29 ¹ Mapeksina David kawanilh xliputúm pulatamat:"Salomón kin kgawasa wanti Dios lakg saknit xla kgawasaku chuni kgalhiy liskgalala chu umá taskujut snún lanka. Xpalakata ama pulakgachixkuwin ni xla chatúm chixku wa xla PUCHINÁ Dios. ² Chu akit snun tatliweklnit laki nak mamakg xtumiy xliputúm makglakaskinat xla pulakgachixkuwín xla ki Dios. Putsala wantu na makglakas kinankan kgalhiya oro, plata, bronce, likan chu pakglhat chuna lakuntla na talakaskín. Nachuná mastama lakg lilakgatit chiwix, chu wantú tlan kgalhiy xtapal chu ihuwa chiwix wantu liskujkanit. ³ Chu xpalakata pi akit snun paxkiy chiki kim PUCHINÁ Dios, na nakg mastay wantu kila makinit wantu kgalhiy xtapal xla oro chu xa plata.Liuka kmastama umá nachuná wantú mastanitá maklakaskinat laki na lay pulakgachi kuwinat. ⁴ Akgtutu mil tsinkan oro xla Ofir chu akgtujún mil tsinkan xa plata laki na likaxtlawakan xmakni chiki. ⁵ Mastama oro wantu na litlawakan oro chu plata wantú na litlawakan makglakaskina xla plata xmakan kawilina wanti tlan liskujkoy xmakankan.¿Chu tiku lanchu mastaputun akgtúm lilakateín chu skujniputum PUCHINÁ?" ⁶ Wanchú xa lak puxku lilakgapasni xa lakg puxku xli kiltsukun xlikgapasni pulatamat Israel, xa puxku makgtakgalna xla akgatúm mil chu akgatúm ciento, chu wan xakgatsiwilakgolh xtaskujut mapeksina chuna la makgl katsikgol chuna mastakgolh. ⁷ Xlakan mastakgil xla xtaskujut xchiki PUCHINÁ Dios akgkitsis mil tuminakgaw mil tumín xla oro, akgaw mil tumín xla plata, akgkutsayan mil tumín xa bronce, chu akgitsis mil xa likan. ⁸ Chu amakgol wanti xkgalhikgoy xa lakglilakgatit chu lakgslipipi chiwix mastakgol nakg xchiki PUCHINÁ Dios, makamaxikgolh Jehiel, chatúm clilakgapasni Gersón. ⁹ Chu pulatamat paxawakgol xpalakata uma wantu xmastakgonit. Wanchú xliputum listaknikan xmakgamastakgonit. ¹⁰ Nachuná mapeksina David tlan lipaxawa, chu sikulanalil PUCHINÁ xlakatín putúm pulatamat chune wa:"Xa sikulanalan wix PUCHINÁ Dios, xa pulh kintlatikan xla Israel xa liankgalin. ¹¹ Mila PUCHINÁ, xli lanka, xlitiiwekw, xli talanka, xli tatlaja chu xli takgakni. Xpalakata wantú wi nak akgapun chu nak katiyatni mila.Nachuná wix milimalanat, wix xli tamalankit xliputúm. ¹² Xliputúm tamakg lakaskinat chu xli kgakni minachá nak milakatín, wix malanana xliputúm tachixkuwitat. Nak mi makan wi litliweke lakinamalankiya pulatamat chu lata tiku na maxiya litliweke. ¹³ Chu lanchú, ki Dios, akinan kamaxiyan paxkatkatsini, chu lakgachixkuwiyaw min takuni. ¹⁴ ¿Chu tiku akit chu tiku kimpulatamat laki tlan nak kamakamaxiyan xliputúm uma? Xli kana xliputúm milá, chu wantú makgamakltinanitaw kamaxiyan. ¹⁵ Xpalakata akinan ni xa lau ka puntsu ktilamanaw, chuna la xa lakgmakan kililakgapasnikan. Kilatamatkan nak kakilhtamaku ka puntsu chuna la mastilek ni makgapalay. ¹⁶ PUCHINÁ ki Dios kan, mamakgxtuminitaw putúm uma makglakaskina laki na li kaxtlawakan akgtúm pulakga chixkuwin nak min takuni, milakatín minacha chu milá. ¹⁷ Akit katsiy ki Dios pi wix putsaniya ki nakukan chu lipaxawaya akgxni xa akgstitúm makglaya, xpalakata akit xa akgstitúm ki naku makamaxinitan putúm uma , chu lanchú ukgxilha pi umá pulatamat nak katapaxawan taminit chu tamakamaximan lilakgateín. ¹⁸ PUCHINÁ Dios, xla Abraham, xla Isaac chu xla Israel kintlatikan xa lak makgan katlawa pi xa liankgalhín kalakapastakgol umá min pilatamat, kakapulalipi xlistaknikan nak milakatín. ¹⁹ Kamaxi Salomón kinkgawasa akgtúm nakú xa akgstitúm lakí na makgantaxtiy milimapeksin xa sasti mintalak'kaxlan chu min ta akgastakyaw, chu laki xla na kaxtlaway min pulakgachixkuwín wantú akit lakg kaxtlawiwilinit. ²⁰ Chu alistalh David kawanil tachixkuwitat :"Chu lanchu ka sikulanalitit mi Dios kan." Chu xputumkán sikulanalikgol PUCHINÁ xDios xtlatikan xa lakg makgan, takilhputakgolh chu lakgachixkuwikgolh PUCHINÁ chu mapeksiná. ²¹ Xli chalí, xlakan makgnikgolh xtakgalhinkan chu lilakgateykgolh PUCHINÁ, chu mastakgolh lilakgateín xa ihkún, mastakgolh akgtúm mil wakax, akgtúm mil xa kgolhu borregos chu akgtúm mil borregos, nachuna xa chuchut uva chu ihuwa lilakgateín xliputúm pulatamat Israel. ²² Chu amá kilhtamaku wayankgolh chu kgotkgoh x latin PUCHINÁ chu paxawankgolh. Xlakan tlawakgolh Salomón mapeksiná xlimakgti, chu sikulanalikgolh nak xlitliwekw PUCHINÁ laki xla na malanan, chu sikulanalikgolh Sadoc chuna la xpalakachiwina PUCHINÁ. ²³ Wanchú Salomón tawi nak xpumapeksín PUCHINÁ chuna la mapeksina, anta ni xwi xtlati chu xla tlan aninil chu xliputúm pulatamat Israel kgalhakgachixkuwil. ²⁴ Chu putúm, xa lakg puxku chu makgtakgalhnanín, chu xliputúm amakgapitsín xkaman David litayakgol pi na kgalhakgaxmatgoy mapeksina Salomón. ²⁵ Wanchú PUCHINÁ malankil Salomón xlikalanka pulatamat Israel chu maxil tlakg litliweke nix xtachuna wanti xtitaxtukgonit mapeksinanín nak pulatamat Israel. ²⁶ David,xkgawasa Jesé, malanal nakg xlikalanka pulatamat Israel. ²⁷ David malanal tatipuxam kata nak Israel malanal akgtujún kata nak Hebrón chu 33 nak Jerusalén. ²⁸ Chu xla nilh akgxni kgolhuta xwanit, tlak tilatamal chu tlan tikgalhil lakuan chu wantú xkgalhiy xtapalh chu talankit. ²⁹ Chu wanti titlawal mapeksina David tatsoknit nak xli kgalhtawakga Samuel xmakatsinina PUCHINÁ, nak xlikgaltawakga Natán xmakatsininá PUCHINÁ chu nak xli kgaltawakga Gad xmakatsininá PUCHINÁ. ³⁰ Anta tatsokgtawilanit wantú titlawal akgxni xmalanama nak Israel, chu wantú titaxtulh ama kilhtamaku nak Israel chu nachuná wantú xtitaxtuma alakatunú kachikinín.