¹ Nagkasakit ang isang taong nagngangalang Lazaro. Nakatira siya sa Bethania, sa bayan ng kaniyang mga kapatid na sina Maria at Marta. ² Si Maria ang nagpahid kay Jesus ng mira at pinahiran din niya ang paa ni Jesus gamit ang kaniyang buhok. Kapatid niya si Lazaro na nagkasakit. ³ Pinasabihan ng magkapatid na babae si Jesus, "Panginoon, nagkasakit ang minamahal mong kaibigan. ⁴ Nung marinig ito ni Jesus, sinabi niya, "Ang sakit na ito ay hindi hahantong sa kamatayan pero nangyari ito para sa kaluwalhatian ng Diyos at para maluwalhati ang Anak ng Tao sa pamamagitan nito." ⁵ Minamahal ding kaibigan ni Jesus si Marta, ang kapatid ni Lazaro. ⁶ Nung marinig niyang maysakit si Lazaro, hindi muna umalis si Jesus sa lugar saan siya narooon. ⁷ Pagkatapos nito, sinabi niya sa kaniyang mga alagad, "Tara, bumalik tayo sa Judea." ⁸ Sinabi sa kaniya ng kaniyang mga alagad, "Guro, hindi ba't gusto kang batuhin ng mga Judio tapos babalik ka na naman doon?" ⁹ Sumagot si Jesus, "Hindi ba't may labindalawang oras na maliwanag sa araw? Kung may taong maglalakad sa liwanag, hindi siya matitisod dahil nakakakita siya sa pamamagitan ng liwanag ng mundo. ¹⁰ Pero kung sa gabi siya naglalakad, matitisod siya dahil wala sa kaniya ang liwanag. ¹¹ Sinabi niya ang mga bagay na ito sa kanila, "Nakatulog na ating kaibigang si Lazaro pero pupunta ako roon para gisingin siya sa kaniyang pagkatulog." ¹² Sinabi sa kaniya ng mga alagad, "Panginoon, kung nakatulog siya, puwede pa siyang gumaling." ¹³ Ang tinutukoy dito ni Jesus ay kamatayan kaya akala nila ang sinasabi niya ay natutulog sa pamamahinga. ¹⁴ Kaya malinaw na sinabi ni Jesus, "Namatay na si Lazaro." ¹⁵ Para sa inyong kapakanan, mabuti na rin na wala ako roon para maniwala kayo. Tara, pumunta tayo sa kaniya." ¹⁶ Sinabi ni Tomas, na kilala rin bilang Didimo, sa kaniyang mga kasamang alagad, "Tara pumunta tayong lahat para mamatay rin tayong kasama ni Jesus." ¹⁷ Nung dumating si Jesus, nalaman niyang nakalibing si Lazaro sa loob ng apat na araw. ¹⁸ Ngayon, malapit ang Bethania sa Jerusalem na may layong mga labinlimang estadio. ¹⁹ Marami sa mga Judio ang nagpunta kay Marta at Maria para magluksa sa kanilang kapatid. ²⁰ Nung marinig ni Marta na paparating si Jesus, lumabas siya para sumalubong pero nainwan si Maria na nakaupo sa loob ng bahay. ²¹ Sinabi ni Marta kay Jesus, "Panginoon, kung napaaga sana ang dating ninyo, hindi sana namatay ang kapatid ko. ²² Pero alam kong kayang ibigay ng Diyos sa iyo kung anong hihilingin mo sa kaniya. ²³ Sinagot siya ni Jesus, "Mabubuhay na muli ang kapatid mo." ²⁴ Sinabi ni Marta sa kaniya, "Naniniwala akong mabubuhay siyang muli sa huling araw." ²⁵ Sinabi ni Jesus sa kaniya, "Ako ang muling pagkabuhay at buhay. Ang sinumang maniwala sa akin, kahit mamatay siya, ay mabubuhay. ²⁶ At sinumang mabuhay at maniniwala sa akin ay hindi na mamatay. Naniniwala ka ba rito?" ²⁷ Sinabi niya kay Jesus, "Opo, Panginoon, naniniwala akong ikaw ang Cristo, ang Anak ng Diyos na dumating sa mundo. ²⁸ Pagkatapos niyang sabihin ito, umalis si Marta at tinawag ang kaniyang kapatid na si Maria nang palihim. Sinabi niya, "Narito ang Guro at pinapatawag ka niya." ²⁹ Nung marinig niya ito, nagmamadali siyang bumangon at nagpunta kay Jesus." ³⁰ Hindi pa nakakarating si Jesus sa bayan kundi naroon siya sa lugar kung saan siya sinalubong ni Marta. ³¹ Nung makita ng mga Judio si Marta na lumabas ng bahay para samahan siya sa pagluluksa, sinundan nila siya dahil iniisip nilang doon sa harap ng libingan niya gustong umiyak. ³² Nung dumating si Maria sa lugar kung saan naroon si Jesus, lumuhod siya sa kaniya at sinabi, "Panginoon, kung nandito sana kayo, hindi siguro namatay ang kapatid ko." ³³ Nung makita siya ni Jesus na umiiyak kasama ang ibang mga Judio na umiiyak din, nalungkot siya ng husto at nabigatan sa damdamin. ³⁴ Sinabi niya, "Saan niyo siya inilibing?" Sinabi nila sa kaniya, "Panginoon, sumama po kayo para makita ninyo." ³⁵ Umiyak si Jesus. ³⁶ Kaya sinabi ng mga Judio, "Tingnan niyo kung paano niya minamahal si Lazaro!" ³⁷ Ngunit sinabi rin ng ibang tao, "Kaya rin kaya ng taong ito, na nagpagaling sa mga mata ng bulag na lalaki na pigilan siya na hindi mamatay?" ³⁸ Nagtungo si Jesus sa libingan na may mabigat na damdamin. Ang libingang iyon ay yungib na may malaking batong nakaharang. ³⁹ Sinabi ni Jesus, "Tanggalin niyo ang malaking bato." Sumagit si Marta, ang kapatid ni Lazaro na namatay, "Panginoon, sa mga oras na ito, inaagnas na ang kaniyang katawan dahil apat na araw na siyang patay. ⁴⁰ Sinabi ni Jesus sa kaniya, "Hindi ba't sinabi ko sa inyo na pag naniwala ka, makikita mo ang kaluwalhatian ng Diyos?" ⁴¹ Kaya tinanggal nila ang batong nakaharang. Tumingin si Jesus sa langit at sinabi niya, "Ama, salamat at pinakinggan mo ako. ⁴² Alam kong lagi mo akong pinakikinggan pero sinabi ko ito sa mga taong nakatayo rito para maniwala sila sa iyo na nagsugo sa akin." ⁴³ Pagkatapos nito, sumigaw siya na may malakas na boses, "Lazaro, lumabas ka diyan!" ⁴⁴ Lumabas ang lalaking namatay. Nababalutan pa ng tela ang kaniyang mga kamay at paa. Pati ang mukha niya ay natatakpan ng tela. Sinabi ni Jesus sa kanila, "Tanggalin ninyo ang nakabalot sa kaniya at payagang makaalis." ⁴⁵ Nakita ng marami sa mga Judio na kasama ni Maria ang ginawa ni Jesus at naniwala sila sa kaniya. ⁴⁶ Pero nagpunta ang ilan sa kanila sa mga Pariseo at sinabi ang lahat ng ginawa ni Jesus. ⁴⁷ Kaya nag-usap ang mga pinunong pari at mga Pariseo at tinipon nila ang konseho, "Anong gagawin natin?" Maraming ginagawang mga tanda ang lalaking ito? ⁴⁸ Kung hahayaan lang natin siya, maniniwala ang lahat ng tao sa kaniya at baka kunin ng mga Romano ang ating posisyon at bayan." ⁴⁹ Pero isa sa kanila, si Caifas na punong pari sa taong iyon ang nagsabi, "Hindi niyo alam ang gagawin. ⁵⁰ Hindi niyo naisip na mas mabuti pang mamatay ang isang tao para sa kaniyang mga kababayan kaysa mawasak ang buong bayan." ⁵¹ Hindi niya ito nasabi para sa sarili niya. Dahil siya ang punong pari sa taong iyon, ipinahayag niya sa propesiya na dapat mamatay ni Jesus para sa kaniyang bayan, ⁵² at hindi lang para sa bayan kundi para ang lahat ng anak ng Diyos na matatagpuan sa malalayong lugar ay pagtitipunin sa isang lugar. ⁵³ Mula sa mga araw na iyon, pinag-isipan nila kung paano nila papatayin si Jesus. ⁵⁴ Hindi na hayagang naglakad si Jesus sa mga Judio kundi nagtungo siya sa bansang malapit sa ilang na tinatawag na Efraim. Nanatili siya roon kasama ang mga alagad. ⁵⁵ Malapit nang dumating ang Araw ng Paskwa ng mga Judio kaya maraming tao ang nagpunta sa Jerusalem mula sa mga probinsiya para gawin ang ritwal ng paglilinis bago sa Paskwa. ⁵⁶ Hinahanap nila si Jesus at nagusap-usap sila sa harapan ng templo, "Anong masasabi ninyo? Darating kaya siya para sa pista?" ⁵⁷ Nagbigay ng utos ang punong pari at mga Pariseo na dapat nilang isumbong kung nasaan si Jesus para madakip nila siya.