¹ Nang dumaan si Jesus sa isang lugar, nakakita siya ng lalaking ipinanganak na bulag. ² Tinanong siya ng kaniyang mga alagad, "Guro, sino po ba ang nagkasala para sa kaniyang pagkabulag? Ang lalaking ito ba o ang kaniyang mga magulang?" ³ Sumagot si Jesus, "Hindi ito dahil sa kasalanan ng lalaking ito o ng kaniyang mga magulang. Pero nangyari ito para maipahayag ang pagkilos ng Diyos sa buhay niya. ⁴ Dapat nating gawin ang pinagagawa niya na nagsugo sa atin habang maliwanag pa ang araw. Malapit nang dumating ang gabi kung saan walang taong makagagawa. ⁵ Habang naririto ako sa mundo, ako ang ilaw ng mundo." ⁶ Pagkatapos sabihin ni Jesus ito, dinuraan niya ang lupa at bumuo ng putik mula sa kaniyang laway at pinahiran niya ang mga mata ng lalaki. ⁷ Sinabi niya sa kaniya, "Pumunta ka sa paliguan ng Siloam (na ang ibig sabihin ay "Pumunta") at maghilamos ka roon. Kaya nagpunta at naghilamos roon ang lalaki at siya'y nakakakita na. ⁸ Kaya sinabi ng mga kapwa ng lalaking ito na nakita siyang namamalimos, "Hindi ba siya rin ang lalaking nakaupo rito at namamalimos?" ⁹ Sinabi rin ng iba, "Siya nga iyon." Pero sinabi ng iba pa, "Hindi siya iyon. Baka kamukha niya lang." Pero sinabi ng lalaki, "Ako nga ito." ¹⁰ Tinanong nila siya, "Paanong nakakakita ka ngayon?" ¹¹ Sumagot siya, "Gumawa ng putik at ipinahid ni Jesus ito sa aking mata. Sinabihan niya akong, 'Pumunta ka sa paliguan ng Siloam at maghilamos ka roon.' Nagpunta ako roon at naghilamos kaya nakakakita na ako ngayon." ¹² Sinabi nila sa lalaki, "Nasaan na siya?" Sumagot siya, "Ewan ko." ¹³ Dinala nila ang lalaking ito na pinagaling ang mata sa mga Pariseo. ¹⁴ Araw ng Pamamahinga iyon nung pinahiran ni Jesus ng putik at pinagaling ang kaniyang mga mata. ¹⁵ Kaya tinanong siya uli ng mga Pariseo kung paano siya nakakita. Sinabi niya sa kanila, "Pinahiran niya ng putik ang mata ko at naghilamos ako kaya nakakakita na ako ngayon." ¹⁶ Sinabi ng ilang mga Pariseo, "Hindi galing sa Diyos ang lalaking ito dahil niya pinatutupad ang Araw ng Pamamahinga." Sinabi naman ng iba, "Kung makasalanan ang taong ito, paano niya magagawa ang mga tandang ito?" Kaya nagkaroon sila ng pagkakahati. ¹⁷ Tinanong nila muli ang lalaking pinagaling, "Anong masasabi mo sa kaniya, dahil siya ang nagpagaling sa mga mata mo?" Sumagot ang lalaki, "Siya ay isang propeta." ¹⁸ Pero hindi pa rin naniwala ang mga Judio na talagang bulag siya at noo'y nakakakita. Kaya pinatawag ang mga magulang ng lalaking gumaling sa paningin. ¹⁹ Tinanong nila ang kaniyang mga magulang, "Siya ba ang anak ninyong ipinanganak na bulag? Anong nangyari at nakakakita siya ngayon?" ²⁰ Sumagot ang kaniyang mga magulang, "Siya nga ang anak naming ipinanganak na bulag. ²¹ Pero hindi namin alam kung paano siyang nakakakita ngayon at kung sinong nagpagaling sa kaniyang mga mata. Siya ang tanungin niyo dahil nasa hustong gulang na siya. Kaya na niyang magsalita para sa kaniyang sarili." ²² Ganito ang sinabi ng kaniyang mga magulang dahil natatakot sila sa mga Judio. Ipinaalam na ng mga Judio na pagbabawalan na pumasok sa sinagoga ang sinumang magpapahayag na si Jesus ang Cristo. ²³ Kaya sinagot ng kaniyang mga magulang sila na, "Nasa tamang gulang na siya kaya siya na ang tanungin ninyo." ²⁴ Sa pangalawang pagkakataon, kinausap nila ang lalaking pinanganak na bulag. Sinabi nila, "Papurihan mo ang Diyos. Alam naming makasalanan ang lalaking iyon." ²⁵ Sumagot ang lalaki, "Hindi ko alam kung nagkasala nga siya. Isa lang ang alam ko: Bulag ako noong una pero nakakakita na ako." ²⁶ Kaya sinabi nila sa kaniya, "Anong ginawa niya sa iyo? Paano niya nabuksan ang iyong mga mata?" ²⁷ Sinagot niya sila, "Diba sinabi ko na sa inyo pero ayaw niyo akong pakinggan! Bakit ba gusto niyong mapakinggan pang ulit? Gusto niyo bang maging alagad din niya, o hindi? ²⁸ Kaya kinutya nila siya at sinabing, "Alagad ka niya, pero kami ay mga alagad ni Moises. ²⁹ Alam naming nangusap ang Diyos kay Moises, pero hindi namin alam kung saan nanggaling ang lalaking iyan." ³⁰ Sumagot ang lalaki at sinabi sa kanila, "Pambihira naman dahil hindi niyo alam kung saan siya nanggaling pero binuksan niya ang aking paningin. ³¹ Alam natin na hindi pinakikinggan ng Diyos ang mga makasalanan. Pero pinakikinggan ng Diyos ang tao kung tunay siyang sumasamba sa kaniya at ginagawa ang kaniyang kalooban. ³² Simula pa nang likhain ng Diyos ang mundo, wala pa aking narinig na may isang taong pinagaling na ipinanganak na bulag. ³³ Kung hindi galing sa Diyos ang lalaking ito, wala siyang magagawa." ³⁴ Sinagot nila siya, "Tuluyan kang ipinanganak sa kasalanan tapos kami pa ang tuturuan mo?" Kaya pinalayas nila siya sa lugar na iyon. ³⁵ Narinig ni Jesus na pinalayas ang lalaking iyon sa sinagoga ng mga Judio. Natagpuan niya siya at sinabi sa kaniya, "Naniniwala ka ba sa Anak ng Tao?" ³⁶ Sumagot siya, "Sino po ba siya, Panginoon, para maniwala ako sa kaniya?" ³⁷ Sumagot sa Jesus, "Nakita mo na siya at siya ang kumakausap sa iyo ngayon." ³⁸ Sumagot ang lalaki, "Naniniwala po ako, Panginoon." Kaya sumamba ang lalaki kay Jesus. ³⁹ Sinabi ni Jesus, "Naparito ako sa mundo dahil sa katarungan para makakita ang mga walang paningin at hindi makakita ang mga may paningin." ⁴⁰ May ilan sa mga Pariseo na nakarinig sa kaniya ang nagsabi, "Nabubulagan din ba kami?" ⁴¹ Sinabi sa kanila ni Jesus, "Kung bulag nga kayo, hindi sana kayo nagkakasala. Pero ngayong sinasabi niyong, "Nakakakita kami," sa gayon, nananatili ang mga kasalanan niyo sa inyo."