1 ¹ Yaz Phao-lô, âyz Zâu Tênb-Hungh nyăngz âyx ayx Njâuv Zâu Yê-su nyăngz cumh pâuz munh. Yaz cloon pănh nyăngz yâuf Ti-mô-thê, ja jeenx zuyz phunz yămz Cô-lin-tô stengv, Zâu Tênb-Hungh nyăngz Huyđ đăngb Sây yămz nzêux Miênh-nam Hi-lapc. ² Jođ Nzangc Pha Zâu Tênb-Hungh cloon Njâuv Zâu Yê-su, Sađ pôz sađ pengh oonz phunz nyâuh yâuf pez ô stayx tinyh đoih. Phao-lô tanv Tênb-Hungh ³ Pănh hopđ zuc tanv pănh nyăngz Njâuv Zâu Yê-su nyăngz Nzangc Pha Zâu Tênb-Hungh pong nyâuđ hâuđ lênh munh yâuc oonz munh nyăngz nyâuđ woax tauh. ⁴ Buz pongh zuc muif hungđ dlauc wâyb, Nănh yâuc oonz buz nyăngz nyâuđ, phunz buz năngx hayh oonz nyâuđ phunz pongh zuc dlauc wâyb woax đomc munh năngđ buz nâyx. ⁵ Buz ayx laix cloon Njâuv Zâu naih phănc tanyđ zâuđ nanc, buz yâuc năngđ woa nâyx songđ tuz nănh oonz nyâuđ. ⁶ Six coong buz zuc dlauc huđ, six wâyc phunz nyâuh yâuf pez tuz oonz nyâuđ yâuc tuz Njâuv. Năngđ coong buz tuz oonz nyâuđ, six wâyc phunz nyâuh yâuf pez hayh naih stymz tanyđ tuz zâuđ nanc. Năngđ buz tanyđ tuz zâuđ nanc nâyx. ⁷ Buz muif dlih wâyc nyâuh naih njih mungc tync, wâyc zuc yaz pâyz tuz nyâuh cloon buz naih phănc tanyđ zâuđ, nyâuh yâuc tuz oonz nyâuđ năngđ buz nâyx. ⁸ Yâuf pez lex! Buz oix nongc nyâuh pâyz tuz buz yămz Miênh tiêuz-av, pongh zuc zâuđ nanc, năngđ niđ nzongf nyăngz laiv hungđ đăpx buz nyăngz stynb, songđ max laic năngx tuz mengc săngh nzof gôh. ⁹ Buz yămz nyâuđ nyâyh năngđ zuc tayx tayc nâyx, six nâyx đomc dlayc seetb taih, buz songđ max hayh mungc buz năngx tuz săngh, six buz zeen coouv Tênb-Hungh, hayh phunz munh tayc năngx săngh phunb stengb taih woax tauh. ¹⁰ Tênb-Hungh songđ Njâuv buz gâyh đutb zuc tayc nyăngz jau, six yaz zeen coong Nănh lauf năngx Njâuv buz tymb. ¹¹ Wâyc zuc nyâuh yâuf pez stăngc buz đoouc coouv Zâu, năngđ naz songđ naih munh đungx hâuđ Zâu, wâyc zuc Tênb-Hungh tauz munh đungx coouv Zâu nyăngz woac, Zâu songđ sađ Pôz phunz buz. Phao-lô wănc stymz max ninyh Cô-lin-tô ¹² Nây six buz nzeetx blangc, buz pungx stymz lănv Zâu cuđ jeenx buz yâuc max numđ nyayz, Six yaz yămz nây bamh canz ayx nyăngz muif hungđ dlayc, tah yeetx six cloon nyâuh yâuf pez, six Tênb-Hungh phunz buz ayx nyâuđ zanyx, buz max zâyf coouv bamh munh nyăngz Tongb manyh, six buz coouv Tênb-Hungh nyăngz Pôz. ¹³ Buz cungb ja laiv hungđ phunz nyâuh yâuf pez toc yâuc hayh pâyz woax đomc woac, ¹⁴ Buz mungc nyâuh yâuf pez pâyz tuz buz nyăngz nyâuđ ah tix, six yaz nyâyh taih nyâuh six ah manc pâyz tuz yaz, tauv Zâu năngx taih woax zanyf, nyâuh oix tanv buz, năngđ buz oix tanv nyâuh yâuf pez woa nây. ¹⁵ Wâyc zuc yaz nyăngz nyâuđ stunx tingc six năngđ nâyx, Yaz oix ninyh tayđ nyâuh yâuf pez ah dlapc, wâyc phunz nyâuh yâuf pez tuz stipx pôz stungb dlaih. ¹⁶ Yaz cayx ninyh tayđ nyâuh yâuf pez clăngv quaix Ma-si-đoan ninyh, tauv yaz phunb đangz nyăngz săngx huđ, Yaz cunc nyâuh yâuf pez stăngc yaz seetb jau ninyh Yu-đê Stengv. ¹⁷ Yaz ta nâyx hungđ zux ix, nyâuh yâuf pez phătc năngđ yaz nyâuđ max tingc mah? nyâuh yâuf pez nyâyh coong, “Yaz ta bamh canz nyăngz zux ix coong nây coong woa mah? ¹⁸ Yaz nuz jic tuz zeen nyăngz Tênb-Hungh bux nyâuh yâuf pez, nyâuh yâuf pez zeen coong yaz lănv nyăngz woac six seenz. ¹⁹ Wâyc zuc yaz cloon Si-la, cloon Ti-mô-thê, lănv Tênb-Hungh nyăngz toonz Njâuv Zâu nyăngz Gâyf phunz nyâuh yâuf pez mungv, max zâyf coong zâyf mah six max zâyf, nănh six seenz zâyf. ²⁰ Songđ wâyc Tênb-Hungh nyunc nyăngz muif zâux woac six seenz zâyf, buz songđ mungc Njâuv Zâu coong (A-men), six tanv phunz pănh nyăngz Njâuv Zâu tuz gwăngz-eng. ²¹ Tênb-Hungh cănh phunz buz cloon nyâuh pâyz tingc, pănh cloon Njâuv Zâu songc mengc săngh. Pănh tuz Njâuv Zâu sên pănh taih nongc ayx Nănh nyăngz pec stingx. ²² Nănh Sađ Singx lingh phunz yămz pănh nyăngz nyâuđ năngđ tăpb yeenx, nongc ayx nyanh tingc, nănh baoz đamz phunz pănh đangz phanx nyăngz dlayc. ²³ Yaz êu Tênb-Hungh stăngc yaz ayx zanyx manyf, wâyc zuc Nănh pâyz tuz yaz nyăngz nyâuđ, Yaz max phunb đangz muf tuz tauv Cô-lin-tô six wâyc nyangc phunz nyâuh yâuf pez max numđ stauh. ²⁴ Yaz max zâyf cun nyâuh yâuf pez nyăngz seenz stymz, six nyâuh yâuf pez nyăngz seenz stymz zeen tingc nzof gôh, Buz stăngc nyâuh yâuf pez ayx cumh pâuz phunz nyâuh numđ nyađ.