¹ Yehova elabila na Mose, kuti, ² "ngati muyakinne wacimwa nocita mosakhulupilika kwa Yehova ku kunyengezya muyake pa vinthu vecimupasa, olo kusungizya, olo cinthu ceibiwa, olo ngati epondelezya muyake, ³ olo epeza vinthu vecisobesha muyake nakumunamizya, olo ngati walumbila wenye, olo mu vinthu vilivonse voteti vakucimwilamo banthu, ⁴ ndipo ngati wacimwa nakupezeka na mulandu, ofunika awezye ciliconse cecilonda muyake kapena kumpondelezya, kapena cila cecimsungizya, olo cenze cesoba lomb eve wacipeza. ⁵ Kuyangizyapo mu kalikonse kecilumbila wenye, ofunika awezye mokwana na kuyangizyapo cacifaifi kulingana na mtengo wake na kumulipilamwinekazi pa siku yawapezeka na mlandu. ⁶ Lomba aziletele nsembe ya mulandu kwa Yehova, mbelele inalume iliye cilema kucoka pa mbelele zake nayo inkhale yolingana na mtengo wa nthawi yamene iyo, monga nsembe ya mulandu kwa wansembe. ⁷ Wansembe apange compapatilako kwa Yehova, na eve akhululukiwe pa ciliconse ccipezeka kuti ali na mulandu naco." ⁸ Ndipo yehova elabila kwa Mose, kuti, " ⁹ mulamulile Aroni na bana bake banalume, kuti, 'iyi niye lmulo ya nsembe zoshoka; nsembe zoshoka zikonkhala mpamuliro pa guwa usiku onse mpaka m'mawa, na muliro wapaguwa usungike woyaka. ¹⁰ Lomba wansembe avwale vovwale vake vabwino, na vovwala vake vamkati vabwino. Anyamule milota yosalako pala muliro ukasila kushoka nsembe pa guwa, ndipo aike milota pambali pa guwa. ¹¹ Avule vovwala vake novwale viyake ponyamula milota kutwala kunja kwa msasa ku mlo yatuba. ¹² Muliro wapaguwa ukosungiwa oyaka. ufunika lini kuzima, na wansembe akoikapo nkhuni m'mawa mulimonse. Akoika bwino nsembe zoshoka monga mwazufunikila kuikiwapo, noshokelapo mafuta ya nsembe za mtendele. ¹³ Muliro usungike oyaka nthawi zonse paguwa. Osati ukozima. ¹⁴ Iyi niye lamulo ya nsembe za mbeu. Bana banalume ba Aroni bapeleke ku guwa kwa Yehova. ¹⁵ Wansembe atole unga wopela wozula kwanja wa nsembe ya nga na mafuta na vonunkhilisha vili pa nsembe ya mbeu, na kuishoka pa guwa kuti ifumye kamfungo kabwino monga nsembe yopanamilako. ¹⁶ Aroni na bana bake banalume balye vonse vosala ku nsembe. Yufunika kulyewa iliye isiti mu malo atuba. Balyele panja pocingililiwa pa tenti yokumanamo. ¹⁷ Isapangiwe na isiti. Naipasa kuba mbali yao ya nsembe yanguyopangiwila pa muliro. Niyotubishisha, monga nsembe ya ucimo na nsembe ya mulandu. ¹⁸ Mwanalume aliyense pa bana ba Aroni, monga mwa caikiwila cinkhale teto mpaka mibadwo yonse, yofumyiwa ku nsembe za pamuliro zopangiwila Yehova. Aliyense wa bakata ankhale mtuba.'" ¹⁹ Teto Yehova elabila soti kwa Mose, kuti, ²⁰ "Iyi niye nsembe ya Aroni na bana bake banalume, yati bakopeleka kwa Yehova pa siku yozozela umozi wa beve: mbali ya teni ya efa ya unga wopela monga nsembe ya mbeu nthawi yonse, m'mawa hafu na mcingulo hafu. ²¹ Ikopangiwa na mafuta mpani. Ikasusikiwa muilete mkati, m'mapisi yopikiwa mpeleke nsembe ya mbeu kuti itwale kafungo kabwino kwa Yehova. ²² Mwana mwanalume wa wasnembe mkulu wati ankhale wansembe mkulu walomba pakati pa bana bake banalume niye wati aipeleke. Monga mwa lamulo la nthawi zonse, yonse ikoshokewela Yehova. ²³ Nsembe ya mbeu iliyonse ikoshokewelatu osasiyapo. Yufunika lini kulyewa." ²⁴ Yehova elabila na Mose, kuti, ²⁵ "labila na Aroni na bana bake banalume, kuti, 'iyi niye lamulo ya nsembe yaucimo: nsembe ya ucimo yukopaiwila pamalo popaila nsembe kwa Yehova. Nibatuba ngako. ²⁶ Wansembe woipeleka ya ucimo ailye. Ikolyewa m'malo atuba panja pocingililiwa pa tenti yokumanilamo. ²⁷ Ciliconse cokhuza nyama yake cunhala cituba, na ngazi ikathonyela ku covwala ciliconse, mukociwasha, pamene apo payathonyela, m'amalo atuba. ²⁸ Koma cinkhombe cimwapikilamo ciphwanyiwe. Ngati mwapikila mu poto wamkuwa, ufunika kupaliwa na kusukiwa mu manzi abwino. ²⁹ Mwanalume aliyense pakati pa nsembe anlyeko ndaba niituba. ³⁰ Koma ngati nsembe yaucimo iliyonse yaletewa ngazi yake mtenti yokumanamo kupanga copapatilako m'malo yatuba isalyewe. Yufunika kushokewa.