¹ Nga runi, biche ni nadxie' ca, ca ni iza' racaladxe gúya, ni rusieche naa, ne ca ni naca la'pa, sacarí laguiaana suhua' dxiichi tu lu Señor, xhamigua ni nadxie' ca. ² Izá canaba Evodia, ne izá canaba Síntique, gaca ca tobisi lu xquendabiani ca lu Diuxhi. ³ Dxandipe laaca izá canaba lii, ni dxandí rizaya nia' lu dxiña; gucane ca guna di'. Ti laacabe biini cabe dxiña ne naa ra biche'che cabe xtidxa Diuxhi cue' Clemente, ni lá ca ma caa lu gui'chi liibi lisaa de guenda nabani. ⁴ Cadi cuezadxi tu de guieche tu lu xhaiquenu. Xti tiru canie, Laguieche. ⁵ Lagudi gunibia de guira binni guenda nachahui xtitu. Xhaiquenu ma nuu gaxha. ⁶ Cadi intícasi guni lugu laatu. Laga nga la?, lu de guira, ne guenda rinni ne Diuxhi, ne guenda rinaba, ne guenda rudi xquixhe, ca ni canaba tu gunibia Diuxhi ni. ⁷ Ne guenda ratadxi xti Diuxhi, ni ridiidi lu de guira guenda riene, zapa ladxido' to, ne ca ni rinni ique tu lu Cristu Jesus. ⁸ Para guiluxhé, biche ca, intiisi ni gaca dxandí, intiisi ni risaca, intiisi ni naca jneza, intiisi ni nayaa, intiisi ni nachahui, intiisi ni riní cabe jneza de laa, pa nuu xhiixha ni izá jneza, pa nuu xhiixha ni sanda gusisaca cabe, luguiní ique de ca ndi. ⁹ Ca ni ma biziidi tu, gucua tu, ne binadiaga tu, ne biiya tu de naa, laguni ca ni, ne Diuxhi de guenda ratadxi ziu ne laatu. ¹⁰ Naa izá naróba rieche lu xhaiquenu deeru laatu ma bidxigueta tu guenda riu xhizaa pur naa. Dxandipe laatu maca guyu tu xhizaa pur naa dxiqué, peru que ñuu ra ñanda ñaca ne tu naa. ¹¹ Cadi canie ndi ti purti caquiiñe. Ti purti ma biziide chua' nayeche lu de guira ra cadide. ¹² Naa nana xhinga guenda nazí, ne nana xhinga guenda rapa xtale. De guira jmodo ne lu de guira na ma biziide ni naga'chi de xhi jmodo gahua jneza o guindaana, de gapa xtale o caquiñe. ¹³ Naa zanda gune de guira ca ndi pur ni rudii xtipa naa. ¹⁴ Neca nga, laatu biini tu jneza de gudii tu naa ni napa lu ca guenda nagana xtine. ¹⁵ Laatu binni de Filipo ca', Nana tu de que dxi bizulua' lu xtidxa Diuxhi, dxi bizaana Macedonia, nin ti Iglesia que ñaca ne naa lu guenda rudi ne guenda ricá, pa cadi laazi tu. ¹⁶ Neca dxi na nua Tesalonica, laatu bizendatu ni gucane tu naa pur ca ni caquiiñe jma de ti tiru. ¹⁷ Cadi naca di ndi pur ti cazayananda Ofrenda. Laga nga la?, naa cuyube cuananaxhi ni gutale ndaya xtitu. ¹⁸ Naa ma gucua de guira, ne napa xtale. Na ma bidxaya. Naa ma gucua de Epafrodito ca ni zeeda ca de laatu. Laaca naca ca ti xhou' rinda'naxhi, ti sacrificiu sanda guica, ni riuladxi Diuxhi. ¹⁹ Diuxhi xtine zudii guira ni caquiñe tu pur ca ni xtale ni risaca xtibe ni nandxo' lu Cristu Jesus. ²⁰ Yana para Diuxhi xtinu ne Bixhoze nu gaca guira guenda nandxo' dede guira dxi ne guira dxi. Saca gaca. ²¹ Lagudii ti diuxhi cada tobi de ca ni ma runi cre' Cristu Jesus. Ca bichinu ni nuu ne ca naa cuzeenda ca diuxhi xti tu. ²² Guira ca ni ma runi cre' rarí cuzeenda ca Diuxhi xtitu, Jmarupe ca binni lidxi César. ²³ Guenda nachahui xti xhaiquenu Jesucristu gaca tobisi ne espiritu xtitu.