8 ¹ Nâyx zanyf yaz lănv tauv congx phunz miuc hanyh nyăngz nhlync hopđ, pănh songđ pâyz tuz pănh muif lanh munh naih bănh-sangz, Naih bănh sangz six ayx guic, zanyb lub, Stăngz munh nyăngz jau, nzăngđ hayh lanh nênf lanh.” ² Six coong nyâuh yâuf pez naih laiv lanh nyâyh taih laic stăngz six nănh pâyz tuz nzuf, Six nyâuh yâuf pez max zengx pâyz tuz caux đêh.” ³ Laiv lanh Stăngz Zâu Tênb-Hungh, Zâu songđ pâyz woax lanh.” ⁴ Six yaz lănv tauv congx phunz miuc hanyh nyăngz nhlync hopb, pănh pâyz tuz miuc hanyh yămz nzêux nây bamh canz six max naih laiv hungđ seenz nyăngz, pănh pâyz tuz cungb naih ah tauh Zâu Tênb-Hungh.” ⁵ Max (jez) yămz gungh mah six yămz nib naih munh hipđ ayx dlănh, Yâuc songđ seenz naih dlănh đungx, yâuc naih Zâu đungx.” ⁶ Pây cloon pănh têx cungb naih ah tauh nzangc pha Zâu Tênb-Hungh cungv, zâyx muif hungđ woax tauh, Six Njâuv-Zâu Yê-su. Muif hungđ six Nănh zâyx taih, Pănh săngh six mungc Nănh yămz. ⁷ Six max zâyf muif lanh pyac nyâuđ, Naih đomc munh lôx noib nănh stiz nhlync congx phunz miuc hanyh nyăngz muif hungđ quênx, Laiv zanyf nhlync A nănh stiz yâuc săngx tauv congx phunz miuc hanyh nyăngz laiv hungđ yâuc numđ naih wâyx, wâyc zuc nănh stiz nyăngz nyâuđ lanz nzongf.” ⁸ Nhlync hopb nyăngz laiv hungđ max hayh ayx phunz Tênb-Hungh numđ nyađ, hănđ max nhlync yâuc max săngh laix, hănđ nhlync yâuc max tuz lungđ lôif đêh.” ⁹ Six nyâuh yâuf pez songđ zuc buôngh stymz, năngx gâyf bây pănh dluyh stymz nhlync laiv hungđ ayx bây naih seenz stymz jeenz nyăngz munh pamf Stoif.” ¹⁰ Six coong năngđ naih tix lanh seenz stymz jeenz nyăngz munh phătc nyâuh naih bănh sangz nyăngz munh yămz woa miuc pyau nhlync congx phunz Miuc hanyh nyăngz laiv hungđ, max zâyf hox nănh cloon nhlync mah? Nănh nyâyh ayx năngđ nâyx six pamf Stoif.” ¹¹ Njâuv-Zâu tayc wâyc nâyx tauh zeen max yongb nyăngz yâuf pez, Six nyâuh năngx ayx phunz nâyx tauh yâuf pez zuc mêtc wâyc nyâuh naih bănh sangz nyăngz munh.” ¹² Nyâuh ayx năngđ nâyx songđ munz nyâuh nyăngz yâuf pez tam jeenz nyăngz munh, nyâuh hoiđ nănh ayx năngđ nâyx six longđ stoif cloon Njâuv-Zâu. ¹³ Six coong năngđ nhlync A bix bây yâuf pez pamf Stoif têx, Yaz songđ stâyv quâyx max nhlync A nzof gôh, Bây nănh stiz max zuc pamf Stoif six năngx gongx têx.” Phao-lô naih gâyf ayx năngđ pitc lanh cumh pâuz munh