¹ Lyinu ka mwiina chiipato, uwe muntu, uwe yo watula, mukuti cho watula mo zumwi u lyi watula mo naawe. Mukuti uwe yo watula u chitahaza zintu zi swana. ² Mi twiizi kuti iwatulo ye Ireeza ina cho vuniti ha i wiira havo va chita zintu zi swana neezo. ³ Mi ka mu nahene ichi, uwe muntu, yo watula avo va chita zintu zi swana neezo nangati u chita zintu zi swana. A ko ngomboswa iwatulo ye Ireeza? ⁴ Nandi u nahana ka niini che vuhumi vwe kushiyama kwaakwe, kupanishwa kwaakwe ku lyehete, ne inkuloinde kwaakwe? A ka mwiizi kuti kushiyama kwaakwe ku chitirwa ku mu twala mu kulyisola? ⁵ Mi ku ka sika ko inkuloinkukutu kweenu ne kusalyisola ha mu lyi kunganyiza vukalyi mwi izuva lyo vukalyi, icho niiri, izuva lyo kuvoniswa kwe iwatulo ishiyeme ye Ireeza. ⁶ Ka ruwere umwi ne umwi chikara chiswana che misevezi yaakwe: ⁷ kwa avo kuya chekuzwiirera, misevezi milotu vava saki kutembwa,kukutekwa, ne kusahirikana, ka vahe vuhalo vusamani. ⁸ Mi kwaavo va lyi-tata, va sa zuwi vusakusima mi va teekesa vuvilaala, vukalyi ne kukalyiha kukulu ka zi ize. ⁹ Ireeza ka lyeete vukavo ne manyando ha luhuhu lo muntu umwi ne umwi a vavi na chitahaza vuvilaala, ku mujuta ntanzi, ne ku Muherika. ¹⁰ Mi kutembwa,kukutekwa, ne ikozo ka zi izire umwi ne umwi yo chithaza kushiyama, ku mu Juta ntanzi, ne ku Muherika. ¹¹ Mukuti ka kwiina kusamaninina kwe Ireeza. ¹² Mukuti siina vungi ha vu va chiti chivi kunze lyo mulawo ka va fwe kunze lyo mulawo, ne siina vungi ha vu va chiti chivi ku lyivahana ne mulawo ka va watulwa cho mulawo. ¹³ Mukuti ka hena vazuwi vo mulawo va shiyeme havusu vew Ireeza, mi njavo va chitahaza mulawo veeti ni va shiyamiswa. ¹⁴ Mukuti Vaheedani, va seena mulawo, ha va chita kutwayera zintu zo mulawo, va, veere mulawo ku kavuhavo, nangati ka veena mulawo. ¹⁵ Cho vuti va shupa kuti misevezi e sakiwa ne mulawo e ngolyetwa mwi inkulo zaavo. Chiziyilulyi chaavo chi vaha vushupi, ne minahano yaavo eva ni va vona mulaandu kapa ku va haza ku kavuhavo ¹⁶ ne kwe Ireeza. Vulyo ka ku chitahalye mu lusuku heeti Ireeza naa watulye zilyihungwire za vantu vonse, kuya che vanzwi angu, cha Jeeso Kirisiti. ¹⁷ Kuhinda kuti u lyi sumpa Mujuta, lyi huzo ha mulawo, lyi itumere kukulu mwe Ireeza, ¹⁸ izive kusuna kwaakwe, ne kulyika zintu zi sa swani naako, ne u lawulwa ne mulawo; ¹⁹ mane kuhinda kuti u zumina kuti kavuhako u muhitizi wa vasavoni, iseri lyaavo veena mu kafifi, ²⁰ muvakanyi wa vaholo, muruti wa vawirezana, ne kuti wiina mu mulawo chiswano che kuiziva ne vuniti. ²¹ Uwe, lyinu, yo ruta umwi, a ko lyi ruti? Uwe yo chumayera kusa iva, ²² a wiva? Uwe yo wamba kusa ziyeza, a u ziyeza? Uwe yo vihera veireza vo kulyi chitira, a wivira makereke? ²³ Uwe yo lyi sangisa ko kulyinyemuna mu mulawo, a vulyira Ireza ikute che kunyansa mulawo kweenu? ²⁴ Mukuti'' izina lye Ireeza lye nyanswa mukati ka Vahedaani cheivaka lyeenu,'' siina mu ku ngolyetwa. ²⁵ Mukuti kufundwa ikavi ku mu volyera ha mu teeka mulawo, mi haiva ni mu chola mulawo, kufundwa ikavi kweenu kuva kusafundwa ikavi. ²⁶ Haiva, vulyo, muntu ya sa funditwa ikavi u chitahaza zisakahala ze mulawo, ku sa vundwa ikavi kwaakwe keeti ne ku hindwa siina kufundwa ikavi? ²⁷ Mane iye yasa vumbitwa na fundidwa ikavi keeti na mu watulye ha chitahaza mulawo? Ichi ivaka lyo kuti mu va ngolyi mingolo ne kufundwa mi mu vanyansi vo mulawo! ²⁸ Mukuti ka hena mujuta yolyi njeye kunze; nehaiva kufundwa ikavi kwiina kunze vulyo mwi inyama. ²⁹ Mi Mujuta yalyi injeye mukati, ne kufundwa ikavi injikwe inkulo, mu luhuho, insini mu mungolo. Kutembwa ko muntu wiina vulyo ka kuzwi ku vantu mi kwe Ireeza.