¹ Aboruok anyun ,che kitupche nguno logoiywek che kororon che kiaamwok , choto kiotaach ,choto agiche che otonone, ² kisorurenok choto agiche ; eng'ng'alekche kiaamwok,ngo to nam komie ,ko kima oyan buch. ³ Amu kiagonok eng' tai noto kiataach agane ,ale kime Kristo agobo tengekwogikyo ,ko u ye mwoe sirutik, ⁴ ak kigitub; ak kigin'eet eng' betutab somok ko u ye mwoe sirutik ; ⁵ ak kimong'ji kepa ;ye ibata ,komong'ji taman ak aeng'; ⁶ ng'oityo komong'ji tupchosiek che siire bogol mut tugul , che ta komi agoi kora che chang' eng'iche agobo kigoruyo alak; ⁷ ng'oityo komong'ji Jakobo ; ye ibata ,komong'ji che kiyoktoi tugul ; ⁸ Ak let eng' tugul komong'jo agane, ko u ne kigios. ⁹ Amu a ne tigin eng' che kiyoktoi , ne ma nyolu kegureeno ne kiyoktoi , amu kiaus kanisetab Jehovah . ¹⁰ Ago eng' miendab Jehovah a u kit ne a u : ak korororindonyi ne kigigono ko maek buch; ago kiaboisie mising' asiir iche tugul : ago ma ane , ago kororindab Jehovah ne kimi koboto. ¹¹ Ngo ane anyun ,anan ngo iche keamdoi ui tugul , ak u noto kioyan ak akwe. ¹² Ara anyun, ngeamdoi Kristo kele kiging'eet komong' eng' che kibek , ko teptoi ano si komwae alak eng' kwenung'wong' kole mami ng'eetyet ne bo che begu? ¹³ Ago ngot ko mami ng'eetyet ne bo che begu , ko kaga ma king'eet Kristo agine: ¹⁴ ak ngo kima king'eet Kristo ,ko buch anyun amdaennyo , ko buch agine kayaneng'wong.' ¹⁵ Ee, ak kagenyoruech kele ki baorinik che bo lembech che bo Jehovah;amu kigebaorian agobo Jehovah ; kele kiing'eet Kristo :ne kaga ma ing'eet Jehovah, ngot maging'eeti che begu. ¹⁶ Amungot komaging'eeti che begu ,kokima king'eet Kristo agine: ¹⁷ ak ngo kima king'eet Kristo , ko buch kayaneng'wong';ko ta omi eng' tengekwogikwok, ¹⁸ Noto anyun ,icheket che kigoruiy eng' Kristo ko kigolusyo. ¹⁹ Ngot kokogimang'u Kristo eng' soboni kityo, ko kaga ki biko che tinye rirek kosiir tugul. ²⁰ Ago kiging'eet anyun Kristo komong' eng' che kibek , tongoaniat ne bo icheket che ruitos. ²¹ Amu ko u ye kibunu meet chi , ko kibunu chi agine ng'eetyet ne bo che begu. ²² Amu ko u ye begu tugul eng' Adam , kou noto tun kisoobi tugul eng' Kristo. ²³ Ago chi tugul eng' komostanyi :Kristo ko tongoaniat ; ye ibata ko iche che bo Kristo, eng' nyonunennyi. ²⁴ Ye ibata koit anyun let , ye tun igoito inendet bounatet kogochi Jehovah inendet Kwanda ; ye tun kagowong' bounatet tugul ak kimnatet tugul ak kamuktaet. ²⁵ Amu kanyol kolaitoran inendet matiny , agoi konde bunikyi tugul keldebesoikab kelyekyi. ²⁶ Bunyot ne bo let ne tun king'eme ko meet. ²⁷ Amu , kigonde tuguk tugul keldebesoikab kelyekyi kogasit inendet .Ago ye mwoe kole kindenoi tuguk tugul kogas it inendet, kotoogu kele maboto inendet ne kiinde tuguk tugul kogasit. ²⁸ Ak ye tun kagindetuguk tugul kogasit inendet , eng' betunoto anyun kinde Werit agine kogasit inendet , si koek Jehovah tugul eng' tugul ²⁹ Anan yae nee anyun che kigibatisanji che kigobek?Ngot ko kaga manging'eet iman che begu , ko kalya anyun si kibatisan choto agobo iche? ³⁰ Ko amu nee anyun si kemi ng'oiyondit sait age tugul? ³¹ Aboariani eng' kalosunonoto mi eng' akwe , che kitupche , ne tinye eng' Kristo Jeiso Kiptaiyandennyo ale ,ameee betut age tugul. ³² Ngo kigibarge ak tiong'ik eng' Epeso ko u biteetab biko , atinye borot nee anyun?Ngo kaga maging'eeti che begu , ongeamisie ak kee amu kibegu mutai. ³³ Ama kigenak: Ng'eme choronok che yaachen atepto ne kararan. ³⁴ Ogosu eng' imanda , amat oyai tengek ; amu maingen alak Jehovah: amwoe ni agonok olilan. ³⁵ Ago mwoe chi age ,kolen , King'eetitoi ano che kigobek? ak bwoni eng' borto ne u nee? ³⁶ Inye ne i berber , noto ne igole inyendet ,ko masobe ,ngot ko mame: ³⁷ ak noto ne igole ,ko megole borto ne tun biitu , ago ksuwot buch abere biitune nganok, anan tuguk alak; ³⁸ ago igochini Jehovah borto ko u ye iboiboi inendet , ak kogochini kesuwot age tugul bortanyi inegei. ³⁹ Banyek tugul ko ma agenge : ago mi alak che bo biko , ak alak che bo tiong'ik, ak alak che bo taritik , ak alak che bo njirenik. ⁴⁰ Mito borwek che bo kipsengwet, ak mito borwek che bo ng'weny :ago terjin telunatet ne bochoto bokipsengwet ak telunatet ne bo choto bo ng'weny. ⁴¹ Mito lilindo ne bo asista , ak lilindo age ne bo arawet, ak lilindo age ne bo kogelik ; amu terjin kogeliat age ak kogeliat age eng' lilindo. ⁴² Ko u noto agine ng'eetyetab che begu .Kigole eng' ng'emisiet ; king'eeti koma komi ng'misiet: ⁴³ kigole ko mami teegisto; ak tun king'eeti eng' kamuktaet: ⁴⁴ kigole borto ne kigisiktoi ; king'eeti borto ne bo tamirmiriet .Ngo miborto ne kigisktoi , komi agine ne bo tamirmiriet. ⁴⁵ Ko u noto agine , kigisir kele , kiek chito ne botai , Adam ,chito ne sobe .Kiek Adam ne bo let tamirmiriet ne igoitoi sobondo. ⁴⁶ Ago maindoi noto bo tamirmiriet , ago noto bo borto;ye ibata konoto bo tamirmiriet. ⁴⁷ Chito ne b tai kobo ng'weny , bo nyung'unyek:chitone bo aeng' ko bo kipsengwet. ⁴⁸ Ko u ole teptoi ne bo nyung'uyek:ak ko u ole teptoi nebokipsengwet ,u choto agiche che bo kipsengwet. ⁴⁹ Ak kou ye kigiib itondab chitab nyung'unyek,ko tun kiibe itondab chitab kipsengwet agine. ⁵⁰ Amwoe ni anyun ,tupchosiechu ,ale maimuchi banyek ak korotik konyor bounatetab Jehovah; amaimuchi ne nune konyor ne manune. ⁵¹ Ogeero ! amwowok u ng'otiet: Magiruitosi ache tugul , ago kiwalech ache tugul, ⁵² eng' ne matia ,eng' kamismisetab konda, eng' iriaget ne bo let : amu chee iriaget , si keng'eet che kigobek ko ma kotinye nune , ak kewalech. ⁵³ Amu kanyol kolaach ne nune ne manune, ak kanyol kolaach nito mee ne mamee. ⁵⁴ Ago ye tun kagolach nito nune , ne manune ,ak ko kagolaach nito mee ne mamee , kosulda anyun mwaet ne kiisir kele kagelugui meet eng' kabelisiet. ⁵⁵ Ee, meet, mi ano kabeliseng'ung'?Ee , meet ,mi ano ngwonindong'ung'? ⁵⁶ Ng'wonindab meet ko tengek ; ak kimanatetab tengek ko ng'atutik: ⁵⁷ ago kigochini Jehovah kongoi , ne konech kabelisiet eng' Kiptaiyandennyo Jeiso Kristo . ⁵⁸ Noto anyun, che kitupche che achome , ogimegitu, amokany keng'eak, oyae otese kotugul boisietab Kiptaiyat , amu ongen ole ma bo buch boisieng'wong' ne uui eng' Kiptayat.