1 ¹ Phao-lô ayx Njâuv Zâu Yê-su nyăngz pâuz, âyz Zâu Tênb-Hungh nyăngz lanyf, phunz pănh naih tync mungc woax tauh Njâuv Zâu Yê-su. ² Ja jeenx zuyz phunz Ti-mô-thê, Yaz nyăngz seenz toonz naih seenz stymz woax tauh. Jođ pănh nyăngz Nzangc Pha Zâu Tênb-Hungh, cloon Njâuv Zâu Yê-su, hâuđ lênh Sađ pôz sađ pengh oonz phunz mâyh. Bux Ti-mô-thê jâuz stymz buôngh za gâyf ³ Yaz cayx quaix Ma-si-đoan ninyh woax zanyf, Yaz cayx coouv sây yămz Ê-Phê-sô, ah dlapc batz lauh. Yămz woa naih ah đomc munh lănv za gâyf, yaz yâuc oix zăpx mâyh nzez max phunz woax đomc munh nzaox za gâyf. ⁴ Six zuc bux nănh stiz quanyf lănv cah lof lôx noib stongz zez tâuh nyăngz câu lănv đămh motc quaix ninyh quaix lauf max hayh zomc, nâyx đomc dlayc cungb ayx coonz phunz Munh tinyh nzengz, max hayh stăngc munh naih seenz stymz zeen tuz gongx Zâu Tênb-Hungh nyăngz gâyf. ⁵ Nâyx đomc zăpx nzaox nyăngz woac, six phunz munh naih stymz, naih nyâuđ lanh stăngz lanh, tăng stymz nyâuđ đunh đăngb zengh seetb taih, yâuc naih seenz gâyf nyăngz seenz stymz. ⁶ Six naih ah đomc munh quanyf nâyx đomc jau ninyh pyeenb, cungb nzengz max săngh nongc nyăngz dlayc. ⁷ Nănh stiz oix ayx nzaox gâyf Stênx-stengb, six nănh stiz max pâyz tuz nănh stiz nzaox nyăngz jau. ⁸ Pănh năngđ hayh nongc, Pănh songđ pâyz tuz Đoouc-lif gâyf seenz gongx nzongf. ⁹ Đoouc-lif Gâyf, max zâyf njăpc taih wâyc phunz munh gongx, six njăpc taih wâyc phunz nyâuđ huđ cloon max mungv Tênb-Hungh nyăngz gâyf yâuc pamf stoif max đăngb zengh nyăngz munh, cloon tayx nzif pha, yâuc tayx munh, yâuc phătc munh stanc nyăngz munh. ¹⁰ Tinyh phanv ayx max njif dlaif ayx pongz lauh nyăngz munh, munh toonz cănh cloon tih stanv. nimc munh maic, puv maoh, Cloon nzengz nzaox Tênb-Hungh nyăngz seenz gâyf woax đomc munh. ¹¹ Nzaox nâyx đomc seenz gâyf six hopđ zuc tanv Zâu Tênb-Hungh jaoz phunz pănh lănv nănh gwăngz-eng nyăngz cuđ jeenx. Phao-lô clo ănz Tênb-Hungh ¹² Yaz hâuđ pănh nyăngz Njâuv Zâu Yê-su, six sađ jab phunz pănh woax tauh. Wâyc zuc nănh naih stymz phunz pănh ayx nâyx hungđ cumh pâuz. ¹³ Dlênh noib yaz coong peo yâuc pib Njâuv Zâu. ayx caux muif hungđ peo munz nănh nyăngz stymz nyâuđ, Six Tênb-Hungh pong nyâuđ hâuđ lênh yaz. Woax zanyf yaz max zengx zeen Zâu yaz ayx caux muif hungđ oongx nyăngz dlayc peo nănh. ¹⁴ Six pănh nyăngz Njâuv Zâu Yê-su sađ pôz đungx nzongf phunz pănh. Coouv nănh naih seenz stymz cloon stăngz munh nyăngz nyâuđ. ¹⁵ Njâuv Zâu nzac bamh canz wâyc Njâuv Stoif-munh. Yaz coong nâyx đomc woac six seenz nyăngz, nyâuh six zuc stipx zoz. Yaz nyăngz stoif năngx niđ quaix muif lanh munh nyăngz Stoif. ¹⁶ Six nănh hâuđ lênh ayx stoif nyăngz pyây, nzăngđ phunz Njâuv Zâu Yê-su naih stymz stăngz pănh max hayh zomc, phunz yaz ayx ah hungđ woac pây, phunz laiv lanh zeen six tuz stâyv quâyx nyăngz Mengc. ¹⁷ Six zuc canyx bongc stâyv quâyx yămz nyăngz Hungh stix, mangc max hayh phătc nyăngz Zâu Tênb-Hungh. Six zuc tanv nănh tauv banc stâyv banc đaic A-Men. ¹⁸ Yaz nyăngz toonz, Ti-mô-thê lex! nâyx zanyf yaz êu mâyh ayx nyăngz dlayc âyz đangc hâyđ tâuc woac munh taih tauv mâyh woa nyăngz woac nongc seenz stymz ayx bopc gongx nyăngz zax woax hungđ tungh zangc. ¹⁹ Six zuc muif dlih lif nyâuh zeen nyăngz jau. Naih ah phanx munh quanyf nâyx đomc nzaox seenz stymz zeen gongx nyăngz jau, songđ bây nănh stiz nyăngz seenz stymz tuih huđ nzuf. ²⁰ Woax hungđ munh six naih iz lanh, Hi-mê-nê, Cloon A-lakv-san-đơ, Yaz jaoz stiz phunz Sax-tanx phađ, max bây nănh stiz coong peo Zâu. Ayx gâyf paix nyăngz jau