¹ Purtantu, nu aji ku txeu kautela pa ki ka parse ma ninhun di nhos fadja na alkansa promesa, ki dexadu pa nhos, pa entra na Deskansu di Deus. ² Pamodi nu rasebe notísia sabi sima es, má mensaji ka ta benifísia kes ki obi-l sen ter na fé na el. ³ Pamodi anôs, kes ki ta kridita, nôs é kes ki ta ben entra na es deskansu, sima fladu: "Konformi n jura na nha ira, aes es ka ta ben entra na nha deskansu". Ainda ki ses obra dja staba tudu prontu desdi kumesu di mundu, ⁴ sobre sétimu dia, El fla na algun lugar: "Na sétimu dia di tudu ses obra, Deus diskansa". ⁵ El fla di novu: "Es ka ta entra na Nha diskansu". ⁶ Má, komu diskansu di Deus inda sta rezervadu pa alguns entra, i txeu Izraelitas ki obi notísia sabi sobri Se deskansu ka entra purkauza di ses dizobidiênsia, Déus rezerva di novu un dia spisífiku, txomadu: "Oji". ⁷ El marka es dia kantu ki el fala através di Davi, sima dja El flaba antis: "Oji, si nhos obi Se vôs, ka nhos enduresi nhos korason". ⁸ Si Jozué daba es diskansu, Deus ka ta falaba es di otu dia. ⁹ Pur isu, ta izisti ainda diskansu sabátiku pa povu di Deus. ¹⁰ Pamodi kes ki entra na diskansu di Deus, ta diskansa di ses obra, sima Deus diskansa di ses obra. ¹¹ Purtantu, nhos sforsa pa nhos entra es diskansu, pa ki ningén ka kai na mezmu tipu dizobidiênsia ki es kai. ¹² Pamodi Palavra di Déus é vivu i poderozu, mas afiadu di ki un spada di dôs ladu, ki ta penetra divison di alma i di spiritu, di junta i medula, prontu pa julga intenson i pensamentu di korason. ¹³ Ninhun kriatura sta sukundidu dianti di ses odju. Au kontráriu, sta tudu reveladu i diskobertu dianti di odju di kel ki nu debe ben presta konta. ¹⁴ Nu ten, nton, un grandi Sumu Saserdóti ki travesa séu, Jezus, fidju di Déus, nu susti firmi na és konfison. ¹⁵ Nós nu ka ten un sumu saserdóti ki ka ta konpadesi di nôs frakeza, ma, Kel ki foi tentadu sima nós, tirandu faktu d-El pa peka. ¹⁶ Nu aprosima di tronu da grasa ku ozadia, pa nu resebi mizerikórdia i pa nu atxa grasa pa djuda-nu na ténu di nesesidadi.