¹ Yaz Phao-lô, âyz Zâu Tênb Hungh nyăngz âyx ayx Njâuv Zâu Yê-su nyăngz cumh pâuz Munh. Yaz cloon yaz nyăngz yâuf Ti-mô-thê, ja jeenx zuyz phunz yămz Cô-lin-tô Stengv, Zâu Tênb-Hungh nyăngz Huyđ toongh Sây yămz comx Miênh-Nam Hi-lapc A-zai. ² Jođ Nzangc Pha Zâu Tênb-Hungh cloon Njâuv Zâu Yê-su, Sađ pôz Sađ pengh oonz phunz nyâuh yâuf-pez ô stayx tinyh đoih. ³ Pănh hopđ zuc tanv pănh nyăngz Njâuv Zâu Yê-su nyăngz Nzangc Pha Zâu Tênb-Hungh pong nyâuđ hâuđ lênh Munh yâuc oonz Munh nyăngz nyâuđ woax tauh. ⁴ Pănh naih muif hungđ zâuđ nanc, Nănh oonz pănh nyăngz nyâuđ, phunz pănh năngx hayh oonz nyâuđ phunz pongh zuc muif hungđ zâuđ nanc woax đomc Munh nyăngz nyâuđ. ⁵ Pănh năngđ laix cloon Njâuv Zâu naih phănc tanyđ zâuđ nanc, pănh yâuc năngđ woa nâyx nyunc tuz nănh oonz nyâuđ. ⁶ Six coong yaz zuc dlauc huđ, six wâyc phunz nyâuh yâuf-pez tuz oonz nyâuđ yâuc tuz Njâuv. Six coong yaz tuz oonz nyâuđ, six wâyc phunz nyâuh yâuf-pez hayh naih noic tanyđ tuz zâuđ nanc. Năngđ yaz tanyđ tuz zâuđ nanc nâyx. ⁷ Yaz muif dlih wâyc nyâuh naih njih mungc tync, wâyc zuc yaz pâyz tuz nyâuh cloon yaz naih phănc tanyđ zâuđ, nyâuh yâuc tuz oonz nyâuđ năngđ yaz nâyx. ⁸ Songx yâuf-pez lex! Yaz oix nongc nyâuh pâyz tuz yaz yămz Miênh thiêuz-av, pongh zuc nyăngz zâuđ nanc, năngđ nic nzongf nyăngz tax’ hungđ nâyx đăpx Yaz nyăngz stynb, songđ max laic năngx tuz Mengc săngh nzof gôh. ⁹ Yaz yămz nyâuđ nyâyh năngđ zuc tingc tayx tayc, six nâyx đomc dlayc seetb taih, Yaz songđ max hayh mungc yaz năngx tuz săngh, six yaz zeen coouv Tênb-Hungh, hayh phunz Munh tayc năngx săngh phunb stengb taih woax tauh. ¹⁰ Tênb-Hungh songđ Njâuv Yaz gâyh đutb zuc tayc nyăngz jau, six yaz zeen Coong nănh lauf năngx Njâuv pănh tymb. ¹¹ Wâyc zuc nyâuh yâuf-pez stăngc yaz clo-Zâu, năngđ naz songđ naih Munh đungx hâuđ Zâu, wâyc zuc Tênb-Hungh tauz Munh đungx clo Zâu nyăngz woac, Zâu songđ sađ Pôz phunz Yaz. ¹² Nây six yaz nzeetx blangc, Yaz pungx stymz lănv yaz yâuc max numđ nyayz, Six yaz yămz nây bamh canz ayx nyăngz muif hungđ dlayc, tah yeetx six cloon nyâuh yâuf-pez, six Tênb-Hungh phunz yaz ayx nyâuđ zanyx, Yaz max zâyf coouv bamh Munh nyăngz Tongb-manyh, six yaz coouv Tênb-Hungh nyăngz Pôz. ¹³ Yaz cungb ja laiv hungđ phunz nyâuh yâuf-pez toc yâuc hayh pâyz woax đomc, ¹⁴ Yaz mungc nyâuh yâuf-pez pâyz tuz yaz nyăngz nyâuđ ah tix, six yaz nyâyh taih nyâuh ah Manc pâyz tuz yaz, tauv Zâu năngx taih woax zanyf, nyâuh oix tanv Yaz, năngđ yaz oix tanv nyâuh yâuf-pez woa nây. ¹⁵ Wâyc zuc yaz nyăngz nyâuđ stunx tingc six năngđ nâyx, Yaz oix ninyh tayđ nyâuh yâuf-pez ah dlapc, wâyc phunz nyâuh yâuf-pez tuz stipx pôz stungđ dlaih. ¹⁶ Yaz đinyf ninyh tayđ nyâuh yâuf-pez clăngv quaix Ma-si-đoan ninyh, tauv yaz phunb đangz nyăngz săngx huđ, Yaz cunc nyâuh yâuf-pez stăngc yaz seetb jau ninyh Yu-đê Stengv. ¹⁷ Yaz ta nâyx hungđ zux ix, nyâuh yâuf-pez phătc năngđ yaz nyâuđ max tingc mah? nyâuh yâuf-pez nyâyh coong, “Yaz ta bamh canz nyăngz zux ix coong nây coong woa? ¹⁸ Yaz nuz jic tuz zeen nyăngz Tênb-Hungh bux nyâuh yâuf-pez, nyâuh yâuf-pez zeen coong yaz lănv nyăngz woac six năngđ seenz. ¹⁹ Wâyc zuc yaz cloon Si-la, cloon Ti-mô-thê, Nzônh Tênb-Hungh nyăngz toonz Njâuv Zâu nyăngz Gâyf phunz nyâuh yâuf-pez mungv, max zâyf coong zâyf mah max zâyf, nănh six seenz zâyf. ²⁰ Wâyc zuc Tênb-Hungh nyunc phunz nyăngz muif zâux woac six zâyf, wâyc zuc Njâuv Zâu coong (A-men), six phunz pănh nyăngz Njâuv Zâu Nănh tuz Gwăngz eng. ²¹ Tênb-Hungh cănh phunz buz cloon nyâuh pâyz tingc, pănh cloon Njâuv Zâu songc mengc săngh. Pănh tuz Njâuv Zâu sên pănh nongc ayx Nănh nyăngz pec stingx. ²² Nănh Sađ Singx-lingh phunz yămz pănh nyăngz nyâuđ năngđ tăpb yeenx, nongc ayx nyanh tingc, phunz Nănh nongc ayx nyunc nyăngz woac. ²³ Yaz êu Tênb-Hungh stăngc yaz ayx zanyx manyf, wâyc zuc Nănh pâyz tuz Yaz nyăngz nyâuđ, Yaz max phunz đangz muf tuz tauv Cô-lin-tô six wâyc nyangc phunz nyâuh yâuf-pez max zuc stauh. ²⁴ Yaz max zâyf cun nyâuh yâuf-pez nyăngz seenz stymz, nyâuh yâuf-pez nyăngz seenz stymz zeen tingc nzof gôh, Buz stăngc nyâuh yâuf-pez ayx cumh pâuz phunz nyâuh yâuf-pez numđ nyađ.