¹ "Nagsasabi ako ng totoo, ang isang taong hindi dumadaan sa pintuan ng bakod patungo sa kawan ng tupa ay isang magnanakaw. Umaakyat siya sa ibang daan para makapasok. ² Ang pastol ng tupa ay dumadaan sa pintuan ng bakod. ³ Pinagbubuksan siya ng bantay ng pintuan. Pinapakinggan ng mga tupa ang kaniyang tinig at tinatawag niya isa-isa ang mga tupa sa kanilang pangalan at ginagabayan sila palabas. ⁴ Pagkatapos niyang mailabas ang lahat ng kaniyang tupa, nauuna siyang naglalakad sa kanila at sumusunod sa kaniya ang mga tupa dahil kilala nila ang kaniyang boses. ⁵ Hindi susundin ng mga tupa ang isang dayuhin sa halip, iiwasan pa nila ito dahil hindi nila kilala ang boses ng mga dayuhan. ⁶ Sinabi ni Jesus ang talinghagang ito pero hindi nila naintindihan ang kaniyang sinasabi sa kanila. ⁷ Kaya sinabi uli ni Jesus sa kanila, "Sinasabi ko sa inyo ang totoo, ako ang pintuan ng mga tupa. ⁸ Ang mga nauna sa akin ay mga magnanakaw pero hindi sila pinakinggan ng mga tupa. ⁹ Ako ang pintuan. Ang sinumang papasok sa pamamagitan ko ay maliligtas. Papasok siya sa bakod at lalabas at matatagpuan niya ang mapagkakainan. ¹⁰ Naparito ang magnanakaw para magnakaw, pumatay, at manira. Naparito ako para magkaroon sila ng buhay at kasaganahan. ¹¹ Ako ang mabuting pastol. Iniaalay ng mabuting pastol ang kaniyang buhay para sa mga tupa. ¹² Ang inupahang manggagawa ay hindi pastol at hindi niya pagmamay-ari ang mga tupa. Pag nakita niyang paparating ang mabangis na lobo, iiwanan niya ang mga tupa at lulusubin ng lobo ang mga tupa at sila'y nagsisipagkalat. ¹³ Tumatakas siya dahil isa lang siyang inupahang manggagawa at wala siyang pakialam sa kapakanan ng mga tupa. ¹⁴ Ako ang mabuting pastol. Kilala ko ang aking mga tupa at kilala rin nila ako. ¹⁵ Kilala ko ang Ama at kilala rin ako ng Ama at iaalay ko ang buhay ko para sa mga tupa. ¹⁶ May iba pa akong mga tupa na hindi pa kabahagi ng kawan. Kailangan ko rin silang dalhin dito at maririnig nila ang aking boses para magsama-sama sila sa isang kawan na may isang pastol. ¹⁷ Ito ang dahilan bakit minamahal ako ng Ama: Inaalay ko ang buhay ko para kunin ko itong muli. ¹⁸ Walang makakapag-alis sa kanila sa akin kundi inaalay ko ito para sa aking sarili. May kakayanan akong ialay ito at may kakayanan din akong bawiin ito. Tinanggap ko ang utos na ito mula sa aking Ama." ¹⁹ Dahil sa kaniyang sinabi, nagkaroon na naman ng pagkahati-hati ang mga Judio. ²⁰ Marami sa kanila ang nagsabi, "Sinasapian siya ng demonyo at nasisiraan na ng ulo. Bakit niyo ba siya pinakikinggan? ²¹ Sinabi naman ng iba, "Hindi ganito magsalita ang isang taong sinasapian ng demonyo. Kaya bang buksan ng demonyo ang mga mata ng isang bulag?" ²² Dumating ang araw ng Pista ng Pagtatalaga sa Jerusalem. Panahon iyon ng taglamig, ²³ at naglalakad si Jesus sa templo sa balkonahe ni Solomon. ²⁴ Pinaligiran siya ng mga Judio at kanilang sinabi sa kaniya, "Hanggang kailan mo ba kami paghuhulain? Kung ikaw talaga si Cristo, sabihin mo sa amin ng malinaw?" ²⁵ Sumagot si Jesus, "Sinabi ko na sa inyo pero ayaw ninyong maniwala. Pinapatunayan ng aking mga gawa na ginagawa ko ang mga ito sa pangalan ng aking Ama. ²⁶ Pero ayaw ninyong maniwala sa akin kasi hindi ko kayo tupa. ²⁷ Kilala ng aking mga tupa ang aking boses at kilala ko rin sila at sinusunod nila ako. ²⁸ Binibigyan ko sila ng buhay na walang hanggan at hindi sila mamamatay kailanman. At walang makaka-agaw sa kanila mula sa aking kamay. ²⁹ Ang aking Ama ay may kakayanang higit pa sa lahat ng tao at ibinigay niya sila sa akin; wala ring makakapag-agaw sa kanila sa kamay ng Ama. ³⁰ Ako at ang aking Ama ay iisa." ³¹ Dahil dito, dumampot ang mga Judio ng mga bato at binalak nila siyang batuhin. ³² Sinagot sila ni Jesus, "Pinakita ko sa inyo ang maraming gawa mula sa aking Ama. Para sa aling mga gawa niyo ba ako babatuhin? ³³ Sinagot siya ng mga Judio, "Hindi ka namin babatuhin dahil sa anumang ginawa mo kundi sa pamumusong sa Diyos dahil isa ka lang tao pero itinuturing mong kapantay ang Diyos." ³⁴ Sinagot sila ni Jesus, "Hindi ba't nakasulat sa inyong kautusan, 'Sinabi kong, kayo ay mga diyos'? ³⁵ Kung tinawag niya silang mga diyos, kung saan hindi mababali ang salita ng Diyos (at hindi rin mababali ang Kautusan), ³⁶ sinasabi niyo ba sa pinili ng Diyos at isinugo sa mundo na, 'Namumusong ka sa Diyos,' dahil sinabi kong, 'Ako ang Anak ng Diyos'"? ³⁷ Kung hindi ko ginagawa ang mga gawain ng aking Ama, huwag kayong maniwala sa akin. ³⁸ Pero kung ginagawa ko ang mga ito, kung ayaw ninyong maniwala sa akin, paniwalaan niyo man lang ang mga ginagawa ko para maunawaan ninyong ang Ama ay nasa akin at ako ay nasa Ama." ³⁹ Muli nilang sinubukan siyang dakpin pero nakaalis siya sa lugar na iyon. ⁴⁰ Muli siyang nagtungo sa kabilang bahagi ng Ilog Jordan sa lugar kung saan nagbabawtismo noon si Juan at nanatili siya roon. ⁴¹ Maraming tao ang lumapit sa kaniya at sinabi nila, "Walang ginawang mga tanda si Juan pero nagkatotoo ang lahat ng sinabi niya tungkol sa lalaking ito." ⁴² Maraming tao ang naniwala sa kaniya doon.