¹ Ang pahayag tungkol sa Ninive. Ang aklat tungkol sa pangitain ni Nahum, ang Elkoshita. ² Si Yahweh ay Diyos na nagseselos at naghihiganti. Napupuno si Yahweh ng galit. Naghihiganti si Yahweh sa kaniyang mga kalaban at nagpapatuloy ang galit niya sa kaniyang mga kaaway. ³ Si Yahweh ay hindi madaling magalit at puno ng kapangyarihan. Hindi niya ipapawalang-sala ang makasalanan. Gumagawa si Yahweh ng daan sa bagyo at sa ipu-ipo, at ang mga ulap at mga alikabok ay nasa kaniyang paa. ⁴ Sinasaway niya ang dagat at natutuyo ito. Pinatutuyo niya ang lahat ng ilog. Mahina ang Bashan, pati na ang Carmel. Nalalanta rin ang mga bulaklak sa Lebanon. ⁵ Nayayanig ang mga bundok sa kaniyang presensiya at natutunaw maging ang mga burol. Gumuguho ang lupa sa kaniyang presensiya, ang buong mundo at lahat ng mga nakatira rito. ⁶ Sino ang makakaharap sa kaniyang poot? Sino ang makakapigil sa bagsik ng kaniyang galit? Ibinubuhos na tulad ng apoy ang kaniyang poot, at nahahati ang mga bato sa pamamagitan niya. ⁷ Si Yahweh ay mabuti, isang tanggulan sa panahon ng kaguluhan at tapat siya sa mga naglalagak ng kanilang tiwala sa kaniya. ⁸ Ngunit gagawa siya ng isang lubos na pagwawakas sa kaniyang mga kaaway sa pamamagitan ng isang malaking baha, at hahabulin niya sila hanggang sa kadiliman. ⁹ Ano ang masamang binabalak ninyong mga tao laban kay Yahweh? Wawakasan niya ito nang lubusan at hindi na magkakaroon ng kaguluhan sa ikalawang pagkakataon. ¹⁰ Sapagkat magiging sala-salabat silang tulad ng matinik na mga halaman; malulunod sila sa kanilang sariling inumin; lubos silang lalamunin sa pamamagitan ng apoy tulad ng tuyong pinaggapasan. ¹¹ May isang titindig mula sa iyo, Ninive, ang siyang nagbalak ng masama laban kay Yahweh, isang taong nagtaguyod ng kasamaan. ¹² Ito ang sinasabi ni Yahweh: "Kahit na napakalakas at napakarami ang bilang nila, gayon pa man, sila ay gugupitin; mawawala ang kanilang mga tao. Ngunit ikaw, Juda: Kahit na pinahirapan kita, hindi na kita pahihirapang muli. ¹³ Ngayon aking babaliin ang pamatok ng mga taong iyon paalis sa iyo; sisirain ko ang iyong mga tanikala." ¹⁴ At nagbigay si Yahweh ng isang utos tungkol sa iyo, Ninive: "Wala nang kaapu-apuhan ang magdadala ng iyong pangalan. Aking ihihiwalay ang inukit na mga larawan at ang minoldeng mga larawang gawa sa metal mula sa mga tahanan ng iyong mga diyos. Huhukayin ko ang iyong mga libingan, sapagkat napakasama mo." ¹⁵ Tingnan mo, nasa mga kabundukan ang mga paa ng isang taong nagdadala ng magandang balita, na siyang naghahayag ng kapayapaan! Ipagdiwang mo ang iyong mga kapistahan, Juda, at tuparin ang iyong mga pangako, sapagkat hindi ka na sasalakayin pa ng masasama, siya ay lubos na naihiwalay.