6 ¹ Six coong yămz nyâuh woa yâuf pez nyăngz mungh tongx naih laiv lanh tinyh zab nyăngz dlayc, Nănh stiz yâuc tinyh ênz ninyh lov max zeen Tênb-Hungh nyăngz stămđ Stoif quanz bênc dlayc? Ha săngh laix yâuc max pâyz lov zeen Tênb-Hungh nyăngz munh zay?” ² Nyâuh yâuf pez max pâyz tuz Tênb-Hungh nyăngz pec stigx six stămđ tuz bamh canz mah? Six coong pănh năngđ stămđ tuz bamh canz, nâyx đomc ănz stêu dlayc, pănh yâuf pez bix max naih mănv stămđ tuz mah?” ³ Nyâuh Yâuf pez max pâyz tuz pănh six năngx stămđ tuz Stynz-munh mah? năngđ naz pănh songđ hayh stămđ tuz yămz nây yangh stâyv nyăngz Tongh hangh nyăngz dlayc.” ⁴ Six coong nyâuh yâuf pez naih tăngx măkx nyăngz dlayc, ha săngh laix nyâuh yâuc max ênz ninyh coouv Huyb-đăngb munh bênc dlayc? ⁵ Yaz coong năngđ nâyx phunz nyâuh yâuf pez numđ nyayz, naih dlih nyâuh yâuf pez woa six naih Tongb-manyh munh hayh pob tuz nâyx đomc dlayc!” ⁶ Six nyâuh naih lanh cooux lanh nyăngz dlayc, yâuc oix ênz ninyh phunz max zeen nyăngz munh stăngc pob dlayc? ⁷ Nyâuh yâuf pez naih lanh cooux lanh nyăngz dlayc, songđ phunz nyâuh ayx longđ săngh stoif, munh ayx peo nyâuh săngh laix yâuc max seetb jab tanyđ? nyunc stâyb six năngx gongx têx max zâyf mah?” ⁸ Six nyâuh yâuf pez songđ ayx bah stamx bah stix lanh jaf lanh, yâuc năngx jaf tauv pitc tauh zeen Zâu munh.” ⁹ Nyâuh yâuf pez max pâyz mah? max cuyb jaf munh yâuc ayx pongz lauh, paix manđ hanyh, munh sab cănh văngc munh sab, munh toonz cănh văngc munh toonz, ayx max zanyx săngh nongc nyăngz munh six max tuz yămz Tênb-Côkz. ¹⁰ Nongx gâyf bây stymz lub ayx pongz lauh nyăngz munh jaf nyâuh, paix miuc hanyh, ayx stac, Coong woac huđ peo munh, hopb tyu bynz, mauh laiv hungđ, woax hungđ ya munh, Six max tuz nzac Tênb-toongh Côkz đêh.” ¹¹ Đangc dlih nyâuh yâuf pez naih batz lanh ayx nâyx đomc dlayc, Six nâyx zanyf, nyâuh yâuf pez coouv Njâuv-Zâu Tênb-Hungh nyăngz singx lingh tuz đaox dlăngc, nyâuh yâuf pez songđ tuz cloon Tênb-Hungh hopđ nyâuđ.” Stynb six Singx lingh nyăngz tync ¹² “Naih munh coong, “Yaz naih gâyf ayx tuz muif hungđ dlayc, Six max zâyf muif hungđ săngh nongc, muif hungđ yaz naih gâyf ayx tuz, Six yaz max phunz laiv hungđ ayx yaz nyăngz Zâu.” ¹³ Nhlync hopb six wâyc nyâuđ, nyâuđ six wâyc nhlync hopb, Six Tênb-Hungh songđ oix mêtc nzuf njynh iz hungđ, Pănh nyăngz stynb stayđ six max zâyf nongc pamf pongz lauh nyăngz jau, Six pănh njâuh nongc canyx bongc Zâu, Zâu songđ njâuh phunz pănh.” ¹⁴ Coouv Tênb-Hungh ayx phunz Zâu Yê-su năngx săngh phunz stengb taih nyăngz quênh năngđ laix, Nănh yâuc năngx ayx phunz pănh tayc blătc nyăngz munh năngx tuz săngh phunb stengb taih năngđ woa nâyx.” ¹⁵ Nyâuh yâuf pez max pâyz tuz pănh nyăngz stynb stayđ six Njâuv Zâu nyăngz stynb stayđ mah? ha yaz cayx nzâyz Njâuv Zâu nyăngz stynb ninyh ayx pênx maic phăngh nyăngz munh sab mah? max tuz đêh! ¹⁶ Wâyc zuc Canyx-Stâub ja coong, “iz lanh munh six săngh ah nomz stynb, “Wâyc năngđ nâyx nyâuh yâuf pez pâyz tuz Coong, “Nyâuh văngf woax tauh maic phăngh nyăngz munh sab, “Six cloon nănh pênx ah nomz stynb nzof gôh. ¹⁷ “Six laiv lanh cloon Zâu căpx dlonf, woax tauh songđ tuz cloon Zâu songc stynz hoonh.” ¹⁸ Six zuc pyeenv goib pongz lauh nyăngz Stoif, munh pamf laiv hungđ Stoif, Stoif six yămz bamh munh nyăngz stynb stayđ cungh ngwoaic, Six pamf tauv pongz lauh nyăngz Stoif, stoif Songđ hoiđ zuc pănh nyăngz stynb.” ¹⁹ Nyâuh yâuf pez max pâyz mah? pănh nyăngz stynb six congx Singx lingh nyăngz tync, yămz nyâuh yâuf pez nyâuđ njaf, nyâuh Yâuf pez tuz Stipx tăng Tênb-Hungh phunz taih nyăngz Singx lingh, Pănh nyăngz stynb six max zâyf Săngh pănh nyăngz, six săngh Tênb-Hungh nyăngz.” ²⁰ Wâyc zuc Tênb-Hungh maif pănh yâuf pez saix nzongf, Pănh songđ zuc nongc pănh nyăngz stynb bongc phunz Zâu nyăngz manyh yangh tuz Gwăngz-eng.” Zoongz pyau nyăngz jau