11 ¹ Six zuc âyz yaz nyăngz gao ayx, wâyc zuc yaz six âyz Njâuv-Zâu nyăngz gao ayx.” ² Yaz tanv nyâuh yâuf pez, six wâyc zuc nyâuh yâuf pez ayx muif hungđ dlayc, muif dlih săngx âyz yaz nzaox nyăngz woac ayx. ³ Six yaz oix nongc nyâuh yâuf pez pâyz tuz nâyx đomc Gâyf, munh toonz six ayx munh nzif nyăngz pyây, Njâuv-Zâu six ayx munh Pha nyăngz pyây, Tênb-Hungh yâuc ayx Njâuv-Zâu nyăngz pyây. ⁴ Laiv lanh munh toonz đoouc coouv Zâu mah six lănv gâyf yâuc pongz pyây woax lanh six cănh ayx peo nănh nyăngz pyây* ⁵ Six laiv lanh munh nzif đoouc coouv Zâu mah six lănv nzaox gâyf bix max pongz pyây six lauf cănh ayx peo nănh nyăngz pyây, nănh six năngđ tâyv ayx pyây luf nyăngz munh nzif nâyx. ⁶ Six coong munh nzif max pongz pyây, mah six jăpx đongz niny, mah six tâyv pyây luf six nyayz nzongf nyăngz dlayc, nănh six zuc pongz pyây. ⁷ Six munh toonz max hopđ zuc pongz pyây, wâyc zuc munh toonz six zuyx taih âyz Zâu Tênb-Hungh Gwăngz-eng nyăngz hanyh jangx, munh nzif yâuc ayx munh Pha nyăngz Gwăngz-eng. ⁸ Yâuc max zâyf munh toonz tăng munh sab seetb taih, six munh sab tăng munh toonz seetb taih đangc.” ⁹ Yâuc max zâyf zuyx munh baox taih wâyc munh sab, six zuyx munh sab taih wâyc nongc phanf munh baox. ¹⁰ Wâyc năngđ nâyx munh nzif wâyc pâuh Stynz-munh, songđ zuc pongz pyây wâyc nongc ayx lokc jangx. ¹¹ Six pănh zeen Zâu nyăngz munh, munh nzif munh pha pănh six zuc lanh păngc lanh. ¹² Wâyc zuc munh sab six tăng munh baox zuyx seetb taih, nzof munh baox yâuc tăng munh sab seetb taih. Six muif hungđ yâuc tăng Tênb-Hungh zuyx seetb taih. ¹³ Nyâuh yâuf pez nyâyh mangc jađ, munh sab đoouc coouv Zâu cloon Tênb-Hungh coong woac yâuc max pongz pyây six hođ mah six max hođ? ¹⁴ Bamh munh tongb hungb nyăngz jau max zâyf nzaox nyâuh munh toonz pâyz tuz njâuh pyây đongz đao, munh toonz njâuh pyây đongz đao six max zâyf nyayz nzongf nyăngz dlayc mah? ¹⁵ Six munh nzif njâuh pyây đongz đao six vâyc nzongf, Tênb-Hungh phunz munh nzif naih pyây đongz đao six wâyc nongc ayx bah nyaic đongx nongc pongz pyây. ¹⁶ Six coong naih đomc munh oix nzengz nâyx đomc dlayc, yaz cungb oix coong, “Pănh cloon Tênb-Hungh nyăngz Huyđ đăngb munh max zâyf nongc pitc hungđ gâyf. Munh max âyz đoouc lif gâyf Nhlync Zâu njăpc taih nyăngz năngv ¹⁷ Naih batz hungđ yaz max hayh tanv nyâuh yâuf pez, wâyc zuc nyâuh yâuf pez căpx dlonf nyăngz săngx huđ, nyâuh yâuf pez ayx huđ năngx đungx têx, ayx gongx nyăngz dlayc.” ¹⁸ Yaz numđ lănv coong nyâuh căpx dlonf nyăngz săngx huđ, nyâuh phunz goib ayx sax peob, Yaz lauf zeen coong seenz hayh naih nâyx đomc dlayc. ¹⁹ Nyâuh yâuf pez pongh zuc nâyx đomc dlayc, nzăngđ pâyz tuz laiv lanh săngh, laiv lanh max săngh. ²⁰ Nyâuh căpx dlonf nyăngz săngx huđ, nyâuh yâuf pez max zâyf seenz nhlync Zâu njăpc taih săngx nănh woax tonx năngv đêh. ²¹ Wâyc zuc nyâuh nhlync woax zanyf, lanh max zu lanh, ah phanx yâuc max tuz nhlync, ah phanx yâuc nhlync tuz pêu bynz. ²² Nyâuh yâuf pez max hayh cănh yămz nyâuh nyăngz pyau nhlync mah? mah six nyâuh yâuf pez mangc stam Tênb-Hungh nyăngz Huyđ đăngb munh, nyâuh yâuf pez ayx phunz munh zâuđ munh zuc nyayz? nyâuh oix nongc yaz năngđ laix nâyx cloon nyâuh yâuf pez coong? Ayx năngđ nâyx hayh tanv nyâuh max? max hayh đêh! seenz max hayh tanv nyâuh yâuf pez ayx nâyx đomc dlayc đêh. Nhlync Zâu njăpc taih woax nomz stêtz ²³ Wâyc zuc Zâu jaoz nănh nyăngz Gâyf phunz yaz, Yaz stipx taih songđ jaoz phunz nyâuh yâuf pez ô stayx, six Zâu Yê-su zuc maic woax munf Nănh zoz nomz nzu taih. ²⁴ Hâuđ Zâu nzuf ao taih yâuc coong, “Nây six yaz nyăngz stynb a, Yaz zuc stêtb mengc tayc wâyc nyâuh yâuf pez* nyâuh six zuc ayx năngđ nây nâyx wâyc săngx tauv yaz! ²⁵ Nhlync nzu nzuf, Nănh năngx zoz nomz zan taih yâuc coong, “Nâyx nomz zan six pây tauv yaz nyăngz samđ, wâyc nongc njăpc quaix nyunc Woac. nyâuh laiv zanyf hopb nâyx nomz zan six zuc săngx tauv yaz! ²⁶ Wâyc năngđ nâyx nyâuh laiv zanyf nhlync nzu yâuc hopb nâyx nomz zan, nyâuh yâuf pez six zuc lănv tauv Zâu zuc tayc, năngđ nâyx ayx zu tauv Zâu năngx taih. Max cuyb tinyh phanv nhlync Zâu njăpc taih nyăngz stêtz ²⁷ Wâyc năngđ nâyx, laiv lanh tinyh phanv nhlync Zâu njăpc taih nyăngz nzu, nongc Zâu nyăngz zan hopb, woax lanh songđ pamf Zâu nyăngz stynb, cloon Zâu nyăngz samđ. ²⁸ Muif lanh munh six zuc cănh zah nănh nyăngz nyâuđ đangc, nzof mănc nhlync nâyx nomz nzu, hopb nâyx nomz zan. ²⁹ Laiv lanh nhlync Zâu nyăngz nzu, hopb Zâu nyăngz zan yâuc max saz tuz Zâu nyăngz stynb, nănh nhlync hopb songđ phunz nănh zuc tingc Stoif. ³⁰ Wâyc năngđ nâyx, nyâuh yâuf pez songđ naih munh đungx zuc săngh gumc, naih phanx yâuc zuc tayc.* ³¹ Six coong pănh pâyz zah pănh nyăngz nyâuđ đangc, songđ max zuc Tênb-Hungh tingc Stoif. ³² Six Zâu stămđ pănh nyăngz stoif, Zâu bopc nzaox pănh, wâyc max phunz pănh zuc tingc Stoif cloon Gungh-Đi munh ayx ah đomc. ³³ Yaz nyăngz yâuf pez lex, nyâuh căpx dlonf nhlync nzu nyăngz săngx huđ six zuc tinyh zu. ³⁴ Laiv lanh nyâuđ sab, six zuc yămz pyau nhlync đangc, tauv Căpx dlonf nyăngz săngx huđ nyâuh yâuf pez nzăngđ max zuc tingc Stoif. Six năngx naih woax đomc pitc hungđ dlayc, zu yaz ninyh tauv nzof mănc lănv bux nyâuh tymb. Singx lingh nyăngz sâuđ nyâyc