¹ A a nje mataangiro o mulaeza mulotu wa Jeeso Kirisiti, Mwana we Ireeza. ² Sina mu ku ngolyetwa mu ingolo lyo muporofiti Isaya, "Vone, Ni tumine kapaswa ha vusu vwaako, iiye yeeti a ku shiyamiseza inzira. ³ Lyinzwi lyaakwe iiye yoo suumpa neena mu muzuka, 'Mu shiyamisa inzira ya Simwiine; mu tamalaza inzira zaakwe."' ⁴ Johani a veeza, naa koloveza mu muzuka mane ne ku kutaza che ikolovezo yo kulyi nyaansa ne ku wonderwa kwe zivi. ⁵ Chisi chonse cha Judiya ne vantu vonse va Jerusalema va va zwiiri kwaalyi. Va vaa kolovezwa naaye mu lwiizi lwa Jorodani, ne va lyi wamba zivi zaavo. ⁶ Johani a vaa zweete uvaaki wo vooza vwe ikaamera naa lyi sumiine ibanti lye chikavi mu imunda mane naa lya impanse ne vuuchi vo muzuka. ⁷ A va wambiri kwii wulu naati, "Ku keeza mukaando kwaangu, u ni saa lyikene mane ne ku chuntama kuti ni sumunune tukwere twe insangu zaakwe. ⁸ Ime ni va mu koloveza cha menzi, lyinu iye ukeeza ku ku mukoloveza cho Luhuho lu Jolola.'' ⁹ Nni kwa pangahala mwa awo mazuva kuti Jeeso ava ka zwi kwa Nazareta mwa Galaliya, neeza ku kolovezwa ne Johani mu lwiizi lwa Jorodani. ¹⁰ Jeeso ava inikuki cho kuzwa mu menzi, a vaa voni iwulu lyii iwuka mane ne Luhuho ni lu sukira mwaalyi ni lwiina mu chiswano che inkuva. ¹¹ Lyinzwi ni lyaazwa mu iwulu, "U Mwaanaswiisu Waangu yoo sunitwa. Ni saanga ahulu mwaako." ¹² Ku zwaaho Luhuho ni lwa mu kwiitira mu muzuka. ¹³ A veena mu muzuka makumi oonne a mazuva, naa lyikwa ne Saatani. Mu muzuka a veena ne zinyolozi ze inkanda, mane mangiloyi ni va mu tendera. ¹⁴ Lyinu Johani chiinga wondwa, Jeeso a veeza mwa Galaliya naa wambira kwii iwulu manzwi malotu e Ireeza, ¹⁵ mane naati, "Inako chi yee izuzirikizwa, mane ne muvuso we Ireeza wiina ha fwihi. Mulyi nyaasa mane mu zumine mu manzwi a jolola." ¹⁶ Mu kuyeenda he mbalyi lye iwate lya Galaliya, naa vona Sayimoni ne Enduru mwanchaa Sayimoni ne va sohera tunyandi twaavo mu iwate, mukuti va vaalyi vayambisi. ¹⁷ Jeeso naa vacho kuti, "Mwiize, mu ni ichirire, mane mu ni mu chite vawoonzi va vantu." ¹⁸ Mane ho hwaaho, va vaa siyi tunyandi twaavo cho ku mu ichirira. ¹⁹ Mu ku yendera havusuzana, Jeeso a vaa voni Jemusi mwaana a Zebediya ne mwanche Johani; ni va wandera tunyandi mu vwaato. ²⁰ Ava va sumpi mane ni vaa siya Ishaavo Zebediya mu vwaato ne vahikaana vaavo va hiritwa, a vo choku mu ichirira. ²¹ Va vee njiri mwa Kaperaname, ku zwaaho lwe Insavata, Jeeso ne njira mu isinagoge choku ruta. ²² Va vaa komokerwa murutiro waakwe, mukuti a vaalyi ku varuta sina iri muntu wa maziimo muku saa swani nne vangolyi. ²³ Mane ho hwaaho mukwaame mu isinagoge yaavo a veena luhuho lu sa jololyi nna huwa, ²⁴ naati, ´´Tu chite nzi chaako, Jeeso wa Nazareta? U ke izirire kutu ihaya? Ni kwiizi, Njoowe yoo Ujolola we Ireeza!" ²⁵ Jeeso a va kalyimeri idimona naati, ''Tontolye u zwe mwaalyi!'' ²⁶ Luhuho lo sa jololyi ni lwa mu sohera hansi choku zwa mwaalyi ni lu lyira che lyinzwi lyinna ku iwulu. ²⁷ Vantu vonse ni vaa komokwa, mane ne ku lyi vuuza mukati kaavo ni vaati, "Chintunzi ichi? Ituto inhya ya maziimo ena he iwulu? U kalyimera inhuho imbilaala mane zi mu teeka!" ²⁸ Lyinu makande ka haakwe nne aa zuweeka mu chisi chonse che inkanda ya Galaliya. ²⁹ Chiinga vaazwa mwi isinagoge, va veeza kuinjira mu inzuvo ya Sayimoni ne Enduru, ni veena ne Jemusi ne Johani. ³⁰ Lyiinu vanyina-zala-a-Sayimoni vava lyeere ne va lwaala ifiiva, Jeeso naa lwiirwa chaavo. ³¹ A veeza, choku mu woonda che iyanza, cho ku mu vuusa; ifiiva cho kuzwa mwaalyi, mane naa taanga ku va yumbula. ³² Icho chitengu, izuva ha lye imina, ni vaa lyeta valwere kwaalyi ne va veinjirwa inhuho za madimona. ³³ Muzi mukaando onse nni weeza ku kungana ha mulyaango. ³⁴ A va siriki vunnginngi vwa vantu, va matuku a siyenesiyeni ne ku zwisa madimona mu valyi, mmi choku saa zuminina madimona ku wamba mukuti a va mwiizi. ³⁵ Ha kusasani ahulu, kusiri ku luunza, a vaa zwiiri ku seena vantu choku ka chencherera kwa teni. ³⁶ Sayimoni ne vamwi vaa veena naavo choku taanga ku musaka. ³⁷ Chinga va mu waana choku mu cho kuti, ''Zumwi ne zumwi u kaya vu kusaka." ³⁸ A vaa wambi naati, ''Tu yendere ku mizi i tu vaambene naayo, ni ka hase lyinzwi kwa teni. Nje musevezi u vani lyeeti hanu''. ³⁹ A va yendendi konse konse mwa Galaliya, naa kaya vu hasa lyinzwi mu masinagoge aavo ne ku zwisa inhuho za madimona muvalyi. ⁴⁰ Mulweere we chiseenda a veeza kwaalyi. Naa mu kuumbira naati; na fukama hansi naati, ''Choku suna kwaako, ni pange kuti ni jololye." ⁴¹ Cho kufwa inse, Jeeso naa wolola iyanza lyaakwe choku mu woonda, naa mucho, "Ni saka. Jololye." ⁴² Ho hwaaho vulyo chiseenda cho kuzwa mwaalyi, mane naa jolola. ⁴³ Jeeso naa mu lwiiririra choku koza mmi naa mu hulula kuti a yende. ⁴⁴ Naa mucho kuti "Sanzi noo uka lwiiri vantu, mmi yende, u kalyi tondeza ku mupurisiti, mane ne ku ka zwiisa ineo yo ku jolozwa kwaako kuya cha Mushe mwa va wambiriri, ku chitira vupaki ku valyi.'' ⁴⁵ Mmi iye naa yenda choku ka lwiira vantu vonse ne ku patalaza lyinzwi mmi nni kwaa manina lyinu Jeeso naa sa si woolyi ku injira mu muzi mukando na sumunukite. A va manini choo kaya vu ikala mwa wola kuva yeeyena mmi vantu aavo ni ve ikala ni veeza kwaalyi ni va kazwa kumwi ne kumwi.