¹ Na kes dia, sigidoris di Jizus ba ta omenta, i discípulus gregu, kumesa ta rasmunga kontra povu Hebreu, es faze asin pamodi ses viúva gregu, ta fikaba di fora na kes raparitson di sustentu di tudu dia. ² Nton kes dozi apóstulu, txoma tudu disípulu pa un raunion i es fla-s: Ka ta fika dretu pa nu diskutiba di ministériu di palavra di Déus pa nu trata di raparti kel ajuda di tudu dia. ³ Purisu, irmons, nhos skodji na nhos meiu, seti ómi ki ten tistimunhu dretu, xeiu di Spritu Santu i di sabedoria, pa nu intrega-s es sirbisu. ⁴ Má nos, nu ta kontínua, ta didika tudu nos ténpu pa orason i pa ministériu di palavra di Déus ⁵ Kes palavra di apóstulus dexa tudu algen kontenti, nton es skodje Stébu, ómi ku txeu fé i xeiu di Spritu Santu, Filipi, Prókoru, Nikanor, Timon, Pármenas i Nikolau, un ómi di Antiokia ki setaba ralijion di Judeus. ⁶ kes seti podu dianti di apóstulus; ki poi mon riba di es, i es ora. ⁷ Asin palavra di Déus ba ta spadja, i numru di disípulu na Jeruzalen bira kada bês más txeu; i un monti di saserdótis seta Jizus. ⁸ Stébu gó, era un ómi xeiu di grasa i puder di Déus, i ta fazeba maravilhas i grandi sinal na meiu di povu. ⁹ Má labanta kontra Stébu un ómi di un sinagóga txomadu sinagóga di libertus. Kes ómi era di Sireni ku Alexandria, i es djunta ku otu ómi di Silísia, ku Ázia, i es kumesa ta djiskuti ku Stébu. ¹⁰ Má es ka ta podeba aguenta sabedoria ki Spritu Santu ta daba Stébu. ¹¹ Nton es paga uns ómi, pa fla: Nu obi Stébu ta pápia palavra di blasfémia kontra Moizes i ti kontra Déus. ¹² Es ranja un grandi konfuson entri povu, kes gentis grandi ki ta raprezentaba povu, i dotoris di lei, i es txiga na Stébu, es pega Stébu i es leba-l pa tribunal más altu di Judeus. ¹³ Na tribunal, es prizenta tistimunha falsu ki fla: Kel ómi li, ka sa ta para di pápia kuzas kontra lugar santu di nos ténplu, nen kontra lei di Moizes. ¹⁴ Nu obi el ta fla tanbe, má es Jizus di Nazaré, ta ben kaba ku nos ténplu, i ki e ta ben troka kel kustumu ki mozes intrega-nu. ¹⁵ Dispôs, tudu kes ki staba xintadu na tribunal fika ku odju finkadu na Stébu, pamodi es odja má se rostu perse sima rostu di un anju.