¹ Vakwangu-chiswisu, kusaka kwe inkulo yangu ne kukumbira kwe Ireza inji kwaavo, njikwe kuhazwa kwaavo. ² Mukuti ni shupa kaha avo kuti veena twahalyera Ireza, mi insini kuya che kwiziva. ³ Mukuti ka veezi kushiyama kwe Ireza, mane va saka ku zaaka kushiyama kwaavo. Ka hena va valyi twaalyi ku kushiyama kwe Ireza. ⁴ Mukuti Kirisiti nje kuchitahazwa kwe mulawo we kushiyama ko umwi ne umwi yo zumina. ⁵ Mukuti Mushe u ngola kaha kushiyama ku zwa ku mulawo: '' muntu yo chitahaza kushiyama kwe mulawo ka halye choku kushiyama.'' ⁶ Mi kushiyama kuzwa kwe itumero ku wamab ichi, '' sa nzi uti mu nkulo yaako, ' njeni yeeti na tantuke mwi iwulu?' ( njo kuti, ku suusa Kiristi hansi). ⁷ Mane sa nzi muti, ' njeni yeeti naa sukire mwi abasi?'' ( njo kuti, ku tantusa Kirisiti kwaavo va fwire.) ⁸ Mi u tinzi? '' Ihuko lyi vambeene nawe, mu mulomo waako ne mwi inkulo yaako.'' Nje ihuko lye itumero, lye tu hasa. ⁹ Mukuti haiva che mulomo weenu mu lyemuha Jeso niiri Simwine, ne kuzumina mwi inkulo yeenu kuti Ireza ya va mu vusa mu vafwiire, ka mu hazwa. ¹⁰ Mukuti che inkulo muntu u zuminina kushiyama, ne che mulomo u taambwiira kuhazwa. ¹¹ Mukuti mingolo iti, '' umwi ne umwi yo zumina kwaalyi keeti na swaviswa.'' ¹² Mukuti ka kwina kusaswana hakati Vujuta ne Vuherika. Mukuti Simwine yo swana nje Simwine wa vonse, mane humine ku vonse va mu sumpa. ¹³ Mukuti umwi ne umwi yo sumpa he izina lya Simwine ka vulukwa. ¹⁴ Kwiza vulye lyinu va wollye ku sumapa halyi u va seena va va zumine? Mane va woola ku zumina mwa alyi u va seena va va zuwi? Mane poona che va zuwa vulye kunze lye muchumayeri? ¹⁵ Mane mpona che va chumayera vulye, kwaande ni va tumitwa? Siina mu ku ngolyetwa, '' Kulotuhite vulye matende avo va hasa manzwi e zintu zi shiyeme!'' ¹⁶ Mi ka hena va va teeki manzwi vonse. Mukuti Isaya uti, '' Simwine, injeni ya va zumini mulayeza weetu?'' ¹⁷ Lyinu itumero izwa mu ku zuwa, ne kuzuwa che ihuko lya Kirisiti. ¹⁸ Mi niti, '' A ka hena va va zuwi?'' E, mwendi. '' Mulyumo waavo u va zwiiri mwi inkaanda yonse, ne mahuko avo ku manimani e inkaanda.'' ¹⁹ Kwizuza, niti,'' A Izirayela ka hena ivezi?'' Chentanzi Mushe uti, '' ka ni mu lyekere kwi ifufa che chi saalyi inkaanda. Che inkaanda kunze lye kuzuwiseza, ka ni mu tangwerere ku vukalyi.'' ²⁰ Ne Isaya u kuzeza mane uti, ''Ni va wanwa naavo va sena va va ni saki. Ni va viniki kwaavo va seena va va ni kumbiri.'' ²¹ Mi kwa Isirayela uti, '' Luzuva lonse ni va sikisa manza angu ku vantu vasateeki ne vakana.''