¹ Palavra di Nhordes ki ben pa Juel, fidju di Petuel. ² Nhos sukuta kel-li, nhos, gentis grandi, tudu nhos moradoris di tera. Purventura, kel-li algun bes kuntise na nhos dia o na tenpu di nhos antipasadu? ³ Nhos fla nhos fidju sobri kel-li, y ki nhos fidju konta pa ses fidjus, y ki ses fidjus konta pa otu jerason. ⁴ Kuze ki kafanhtu kortador dexa, kafanhotu pirigrinu nheme; kuze ki kafanhotu pirigrinu dexa, kafanhotu divastador nheme; kuze ki kafanhotu divastador dexa, kafanhotu kumedor nheme. ⁵ Nhos korda, mokerus, y nhos txora. Nhos grita, tudu nhos, ki ta bebe vinhu, pamodi vinhu doxi dja tradu di nhos. ⁶ Pamodi un nason forti y numerozu nvade Nha tera. Ses denti é dentis di lion, y e ten dentis di un lioa. ⁷ E transforma Nha vinha na lugar di amiasa, y duspi Nha figera publikamenti. E korta se tronku y fulha; ramus dexadu branku. ⁸ Nhos lamenta sima virjen, bistidu ku ropa di saku, pa morti di se maridu nobu. ⁹ Oferta di serial ku oferta di vinhu dja sta kortadu di kaza di Nhordes. Saserdotis, servus di Nhordes, nhos lamenta. ¹⁰ Plantason dja sta divastadu y tera sa ta lamenta. Vinhu nobu dja seka y azeti dja kaba. ¹¹ Nhos xinti burgonha, agrikultoris; nhos intxi di prantu, prudutoris di vinhu, pa trigu y pa sevada, pamodi kodjeta di kanpu dja ka mori. ¹² Vinhas ku figera dja seka; romeras, palmeras y masieras tanbe; tudu árvi di kanpu dja ka mori; y alegria di disendenti di rasa umana dja kaba. ¹³ Nhos pui ropa di saku y nhos grita, nhos, saserdotis. Mhos grita, servu di altar. Nhos txiga pertu, nhos deta di noti tudu bistidu di panu di saku, nhos servu di nha Deus. Pamodi oferta di gron ku oferta di bebida dja tradu di kaza di nhos Deus. ¹⁴ Nhos konvoka un santu jijun y un asenbleia santa. Nhos riuni gentis grandi y tudu moradoris di tera pa kaza di Nhordes, nhos Deus, y nhos grita pa Nhordes. ¹⁵ Ai di kel dia! Pamodi dia di Nhordes sta kuazi ta txiga. Distruison di Tudu Puderozu ta ben djuntu ku el. ¹⁶ Ka tradu kumida dianti di nos odju, alegria ku júbilu di kaza di Deus? ¹⁷ Simentis pudrise dibaxu di txon; silus kabadu ku el y armazem distruídu, pamodi trigu seka. ¹⁸ Moki animal sa ta jeme, Ribanhus di gadu sa ta sufri pamodi ka ten pastu; tanbe ribanhus di ovelhas sa ta sufri. ¹⁹ Nhordes, N ta grita-U. Pamodi lumi dja kume pastu di dezertu y xama dja kema tudu árvi di kanpu. ²⁰ Ti animal selvajen sa ta spera na Bo, pamodi korentis di águ dja seka y lumi dja kume pastus di dizertu.