¹ Vinthu ivi pivesila, Asogoleri benifwika na kuti, "banthu ba Israeli, bansembe, na a Levi, baliye zipatule ku banthu bamcalo na maloza bao: Kanani, Hiti, Perizi, Yebusi, Amoni, Moabu, Aiguputo, na Amori. ² Pakuti betolako bana bao byakine banakazi na banalume, ndipo basakanizya banthu atuba na banthu bamcalo, ndipo asogoleri na akulu akulu niye oyambila pa kusakhululupilika." ³ Pinecimvwa izi, neng'amba vovwala vangu na mkhanjo na kudonsa sisi la kumutu na ndevu, ndipo nenkhala pansi, mosoba cocita. ⁴ Bonse benzonjenjemela pa mau ba Mulungu wa Israeli pa cikhulupiliro ici besonkhana kwa neno pamene nenze nkhale pansi momvwishiwa nsoni mpaka copeleka ca mcingulo. ⁵ Koma pa coppeleka camcingulo nepanama kufuma pa malo pangu pomvwishiwa nsoni mu vovwala vangu vong'ambika na mkhanjo, na kugwada pansi notambasula manja bangu kwa Yehova Mulungu wangu. ⁶ Neciti, "Mulungu wangu, Nine wansoni ndipo wonyozeka kunyamula cinso cangu kwa mweo, pakuti macimo basu opakilako pamitu pasu, ndipo cimo lasu lukulilako kululu. ⁷ Kufuma mu masiku ba makolo basu natakhala mu macimo akuleni. Mu macimo basu seo, mafumu basu, ndipo bansembe basu bepelekewa ku mafumu ba mcalo cino, ku lupanga, ku undende, na kulondewa na vinso vomvwishiwa nsoni, monga mtiliri lero. ⁸ Koma lomba kwa nthawi itontho, cifundo ca Yehova catisalisha batontho opulumuka na kutipasa poponda mu mao bake atuba. Ici cenze ca Mulungu wasuu kusanikira menso basu na kutipasa mpumulo patontho mu ukapolo wasu. ⁹ Pakuti nise akapolo, koma Mulungu wasu aliye tilube koma waikilirako pangano la cikhulupiliro kwa seo. Wacita ici pamenso pa mfumu yaku Perisiya koteto kuti atipase mphamvu zalomba, kuti timange soti ng'anda ya Mulungu wasu na kupanamika voonongeka. Ecita ici kuti atipase vipupa vacitetezo mu Yudeya na mu Yerusalemu. ¹⁰ Koma, lomba, Mulungu wasu, tingalabile cinji kufuma pa ici? teluba malamulo banu, ¹¹ malamulo bamwepasa banchito banu aneneri, pamweciti, "malo aba bamuloba kutola ni malo osatuba. Niofyiwa na banthu ba mcalo na maloza bao. Beyazuzya kufumila kosilizyila mpaka kuyakine na kusatuba. ¹² Teto lomba, musakapase bana banu banakazi ku bana bao banalume, ndipo musakasakile mtendele wao na mankhalidwe bao, kuti mukabe olimba na kulya vabwino vamcalo, kuti muklengeshe bana banu kucitola nthawi zonse." ¹³ Koma kufuma pa zonse zetiwelera pa vocita vansu viipa na cimo lasu likuleni- pakuti mweo, Mulungu wasu, mwasunga camene cuyenela macimo basu nakutileka kupulumuka- ¹⁴ ko tikaphwanye soti malamulo banu na kupanga vikwati voyavizyana na banthu ana bamaloza? ko mukakalipe na kutiononga mwakuti pakabeve wa seo osalako, paliye othaba? ¹⁵ Yehova, Mulungu wa Israeli, nimwe olungama, pakuti tasalira batontho opulumuka mpaka pa siku la lero. Langa! tili pano pamenso panu na ucimo wasu, pakuti kuliye angapaname pamenso cifukwa ca ici.