¹ Nyâuh ayx au nyăngz munh lauf năngđ naz, six zuc buc nyâuh nyăngz langh, năngđ coong langh max zengx zeen Zâu Tênb-Hungh nyăngz gâyf, nănh nyăngz au ayx nyăngz dlayc, songđ phunz nănh oix zeen, njynh max zâuđ bux laiv zâux woac. ² Wâyc zuc langh phătc au ayx nyăngz muif hungđ dlayc đăngb zengh songđ pâuh nănh. ³ Nyâuh zoongz stynb yâuc max zâyf cungb zoongz cungh ngwoaic, bynf đongz đyux sămz nyanh, yâuc zuz gwuyz quav leenf. ⁴ Nyâuh zoongz quai six cungb zoongz cah njaf, ayx nyâuđ dlênc, nyâuđ đao, nây six zoongz stâyv quâyx max hayh dlêtc quai, âyz Zâu Tênb-Hungh mangc seenz saix nzongf. ⁵ Cah lof noib lêpc Tênb-Hungh woax đomc đăngb zengh nyăngz munh nzif, nănh stiz lauf zoongz stynb quai năngđ nâyx, nănh stiz buc nănh stiz nyăngz langh cun. ⁶ Năngđ Sa-ra, mungv Apv-ra-ham nâyx, hipđ Apv-ra-ham, ayx nănh nyăngz Zâu, six coong nyâuh yâuf pez ayx hopđ yâuc max zuc cumh nzav laiv hungđ, nyâuh songđ tuz ayx nănh nyăngz sab. ⁷ Nyâuh ayx pha langh nyăngz munh lauf tinyh năngđ, six zuc hâuđ lênh nyâuh nyăngz au, wâyc zuc munh nzif six đoonh nzongf, munh toonz songđ zuc nênf munh sab, wâyc zuc nănh stiz cloon nyâuh lauf tinyh năngđ, tuz Tênb-Hungh sađ pôz phunz, yâuc tuz stipx stâyv quâyx nyăngz mengc, nyâuh six zuc năngđ nâyx ayx, wâyc max phunz laiv hungđ taih tăng nyâuh clo Zâu nyăngz woac. ⁸ Yaz coong nâyx đomc stêtb mâyv woac, nyâuh yâuf pez six zuc songc tyuh nyâuđ mungv, lanh hâuđ lanh, yâuc stăngz zeen Zâu Yê-su nyăngz yâuf pez, lanh thông camz phunz lanh, yâuc lanh nhlimc lanh ayx jeenz. ⁹ Năngx gâyf ayx okx clao okx, lanh zaux lanh, six zuc pou woac phunz nănh stiz, Tênb-Hungh êu nyâuh ayx năngđ nâyx, nănh songđ sađ pôz phunz nyâuh. ¹⁰ Năngđ Canyx-stâub coong nâyx, laiv lanh oix yămz stâyv sangc tuz oonz loc nyăngz noib, six yămz năngđ nâyx, six zuc cun nyâuh nyăngz byeetc, yâuc năngx gâyf coong đokc , yâuc jaf munh. ¹¹ Six zuc quanyf goib ayx okx nyăngz dlayc, bix ayx gongx nyăngz dlayc, njăpc tingc nyâuđ lov pengh oonz, yâuc zuc luiđ lêpc pengh oonz nyăngz jau ninyh. ¹² Wâyc zuc Zâu nyăngz mâyc mangc ayx pengh stymz nyăngz munh, Zâu nyăngz bah noomh yâuc nzaz mungv nănh stiz clo Zâu nyăngz woac. Six Zâu nyăngz mynb max wynb mangc woax đomc ayx okx nyăngz munh. ¹³ Six coong nyâuh yâuf pez ayx gongx dlayc, naih mănv oix hoiđ nyâuh? ¹⁴ Max cun nyâuh ayx gongx nyăngz dlayc bix zuc tanyđ zâuđ, nyâuh six naih oonz loc, năngx gâyf cumh nzav laiv lanh, yâuc năngx gâyf nyâuđ woangb.” ¹⁵ Yămz nyâuh nyăngz nyâuđ cah njaf, six zuc zanyb nyâuh nyăngz Njâuv Zâu, phunz nănh muif dlih ayx Zâu cun nyâuh nyăngz nyâuđ, six zuc muif dlih bênc nyâuđ pob manyf seenz gâyf phunz oix mungv nyăngz munh, nyâuh wâyc lanh stăngz lanh năngđ nâyx, nyâuh songđ naih woac tauz nănh stiz, six zuc nongc dlênc nyâuđ yeenv gâyf tauz nănh stiz. ¹⁶ Nyâuh six zuc ayx max naih tync nzêmh nyăngz stymz nyâuđ, năngđ naz nyâuh zuc munh coong woac peo, nyâuh coouv Njâuv Zâu ayx gongx dlayc, nănh stiz wâyc nyâuh coong nyăngz woac, songđ phunz nănh stiz numđ nyayz. ¹⁷ Six coong Tênb-Hungh nyăngz zux ix six phunz nyâuh ayx gongx dlayc bix zuc tanyđ zâuđ nanc, six năngx gongx têx, ayx huđ nyăngz dlayc bix zuc tanyđ zâuđ nanc. ¹⁸ Njâuv Zâu tayc wâyc stoif, ah hâyđ tuz stâyv quâyx, ah lanh max naih stoif nyăngz munh tayc tayv stoif-munh, tayc wâyc ênz nănh stiz ninyh tauv Tênb-Hungh, Njâuv Zâu nyăngz stynb zuc tayx tayc, six singx lingh năngx phunz nănh săngh phunb stengb taih. ¹⁹ Nănh coouv singx lingh nyăngz gâyf ninyh nzônh phunz zuc yămz nzauh woax đomc munh nyăngz mengc hoonh mungv. ²⁰ Six năngđ Nô-ya tox đangđ woax zanyf, Tênb-Hungh bux êu nănh ayx nyâuđ đao zu, six nănh stiz max mungv Tênb-Hungh nyăngz woac woax đomc munh, yămz đangđ cah njaf nyăngz munh stoc, cungb yeetc lanh munh tuz Njâuv. ²¹ Woax đomc womz, lauf năngđ nâyx yeenh stâyv quaix womz nyăngz gâyf, phunz nyâuh yâuf pez tuz Njâuv, max zâyf quaix nongc đaox nyâuh stynb sangc nyăngz đi cah lôh, six nongc naih stymz nyunc woac cloon Zâu Tênb-Hungh, nâyx hungđ gâyf njâuv nyâuh yâuf pez, six wâyc Njâuv Zâu Yê-su zuc tayc bix năngx săngh phunb stengb taih woax hungđ gâyf. ²² Nâyx zanyf Nănh tuz staox Tênb-toongh muf yămz Tênb-Hungh nyăngz byaoh phanx, six cun stynz-munh cloon naih quênh naih lanyf cun đamx yâuh woax tauh. Six yămz nănh nyăngz puf đi.