¹ Mweo mukaloba m calo cokupasani Yehova Mulungu wanu ngati coloba, ndipo mweo mukacilandila na kunkhalamo, ² moteto mufunika mukatolepo zoyamba za zovuna zan zonse za mwawela nazo mu calo cokupasani mweo Yehova Mulungu wanu. Mukaziike mu nswanda kuya nazo ku calo cati Yehova Mulungu wanu akasankhe kunkhalako zina lake. ³ Mukoluta ku wansembe wati akotumikila mu masiku ao na kuti kwa eve, 'neo nuvomelezya lero kwa Yehova Mulungu wanu nawela ku cali ceculumbila Yehova ku makolo basu kutipasa seo.' ⁴ Wansembe akotola nswanda kufuma mu kwanja kwako na kuiika pansi pa guwa la Yehova Mulungu wako. ⁵ Mweo mukokuti pamenso pa Yehova, 'kholo langu lenze loyenda-yenda mu Aramu. Eve enze eciya ku Aigupto na kunkhala kula, na banthu bake benze ocepa mu cibelengelo. Kula eve enkhala mutundu ukulu, wamphamvu no paka mtundu. ⁶ Aigupto etivutisha seo na kutinzunza. Etisebenzesha nchito zaukapolo. ⁷ Telila kwa Yehova, mulungu wa ausuwasu, nae etimvwa kulila kwasu na kutiona manzunzo basu, nchito yasu, na kuvutishiwa kwasu. ⁸ Yehova etifumya mu Aiguto na kwanja lake la mphamvu, na kwanja koyondoloka, na kuyofya kululu, na vooneshela, na vodabwisha; ⁹ ndipo watileta ku malo bano nakupa calo cino, cuyenda na mukaka na uci. ¹⁰ Lomba onani neo naleta zoyamba zovuna zamcalo camene mweo, Yehova, mwetipasa.' Ufunika kuiika pansi pa menso pa Yehova Mulungu wako na kumupemebeza eve; ¹¹ na weo ukakondwele mu vonse vabwino vecicita Yehova Mulungu wako kucitila weo, ng'anda yako- weo, na Mlevi, na mulwendo ali pakati panu. ¹² Weo ukasilizya kupasa vonse vacikhumi va zovuna zako mu caka cacitatuu, niye kuti caka ca cikhumi, napo ukacipase kwa mlevi, ku mlwendo, na wamasiye, na kwa mfelekazi, kuti beve akalye mukati mwa milyango yanu na kuluta. ¹³ Ukaone pamenso pa Yehova mulungu wako, 'neo naleta kufuma mu ng'anda yangu vinthu vonse vili vake va Yehova, na kuvipasa kwa Mlevi, ku mulwendo, ku wamasiye, na kwa mfelekazi, monga mwa malamulo banu onse mweo bamwenipasa neo. Neo niliye cimwile lamulo lanu lili lonse, olo kubaluba. ¹⁴ Neo niliye lyekomukulila kwangu, olo neo kuikako kuyake panenze wauve, olo kupasapo ciyake kucitila ulemu akufwa. Neo namvwa mau ba Yehova MMulungu wangu; namvwilila vonse vamwenilamula neo kucita. ¹⁵ Langani pansi kufuma mu malo opatulika mwamunkhala, kufuma mululu, nakudalisaka banthu banu Israeli, na alo camwe tipasa seo, monga mwamwe lumbilila ku mausuwasu, calo cuyenda mukaka na uci.' ¹⁶ Lelo Yehova Mulungu wanu okulamulilani mweo kumumwilila malembo aba na maweruzilo; mwa ici mweo mukabasunge na kubacita na mtima wanu wonse na moyo wanu onse. ¹⁷ Mweo mwavomelezya lero kuti Yehova ni Mulungu wanu, na kuti mweo kukayende mu njira zake na kusunga malembo bake malamulo bake, na maweruzilo bake, na kuti mweo mukamvwe mau bake. ¹⁸ Lero Yehova wavomelezya kuti mweeo nimwe banthu bake , monga mwa enze ekulonjezelani mweo, na kuti mweo mukasunge malamulo bake onse, ¹⁹ nae akakunyamuleni kupambana a mitundu onse becipanga, na mweo mukalandile matamando, kumvwikila kwa zina, na ulemelero. Mukabe banthu opatulika kwa Yehova Mulungu wanu, monga mwecinenela."