¹ Paulusi, muhikana we Ireeza naalyi muporofita wa Jeeso Kirisiti che tumero ya vaantu va vasalwa ne Ireeza, ne kwiziva vusakusima vuzuminzana ne viireeza, ² che isepo yo vuhalo vusamani vwe Ireeza, ya sa cheengi, vu vwa sepiswa kuntaanzi ye nako ye ziintu zoonse. ³ Che nnako ishiyeme na toondeza lyiinzwi lyaakwe cho kuruta kuni vaheewa kuya cho tawula ye Ireeza Muhazi weetu. ⁴ Uwe Tito, mwana wo vusakusima miitumero itu kopanere. Mikoonde ne chisemo zizwa kwe Ireeza Isheetu ne Kirisiti Jeeso Muhazi weetu. ⁵ Cheeri ivaka ni vakusiyi mwa Kiriti, u woolye kuvaakanya ziintu zimwi zisana zivamanine ne kuviika vakulwana voonse veena mu muzi wumwi ne wumwi moona muni vakulayi. ⁶ Mukulwana uswanere kuvula mulandu, mukwame wo mukulwakazi umwiina, ne vaana vasepahala vasa nyaanswa cho vuhirihiri ne kusazuwa. ⁷ Kuswanere kuti muhitizi, yelyi mulawulyi we inzuvo ye Ireeza, a vulye mulandu. A siye kuva yo lihinda, ya sa hweeri kuveenga, ya sa nywi vujwara, ya salyi we inkoodo, isini muuntu we inkulo inkaando. ⁸ Mmi a kusuni vaantu, yo suni zishiyeeme, wina vuuntu, yo zimene sinte, yo laula maikuto akwe. ⁹ Yo lyiwonderer cho vusakusima vo mulaezo wuvarutwa, kuti a woolye to susuweza vamwi che ituto zishiyeme ne ku va vakanyeza vana va mukanana. ¹⁰ Mukuti kwiina vantu vaangi ve zing'ang'eri, va lyiwambira vulyo ne va ziyeza, sihulu avo vo mupato. ¹¹ Ku kulukeere kuti va zimikwa. Vasinya marapa a vaantu cho kuruta zo kuvolyerwa ziintu zifwiinsainsoni mane ziva sa lukeere kuruta. ¹² Wumwi wa vaporofita vaavo a vaati, "Va-Kritani vaantu va mapa, zivatana zivilala, vakata mane veena indiisisa." ¹³ Uuvu vupaki mbo vuniti. Chikwinavulyo, muva kalyimere ahulu, kuti vakolye mwi itumero, ¹⁴ ni vasa teeki insumo za Majuta kapa itaulo za vaantu vazwiire muvusakusima. ¹⁵ Kwa vana vajolola, ziintu zoonse zishiyeme. Mmi kwavana vafoseheere ne asazumini, ka kwiina chi shiyeeme, kono italuhanyo zaavozifosahere. ¹⁶ Va lyilwiira kuti veezi Ireeza, mmi va musampula che miteendo yavo. Va fosaheere, ka va zuwi mulao, mane ka va lyikeene kuchita muteendo wumwi ne wumwi mulotu.