2 ¹ Noenipe, pjiepa jliaji nocaiterri pirso njite mamaodacatsa naoya njaji yacoti Dio inalri wanaitajaca. ² Piwapa pjimi piicao iyecati naco njite picadacawa pirsocarro aima iwaopiakjeti. ³ Pitatja cadaa caiwi ricotsa pirsocarro kjeya yajikjeti, ⁴ pioma cantja jliaji yajikjeti cayoji paoma capisho palrata, o paoma capisho cacoadaperri nadawanda, ⁵ ikenantja yanji coajica pafiocawa Dio iwana, icatsa cayo panaitjaca parsocadaa Dio yanjikje. ⁶ Dioca jliaji ialri jliaji yanjikjeti, Lrinoma lrikjoite namoto njaji yajikjeti kjeyacarro pají. ⁷ Lricadaa iyecati nawaopiakje rico narso njaji ipeyocapeni, Jliatsa iwapa pjiomi matsiperri ioya njaji shepa caperri Lriaco ajádalri. ⁸ Jliatsa icadaa nadejicarro matsia njaji shepacaperri Lriaco ajádalri njite Jliatsa iwapa pjiomi jliaji nanaitjalri corri capoa namacani. ⁹ Nininaotja piají coajica matsiadalri naco, ajádalrica pja, paomaca pacoaca pjiomi irso, njite pjiomi njaji matsiaperri parsolritsa panaitjaca. ¹⁰ Cayo panatjaca parsocarro yajikjeti pacaolre ricó, njite catima watsa pjia pirso capoa yajikjeti. ¹¹ Cayekjaprri cadaa sha, jliaji yanjikjeti lriwapaotsa pjiomi matsirri ioya. ¹² Lriyomjeta caotsa sha naoya njaji picadalrintja pinaitjaca pimatsicanao, ¹³ nacayosho njaji yamicaperri inaitjaca matsia, njaji yajicapewa cadaoca- werrico. ¹⁴ Catima najiacacawa nanaitja cádanaco imatsicananti njite nacatimatacawa matsiperri naco. ¹⁵ Nájica nanaitja namatsicanao ima opica njenawa lrioya jliaji iwaopiakjeti matsiadalri icadalri panaitjaca matsia. ¹⁶ Jliaji yajikjeti lriyomjeta tsakjaotsa pjia rooya sroaji inarso cainirridarro, rsoaji corridarrotsa piají inaikica naco rojoita cádanaco pjia roaco sho. ¹⁷ Cainirri piacano royempetica lrico, mitsa romaca roinirri, njite romaodaca roacoam ioya ronaitjanda lriapiya Dio ipeyajle. ¹⁸ Njaji iacape roinai roopana lricojle cayocana mayamicalri idee capishona, njite corri cadaa yamina roya icamitsa dekja mayamicana. ¹⁹ Njaji shewaacacape roinai, icamitsa naaca mayamina, njite corritsa nadia carroca naofawa jalredaoca lrico. ²⁰ Niini pjia, pinaitja cayoji nanaitja capisho njaji inaiki corriperri iofa inaitja namatsicanao, pinaitja cayoji nanaitja capisho njai inaiki matsiaperri. ²¹ Njaji inaiki inaitjacape matsia naofa caotsa jalredaoca lrico, njite njaji inaitjacape matsia corriotsa mayami carrocana. ²² Mitsa njaji matsiperri corriotsa naofá carroca jalredaoca lrico, njite njaji corriperri iaitja matsia Lriñeta caotsana.