon nyâuh yâuf pez yămz. ¹² Nyâuh six zuc nongc đăngb zengh nyăngz jau tinyh tomz. ¹³ Zâu Tênb-Hungh nyăngz songx munh đaic nyâuh yâuf pez. ¹⁴ Jođ Njâuv Zâu Yê-su Sađ Pôz phunz nyâuh songx munh. phunz nyâuh pâyz tuz Tênb-Hungh stăngz nyâuh. jođ Singx lingh cloon nyâuh yâuf pez yămz, yâufclănv woac tinyh tongb.