1 ¹ Yaz Phê-rơ, ayx Njâuv Zâu Yê-su nyăngz cumh pâuz munh, ja jeenx phunz Tênb-Hungh sên taih nyăngz munh, pongh zuc pyaux yămz đanv lunc pong stengv, Ga-la-ti, Capv-pa-đôkv, Ê-sê, Bi-thi-ni, stenngv, tuz Zâu sên taih nyăngz munh. ² Nzangc Pha Tênb-Hungh âyz Nănh nyăngz zux ix sên pănh yâuf pez taih đangc, Nănh nyăngz singx-lingh phunz pănh yâuf pez canyx bongc Nănh, coouv Njâuv Zâu Yê-su nyăngz samđ đaox phunz nyâuh yâuf pez tuz dlăngc nzuf. tuz pengh oonz nyăngz pôz cloon pănh yâuf pez yămz đungx staox. Zeen Yê-su nyăngz munh naih njih mungc tync ³ Pănh six zuc tanv pănh nyăngz Njâuv Zâu Yê-su nzangc pha Tênb-Hungh, njâuv Zâu Yê-su tayc, Tênb-Hungh năngx phunz Nănh săngh phunb stengb taih, phunz pănh coouv Nănh năngx tuz stengb tah nyâyc hâyđ, pănh songđ naih stâyv quâyx nyăngz njih mungc tync. ⁴ Năngđ naz pănh songđ hayh tuz sâub max hayh dlêtc, max hayh huđ, max hayh jac nyăngz phănc, six seenz zâyf Tênb-Hungh bênc ănz woa Tênb toongh wâyc phunz zeen Nănh woax đomc munh nyăngz phănc. ⁵ Tênb-Hungh nyăngz lanyf pêuz phunz nyâuh yâuf pez ô stayx nyăngz seenz stymz, Nănh bênc săngh Njâuv pôz phunz nyâuh zu tauv môtc zapz zomc woax noib. ⁶ Wâyc nâyx pănh yâuf pez six zuc numđ nyađ, max cun nâyx zanyf pongh zuc stâyv nyâuđ nyăngz zâuđ nanc ah dlapc max lauh. ⁷ Nâyx đomc dlayc seetb taih nongc stâyv pănh yâuf pez zeen nyăngz seenz stymz, seenz stymz six năngx saix têx sămz, max cun sămz hayh dlêtc, six lauf zuc nongc tâuf pu stynx stâyv mangc, năngđ naz lauf zuc stâyv mangc pănh zeen nyăngz jau, zu tauv Njâuv Zâu Yê-su năngx taih woax zanyf, Nănh songđ pâuh phunz pănh yâuf pez tuz gwăngz-eng. ⁸ Max cun pănh yâuf pez max zengx tuz phătc Nănh quaix, six pănh lauf stăngz Nănh, hănđ max zengx tuz pongh Nănh, pănh yâuc zeen Nănh, songđ seenz numđ nyađ tuz max naih woac coong, ⁹ “Wâyc nâyx pănh yâuf pez nyăngz mengc hoonh tuz Njâuv, six wâyc pănh nyăngz seenz stymz. ¹⁰ Tâuc woac munh, coong tauv Tênb-Hungh oix sađ phunz pănh yâuf pez nyăngz pôz. Nănh stiz zah mangc tuz gongx nzof nzăngđ stungx ninyh lov nyâuh. ¹¹ Woax đomc tâuc woac munh, naih Njâuv Zâu nyăngz singx-lingh yămz nănh stiz nyăngz nyâuđ njaf, phunz nănh stiz pâyz tuz coong quaix đangc, Njâuv zâu six zuc tanyđ zâuđ năngđ laix, six quaix đangz năngx tuz gwăngz-eng năngđ laix, nănh stiz songđ seetb jab zah mangc nâyx đomc dlayc, tauv laiv zanyf nzăngđ seetb taih. ¹² Tênb-Hungh phunz woax đomc tâuc woac munh pâyz tuz nănh stiz ayx nyăngz cumh pâuz, six max zâyf wâyc stăngc nănh stiz, six stăngc pănh yâuf pez. Nănh stiz tâuc taih coong nyăngz dlayc, six nâyx zanyf nyâuh numđ lănv nâyx đomc cuđ jeenx, tâuc nâyx đomc cuđ jeenx nyăngz munh six coouv yămz Tênb toongh nzac taih nyăngz singx-lingh, njynh Stynz munh lauf oix pâyz nâyx đomc dlayc. Zuc ayx đăngb zengh ¹³ Wâyc nâyx, six zuc muif dlih bênc nyâuđ zu, nongc dlăngc nyâuđ zu mungc tauv Njâuv Zâu Yê-su năngx taih woax zanyf, Nănh songđ oix sađ pôz phunz nyâuh. ¹⁴ Nyâuh yâuf pez mungv ayx âyz Tênb-Hungh nyăngz woac woax đomc namh nyâuf, max tuz âyz stymz cănh nyâyh ayx, cayx năngđ cah đangc noib nyâuh max zengx pâyz Zâu nyăngz săngx huđ bix ayx woa nâyx. ¹⁵ Êu nyâuh yâuf pez taih woax tauh six đăngb zengh woax tauh, nyâuh ayx muif hungđ dlayc songđ zuc ayx năngx đăngb zengh năngđ Nănh nâyx. ¹⁶ Wâyc zuc Canyx-stâub ja coong, “nyâuh six zuc ayx đăngb zengh, songđ wâyc yaz six đăngb zengh. ¹⁷ Nyâuh đoouc coouv nyăngz săngx huđ, nyâuh êu Tênb-Hungh hipđ ayx pha, Nănh max mangc laiv lanh nyăngz mynb, Nănh âyz songx munh ayx nyăngz dlayc stămđ, wâyc năngđ nâyx nyâuh yămz nây yangh stâyv songđ zuc cumh nzav yâuc zanyb Nănh. ¹⁸ Nyâuh yâuf pez pâyz tuz Tênb-Hungh max zâyf nongc hayh dlêtc nyăngz sămz nyanh suc nyâuh yămz nyâuh nyăngz stung zez tâuh stâyv stipx stâyv ayx max săngh nongc nyăngz jau seetb taih. ¹⁹ Nănh nongc Njâuv Zâu saix nzongf nyăngz samđ suc nyâuh yâuf pez, Njâuv Zâu six max huđ hanyh, yâuc max naih tync nzêmh nyăngz pa-jiz yungh jeenz. ²⁰ Tênb-Hungh tăng max zengx zâyx gungh nib woax zanyf, Nănh sên Njâuv Zâu taih đangc, tauv đangz phanx nyăngz môtc zapz noib, Njâuv Zâu Nănh zâyf năngx hynđ seetb taih stăngc pănh yâuf pez. ²¹ Nyâuh coouv Njâuv Zâu zeen Tênb-Hungh, six zâyf ayx phunz Njâuv Zâu tayc năngx phunz săngh phunb stengb taih tuz gwăngz-eng woax tauh, năngđ naz nyâuh zeen nyăngz seenz stymz cloon naih njih mungc nyăngz tync, six yămz Tênb-Hungh. ²² Nyâuh âyz seenz gâyf ayx, songđ phunz nyâuh nyăngz nyâuđ tuz dlăngc, yâuc seenz stăngz Yê-su nyăngz yâuf pez, năngđ naz nyâuh songđ zuc nongc dlăngc nyâuđ lanh stăngz lanh. ²³ Nyâuh tuz stengb tah nyâyc hâyđ, six max zâyf yămz hayh tayc nyăngz stynb stengb seetb taih, six yămz max hayh tayc nyăngz stynb stengb seetb taih, wâyc zuc nyâuh coouv Tênb-Hungh stâyv quâyx săngh nyăngz gâyf stengb săngb nyăngz quaix taih. ²⁴ Năngđ Canyx-stâub coong nâyx, yeetx stong bamh munh six năngđ mađ touđ nâyx, nănh stiz nyăngz gwăngz-eng yâuc năngđ mađ phăngh nâyx. Mađ caođ phăngh songđ jac platb nzuf. ²⁵ Six Zâu nyăngz gâyf stâyv quâyx yămz, woax đomc gâyf six phunz nyâuh yâuf pez mungv nâyx đomc cuđ jeenx gôh. Yê-su six săngh mengc nyăngz njauz pyây