^{1 2} Kel-li é palavra di Nhordes, ki ben pa Ozeia, fidju di Beeri, na dia di Uzia, Jotan, Akas u Izekia, reis di Juda, y na dia di Jeroboon, fidju di Joas, rei di Israel. Kantu, prumeru bes, Nhordes fala pa meiu di Ozeia, e fla: Bai, toma pa bo un mudjer prustituta. ³ Nton, Ozeia bai y e kaza ku Gomer, fidja di Diblain, y fika grávida y e da-l un fidju. ⁴ Nhordes fla Ozeia: Da-l nomi di Jezreel, pamodi ka ta dura N ta kastiga kaza di jeu pa sangi ki e dirama di Jezreel, y N ta kaba ku reinu di kaza di Israel. ⁵ Ta kuntise na dia ki N ta kebra arku di israel na rubera di Jezreel. ⁶ Gomer torna fika grávida y e pari un fidja. Nton, Nhordes fla Ozeia: Da-l nomi di Lo-Ruama, pamodi N ka ta ten mizrikordia di kaza di Israel, ki N ka dibia purdua-s mas. ⁷ Ma, N ta ten mizerikordia di kaza di Judá, y N ta salva-s pa Mi me, Ami Nhordes, se Deus. N ka ta salva-l ku arku, spada, gera, kabalu o mutu menus pa kabalerus. ^{8 9} Nton, dipos ki Lo-Ruama tradu mama, Gomer fika grávida y pari un otu fidju. Nton, Nhordes fla: Da-l nomi di Lo-Ami, pamodi anhos é ka Nha povu, nen Ami, nhos Deus. ¹⁰ Sime, núnbru di povu di Israel ta ser sima areia di mar, ki ka ta pode ser mididu y nen kontadu. Inda ki es fladu: Anhos é ka nha povu, nhos ta ben fladu: Anhos é povu di Deus bibu. ¹¹ Povu di juda ku povu di Israel ta ben djuntadu. Ta labantadu un líder pa es, y es ta subi di tera, pamodi grandi ta ser dia di Jezreel.