¹ Duranti kel ténpu ki Apolu staba la na sidadi di Korintu, na pruvínsia di Akaia, Paulu staba ta pasapa intirior di pruvínsia di Ázia. Dipôs e txiga na sidadi di Éfesu. La e inkontra ku alguns disiplu, ² y e purgunta-s: "Nhos rasebe Spritu Santu óra ki nhos kridita?" Es rasponde-l: "Anos, nen nu ka obi ma ten Spritu Santu". ³ Paulu purgunta-s: "Nton ki tipu di batizmu ki nhos rasebe?" Es fla: "Batizu di Djon". ⁴ Paulu fla-s: "Djon ta batizaba povu kómu un sinal di ki es rapende di ses pekadu. Má djon tanbe ta kontaba povu ma es ta mesteba kridita na kel pesoa ki ta benba dipôs di el, ki é Jezus". ⁵ Dipôs ki es obi kes kuza, es batizadu na nómi di Sinhor Jezus. ⁶ Óra ki Paulu poi se mon riba di es, Spritu Santu dixi riba di es. Es kumesa tapâpia na otus língua, konfórmi Spritu Santu da-s kapasidadi, pa es konta mesaji di Déus. ⁷ (Es éra sérka di dozi ómi). ⁸ Duranti três mês, Paulu ta baba pa sinagóga la, y e ta papiaba ku es ku koraji. E ta diskutiba ku es y e staba ta konvense-s sobri Reinu di Déus. ⁹ Má alguns bira inda más kabésa rixu. Es ka ta obiba, y dianti tudu kel kongregason, es ta pâpiaba mal di kel Kaminhu. Nton, Paulu afasta di kel sinagóga y e laba kes disiplu la pa skóla di Tiranu, undi ki e pasa ta inxina-s tudu dia. ¹⁰ Paulu fase asin duranti dôs anu. Nton, tudu algen ki ta moraba na pruvínsia di Ázia, tantu judeus, kómu kes ki ka éra judeu, es obi Palavra di Sinhor. ¹¹ Déus ta fazeba txeu milagri strordináriu pa mon di Paulu. ¹² Ti mezmu kandu un lénsu ô vental, ki tinha tokadu na korpu di Paulu, lebadu pa poi riba gentis duenti, es ta fikaba kuradu di ses duénsa, y tudu spritu mau ta saíba di es. ¹³ Tenba alguns judeu ki ta andaba di un ladu pa otu pa tra spritus mau di povu. Nton, es tenta txoma nómi di Sinhor Jezus riba kes ki tenba spritu mau, y es fla: "N ta manda-u, na nómi di Jezus ki Paulu ta prega". ¹⁴ Agóra, kes séti fidju di Seva, ki éra un saserdóti prinsipal, es ta andaba ta faze asin. ¹⁵ Má un spritu mau rasponde-s y e fla: "N konxe Jezus, y N sabe kenha ki é Paulu. Má anhos gó, nhos é kenha?" ¹⁶ Nton, kel ómi ki tenba kel spritu mau, e salta pa riba di es, y e baza-s soku. E bati-s tudu, ti ki es sai di kel kaza ta kóre, xeiu di pankada y kuazi nunpriti. ¹⁷ Tudu algen ki ta moraba na Éfesu ben obi es kuza ki kontise, tantu judeu, kómu kes ki ka éra judeu. Es tudu fika xeiu di medu y es fika ku grandi ruspetu pa nómi di Sinhor Jezus. ¹⁸ Txeu di kes ki kriditaba, es ta benba pa konfesa publikamenti, y es ta kontaba tudu kes kuza mariadu ki es tinha fetu. ¹⁹ Un monti di kes ki éra fitiseru, es djuntu ses livru, u es kema tudu kes livru dianti di tudu algen. Kandu es faze kónta di présu di tudu kes livru, es atxa ma ses valor total éra di sinkuénta mil muéda di prata. ²⁰ Nton, éra di es manera puderozu ki mesaji di Sinhor ta kontinuaba ta spadja y ta ganha forsa. ²¹ Nton, dipôs ki tudu kes kuza kontise, Paulu razolve, na se spritu, pa e pasa pa kes pruvínsia di Masedônia ku Akaia, ántis di se volta pa Jeruzalen. E fla tanbe: " Dipôs di N volta pa Jeruzalen N meste sai pa ba vizita Roma tanbe". ²² Purtantu, Paulu manda dôs ajudanti, Timótiu ku Erastu, pa Masedônia. Má el, e fika más algun ténpu na pruvínsia di Ázia. ²³ Na kel ténpu, tenba un grandi bran-bran, purkauza di Kel Kaminhu di Sinhor. ²⁴ Tenba un sértu ómi, ku nómi di Dimétriu, ki éra orivi. E ta fazeba txeu modélu di ténplo di Diana, fazedu di prata, y kes artizon, ki ta trabadjaba ku el, es ta ganhaba txeu likru. ²⁵ Nton kel orovi konvoka un raunion ku kes artizon, y ku tudu kes ki tenba profison similhanti, y e fla-s: " Sinhoris, nhos sabe ma nos prosperidadi ta ben di nos profison. ²⁶ Má agóra nhos sa ta odja, y nhos sa ta obi, manera ki es Paulu ta fla ma kes déus ki fazedu ku mon ómi, es ka pode ser un déus dimé-divéra. E sa ta konvense, y e sa ta disvia, un monti di algen, ka sô li na Éfesu, má na kuazi tudu pruvínsia di Ázia. ²⁷ Kel kuza li é prigozu, pamodi é ka sô nos profison ki ta kóre risku di ser diskriditadu, má tanbe ténplu di grandi déuza Diana pode perde tudu se fama. Y mézmu tanbe, própi Diana, ki é adoradu na tudu Ázia, y na tudu mundu, se grandéza pode sufri pérda di valor". ²⁸ Óra ki gentis na kel raunion obi kes kuza ki Dimétriu fla, es fika xeiu di raiba y es kumesa ta grita ta fla: "Grandi é Diana di povu di Éfesu!". ²⁹ Kunfuzon spadja pa tudu sidadi. Povu kóre tudu djuntu pa tiatru. Na kaminhu, es pega Gaiu y Aristarku, dôs ómi di Masedônia, ki ta kunpanhaba Paulu, y es rasta-s djuntu ku es ti tiatru. ³⁰ Paulu kreba entra na tiatru, má krentis la ka dexa-l. ³¹ Ti alguns xéfi di pruvínsia di Ázia, ki éra amigus di Paulu, es manda-l rekadu y es pidi-l pa e ka intrega se kabésa na tiatru. ³² Entritantu, tenba un grandi dizórdi na meiu di kel multidon na tiatru. Uns staba ta grita un kuza, otus staba ta grita otu kuza, má maioria di es ka sabeba kal éra motivu ki es staba raunidu la. ³³ Kes judeu pintxa Alixandria pa frénti, y alguns na multidon splika-l kuza ki e debeba fla. La na frénti, e sana ku se mon, pamodi e kreba difende se kabésa dianti di kel raunion. ³⁴ Má óra ki es da kónta ma el éra judeu, es fika ta grita mézmu kuza tudu djuntu, pa dôs óra, y es fla: "Grandi é Diana di povu di Éfesu!" ³⁵ Foi sô sekretáriu di sidadi di Éfesu ki konsigi kalma kel multidon y e fla-s: "Sinhoris di Éfesu, kenha ki ka sabe ma é nos sidadi di Éfesu ki é guardador di ténplu di grandi Diana, y di se imaji ki kai di séu?" ³⁶ Kómu es kuza ka pode ser negadu, nhos fika kalmu y ka nhos faze nada ku diskuidu. ³⁷ Pamodi nhos traze és ómi Geiu y Aristarku li, má es ka furta nada di ténplu y nen es ka fla nada mal kóntra nos déuza. ³⁸ Purtantu, si Dimétriu, y kes artizon ki ta trabadja ku el, ten algun kuza kóntra otu algen, es pode bai poi ses kexa na tribunal, pamodi é pa ke-l ki nu ten tudu nos tribunal ku juís. ³⁹ Tanbe, si nhos ten más otu asuntu, nhos meste leba-l pa asenbleia ofisial, pa e ser disididu. ⁴⁰ Na verdadi, nu ta kóre risku di ser akuzadu di kria un rabóita, purkauza di kuza ki kontise li oji, pamodi ka ten ninhun motivu ki pode justifika tudu es konfuzon. ⁴¹ Dipôs ki e fla es kuza, e nsera el raunion.