¹ Pablo ang apostol. Naging apostol ako hindi dahil sa tao o sa pamamagitan ng tao, kundi kay Jesu Cristo at ng Diyos Ama, na muling bumuhay sa kaniya mula sa mga patay. ² Kasama ang lahat ng mga kapatiran na naririto, sumusulat ako sa mga iglesya sa Galacia. ³ Sumainyo ang biyaya at kapayapaan ng Diyos Ama at ng Panginoong Jesu Cristo. ⁴ Ibinigay niya ang kaniyang buhay dahil sa ating mga kasalanan upang iligtas tayo mula sa masamang kapanahunang ito. Ayon ito sa kalooban ng ating Diyos at Ama. ⁵ Sa kaniya ang kaluwalhatian ngayon at magpakailanman. Amen. ⁶ Nagtataka ako kung bakit mabilis ninyong ipinagpalit ang tumawag sa inyo sa biyaya ni Cristo para sa ibang ebanghelyo. ⁷ Walang ibang ebanghelyo pero may ilang tao na gumugulo sa inyo at gusto nilang baguhin ang ebanghelyo ni Cristo. ⁸ Kung may isa man sa amin o isang anghel galing sa langit ang magpayahag sa inyo ng ebanghelyo na iba sa pinahayag namin sa inyo, dapat siyang sumpain. ⁹ Tulad ng sinabi namin sa inyo noon, at uulitin ko muli sa inyo, kung may isa mang magpahayag sa inyo ng ebanghelyong naiiba kaysa sa tinanggap ninyo, dapat siyang sumpain. ¹⁰ Sinisikap ko ba ang kagustuhan ng tao o ng Diyos? O sinisikap ko ba ang papuri ng mga tao? Kung sinisikap ko ang papuri ng tao, hindi ako nararapat na maging lingkod ni Cristo. ¹¹ Gusto kong malaman ninyo, mga kapatid, na ang ebanghelyong ipinahayag ko ay hindi galing sa tao. ¹² Hindi ko tinanggap ang ebanghelyo mula sa tao, o tinuruan lamang ng tao. Tinanggap ko ito mula sa kapahayagan ni Jesu Cristo. ¹³ Narinig na ninyo ang dati kong pamumuhay sa Judaismo, kung paano kong malupit na inusig ang iglesya ng Diyos at sinubukan kong wasakin ito. ¹⁴ Nahigitan ko ang marami sa mga kasama ko sa Judaismo. Naging masyado akong masigasig para sa mga kaugalian ng aking mga ninuno. ¹⁵ Ngunit ikinalugod ng Diyos na piliin niya ako mula sa sinapupunan ng aking ina at siyang tumawag sa akin sa kaniyang biyaya, ¹⁶ para ipahayag niya sa akin ang kaniyang Anak at para maipangaral ko siya sa mga Gentil. Hindi ako nagmadaling sumangguni ayon sa laman at dugo. ¹⁷ Hindi rin ako nagtungo sa mga apostol sa Jerusalem na nauna pa sa akin. Pero nagtungo ako sa Arabia at bumalik muli sa Damasco. ¹⁸ Pagkatapos ng tatlong taon, pinuntahan ko si Cefas sa Jerusalem at nanatili ako roon ng labinlimang araw. ¹⁹ Pero hindi ako nakipagkita sa ibang mga apostol maliban kay Santiago, ang kapatid ng Panginoon. ²⁰ Sa harapan ng Diyos, hindi ako nagsisinungaling sa mga bagay na isinulat ko sa inyo. ²¹ Pagkatapos nito, nagtungo ako sa mga rehiyon ng Siria at Cilicia. ²² Hindi pa ako nakikita ng harapan ng mga iglesya sa Judea kay Cristo, ²³ Ngunit narinig na nila, na ang taong umuusig sa atin noon ay pinapangaral na niya ngayon ang pananampalatayang sinubukan niyang wasakin. ²⁴ At nagpuri sila sa Diyos dahil sa akin.