¹ Ẹgben abẹ, mà a wọra ẹpẹn enane à á ṇ nọ kadakada ka ni me luwe. Àmá è é su efẹna è é su efẹna è é luwe na, ti su ọmaga Ẹdeda ẹfa, Ijisọs Ẹkraist, ọnẹ nẹnẹ ṣẹrẹ na. ² Ayẹ a wa inyanpun nẹ ti iluwe abẹ e me diya wa atọ aarẹ ẹka, àmá nẹ ẹrọrọ fenyan. ³ Ti din ka ti mi din ya, è é gbe ka tė fọ yo obuburu abẹ su. ⁴ Efena à á ga ka, "I din Osibina" àmá a ma fọ yo obuburu siye utun isomaro ya, ikuwa e me diye wo yi ẹro. ⁵ Àmá orokoro nẹnẹ aka fọ ye ẹga su na, i yi iwu egaba ayẹ Osibina uùnini we gule ne. Ore one tiye din ka ti wo yi iwu nẹ: ⁶ orokoro nẹnẹ à á ka ga ayẹ wo Osibina na e ki jejen akọ nẹnẹ ka ayẹ siye jejen na. ⁷ Uniniro, i ma wọra obuburu owowo nẹ nọ, àmá obuburu osusun nẹnẹ ni su wo ijije ṣa na. Obuburu osusun ayẹ a wa ẹga nẹnẹ nẹ wọ na. ⁸ Kẹgankẹgan mà a wọra obuburu nẹ ọ, nẹnẹ wa ikuwa nẹ ọ nẹnẹ wa ikuwa Ẹkraist akà i wi iwu, ubaka esiri esun ayẹ è é ṣun, akà ka ọsọ ikuwa ẹka ayẹ min a ba. ⁹ Ẹfena nẹnẹ à á ga ka ayi wo ọsọ ibe na nẹnẹ diye goli yọ ọda na ki wo esiri ṣa re akana. ¹⁰ Ẹfẹna nẹnẹ ni yọ ọda ẹga na ki wo ọsọ ibe e me diye su ẹkena nẹnẹ èke ẹ pilidọ na. ¹¹ Àmá efena nẹnẹ goli yọ ọda na e wo esiri ibe; ya anyen diye pen ke. ¹² Ẹ wọra à á nẹ nọ, egben abẹ, ubaka i yi iwuru bẹ fọ ẹpan gbun nu ni tọ ri ka iyi iwuru. ¹³ Ẹ wora à á nẹ nọ, ẹdẹda abẹ, ubaka ni din ẹfẹna nẹnẹ wo ọtọtọmẹ ṣa na. Ẹ wọra nẹ no, ikirisa abẹ, ubaka ne su afere yere oduduro ayẹ ẹpan. ¹⁴ Ẹ wora nẹ nọ ke, egben abẹ, ubaka ni din ẹdẹda. Ẹ wọra nẹ nọ ke, ẹdẹda abẹ, ubaka ni din ẹfẹna nẹnẹ wo ọtọtọmẹ ṣa na. Ẹ wọra nẹ nọ ke, ikirisa abẹ, ubaka ni gbenẹda, Osibina ẹga diya ma nọ à á ma, ni diya fọrẹ oduduro ayẹ. ¹⁵ Ni me ni ẹro ẹga ṣa ẹpẹn ẹnanẹ nẹnẹ ayẹ na. È é su ẹfẹna nẹnẹ ni ẹro ayẹ ẹga, Ẹdẹda uùnini e me wo yi ibẹ. Ẹpẹn fẹnyan nẹnẹ ¹⁶ wo ẹro ayẹ na -iwukpe uùninikunini, anyen uùninikunini, akà ẹrọ ọọ̀kẹkẹrẹ - e me wo Ẹdẹda ẹfa ṣa àmá e wo ẹrọ ṣa. ¹⁷ Ẹro ayẹ akà yu oni è é ṣunà á yọ. Ama ẹfẹnẹfẹna è é siye Osibina oòpin na éke wamọ otutun motutun. ¹⁸ Egbe abẹ, ẹwakati omunurun a wa ọnẹ kakọkakọ ni siye wọ ka ẹkraist à á ṣa na, akana ẹkraistiyuru ọyọyọ ṣa ke ọnẹ wọrẹ ka ti din ka ọgba omunurunayẹ a wa ọnẹ. ¹⁹ Bi wo ti iwu fura àmá bi me wo ti iwu ve ṣa, è èbona bi me tebi tu. Àmá akọ e siye gbe ka bi tebi tu na, ọnẹbe à á nyen ka bi me wo ti iwu ve ṣa. ²⁰ Àmá ni wo ọnwọnwọnro ayẹ ẹfa su ogbigberi ni diye din ọnẹ. ²¹ I ma wọra nẹ nọ ubaka ni me din ikuwa, àmá ubaka ni din ya e me diye su iṣoma nẹnẹ wo ikuwa ve ṣa na. ²² Ẹra a wa iṣomaro ayẹ à á ma da ka ẹfẹna nẹnẹ yuru ka Ijisọs a wa Ekraist nẹ? Oro ọnẹbẹ a wa Ẹkraistiyuru, ogbọna e gbe ka e yuru Ẹdẹda akà Ogben na. ²³ E me su ẹfẹna nẹnẹ yuru Ogben ayẹ nẹnẹ su Ẹdẹda na. Ẹfẹnẹfẹna à á na Ogben owo na su kẹ Ẹdẹda. ²⁴ Nẹ áwọ̀, tebi ọnẹ nẹnẹ ọ wo ọtọtọmẹ ṣa na a ma nọ kẹ ma. È è gbe ka ekẹna nẹnẹ ọ wọ ọ̀totomẹ na ma o à á ma, ka awo ẹ̀kẹ wo Ogben akà Ẹdẹda iibe. ²⁵ Ọnẹ a wa owọrọnrọn nẹnẹ à á tọ na - ẹrọ otutunmotutun. ²⁶ Ẹ wọra ẹpen ẹnanẹ nẹ nọ yẹrẹ ẹnanẹ èke bila nẹ ẹpan wo oyiya na. ²⁷ Na ànọ́, ogbigberi nẹnẹ nẹ na i yẹ ẹfa ke na ki ma nọ à á ma, e me pila bọ ka bi ki te nu. Àmá akọ yo ogbigberi siye te nu ẹpẹn fẹnyan nẹnẹ e me diya wi iṣoma na, kakọkakọ e siye te nu na, ne ma wo yi ibe. ²⁸ Akana, egben abẹ, nẹ ma wo yi ibe kadakada ka ọgbọna nẹnẹ à á fọ iwu nyẹn na tè eke gbuloko, tè èke diya kọ ẹpan i yẹ erẹn i yọ ọṣẹṣa. ²⁹ Nè e din ka a ṣẹrẹ, nè èke din ka ero fẹnyan nẹnẹ siye ẹkẹna nẹnẹ ṣẹrẹ na bi wo yẹ ẹfa ba ba.