¹ Vuungi chi vuvalyiki kutoroka cho kwiichirinzana kwe ziintu zive zuzikirizwa mukati keetu, ² siina mu vava zitusiiri aavo vavati kuntaanzi niva zilyivonena cha meenso mane nekuva vahikaana ve liinzwi. ³ Mane lyinu kwaangu kuva shiyama, mukuti ni va sakisisa neenza zintu zoonse kuzwa kumatangiro, kuti ni ng'olye ziintu zishiyeeme, sihulu ziswaneere Theophilasi, ⁴ kuti wuwoolye kwiiziva vusakusima vwe ziintu zimwi zo varutwa ⁵ Mu mazuva a Heroda simwiinaa Judea kuvena mupirisita wumwi ya valyi kusumpwa Zakaria nazwa muchiraranda cha Abija; mwiihyavo Izaveta a valyi wo luzuvo lwa Aroni. ⁶ Voonse vavalyi kujolola havusu vye Ireeza, ni vaseena nangati chinyansika munzira zaavo zoonse mwiitawulo mane ne mulao wa Simwiine. ⁷ Mmi kana va veena mwaana mukuti Izaveta a valyi muumba, mane voonse chi vava zambite mazuva aavo. ⁸ Lyinu kuva chitahalyi kuti Zakaria ave havusu vye Ireeza, na teenda muteendo waakwe yo vu pirisita we chiraranda chaakwe. ⁹ Kuya kaha mulao wo kusalwa kuti wuuzu mupirisiti a ka teende hayi, iye ava salyitwa chokuravarava kuti enjire mwi tempere ya Simwiine ku kusumika insense. ¹⁰ Chinavuungi cha vaantu chiveena kuunze ni varapera che nnako yo kuhiisa insense. ¹¹ Lyinu ing'iloi lya Simwiine ni lyeeza kwaalyi ni lyaazima hembalyi yaakwe ya malyo ye katala ke insense. ¹² Zakaria chinga lyivona, na firikana, mane nejirwa lyowa. ¹³ Mmi ing'iloi nilya mucho kuti, ''Wusiye kutiya, Zakaria, mukuti itapero yaako ya zuwiika. Mwiihyenu Izaveta ka kuhuzumukire mwaana wo muswiisu. Ko muwulyike izina kuti nje Johani. ¹⁴ Ko lyitumere ne kusaanga, mmi vaangi kava lyitumerere kuzalwa kwaakwe. ¹⁵ Mukuti kaave mukaando mu meenso a Simwiine. Kaanzi na nywi iwaine kapa vujwara vukola, mmi keezuzwa cho Luhuho lu Jolola neena mwiivumu livanyina. ¹⁶ Vuungi vwa veehwa va Isiraere kava sandwiirwa kwa Simwiine Ireeza. ¹⁷ Ka yendere havusu vwa Simwiine cho luhuho ne ziho za Elija, kusandwiira inkulo zi veshaavo kuvana vaavo ne vasateeki ku veena maano oku shiyama-ku vaakanyeza Simwiine vaantu vazuwa.'' ¹⁸ Zakaria naaho ing'iloi, ''Iizi ni ziziva vulye? Mukuti ni mukulukwaame mane mwihyeetu cho kulyite.'' ¹⁹ Ing'iloi ni lyamwiitava kuti, ''Njeeme Gaburiele, yo ziima havusu vye Ireeza. Na tumwa kwiiza kwaamba naawe, kuku lyetera aa makande malotu. ²⁰ Vone! Mboo tontolye, no sawoollyi kuwaamba, mbwiita izuuva lyeeti ni zichitahalye iizi ziintu. Mukuti kana wa zumina maanzwi aangu, eeti ni ezuzirikizwa chenako yishiyeeme.'' ²¹ Lyinu vaantu vava lyiindire Zakaria. Vava komoketwa kuti ava hiindi iinako iinde mwii kererke. ²² Mmi chinga zwiira haanze, kasiwooli kuwaamba naavo. Ni valyemuha kuti wa vona iponasehero heena mwitempere. Nazwiira havusu kuwaamba cha maanza mmi na tontweere. ²³ Mmi nikwaati mazuva aakwe wo muteendo chinga amana, naya kunzuvo yaakwe. ²⁴ Mumasule aa mazuva, mwihyabo Sara chokukosola mmi mumyeezi imana iyaanza ava lyiwuungwire munzuvo. Naati, ²⁵ ''Iichi nchava nichitiri Simwiine infumwaangu chinga nilolyerera cheense kuti azwiisa iinsoni zaangu mumeenso a vaantu.'' ²⁶ Mumweezi wumana iyaanza ne munwe wumwiina, Ing'iloyi Gaburiele cho kutumwa ne Ireeza kuya kwi toropo yina mwa Galilea isuumpwa Nazareta, ²⁷ ku mukazana nalulyeya yo veerezwa ku nkosi yo suumpwa Josefa, yavalyi wo luzuvo lwa Dafita, mmi izina lyo muuzana nalulyeya nje Maria. ²⁸ Neeza haalyi namucho kuti, ''Rumere wuuwe yo jolola kuya kumamanimani! Simwiine wiina naawe.'' ²⁹ Mmi naziyereha ahulu chaa maanzwi mane ne kukomokwa kuti itumeriso nzi yiina vuti. ³⁰ Ing'iloi nalya mucho kuti, ''Wusiye kutiya, Maria, mukuti wa waana chisemo kwe Ireeza. ³¹ Vone, kolyihiinde ne kuva ne mwaana wo muswiisu. Ko suumpe iziina kuti nje 'Jeeso.' ³² Kave mukaando mane kasuumpwa kuti Mwaana Simwiine wiina Kwiwulu. Simwiine Ireeza kamuhe vusimwiine vwe isikulwe Dafita. ³³ Ka vusa ve nzuvo ya Jakobo vonse kuya kumamanimani, mmi keeti nikuve mamanimani mu muvuso waakwe.'' ^{35 34} Maria naacho ing'iloi, ''Iichi kachichitahalye vulye, mukuti kaniini ku kopana ne mukwaame?'' Ing'iloi nilya mwiitava kuti, ''Luhuho Lujolola kalukuwuumbe, ne ziho ze Ireeza wiina Kwiiwulu kazi kuwuumbe. Lyinu yo jolola yo lukeere kuzalwa kasuumpwa Mwaana we Ireeza. ³⁶ Vone, mukwaako Elizabeth naaye wukosweere mwaana wo muswiisu ³⁷ muvukulwaana.Wuunu mweezi waakwe wo kumana iyaanza ne kamwiina, avalyi kusuumpwa muumba. ³⁸ Mukuti kakwiina chikaavo kwe Ireeza.'' Maria chokuti, ''Vone, Iime nimuhikaana wo mukulwakazi wa Simwiine. Kuve vulyo chaangu kuya kaha mulaezo waako.'' Ing'iloi cho kumusiya. ³⁹ Mwawo mazuva Maria chokuhweerera kumuzi wo kwiirundu, mumuleneng'i wusumpwa Judia. ⁴⁰ Na keenjira munzuvo ya Zakaria narumerisa Elizaveta. ⁴¹ Ni kwaava kuti Elizaveta jinga zuwa Maria cho rumeresa, muhwiire yaveena mwiivumu lyaakwe cho kunyunguntika, mmi Elizaveta cho kwiizula cho Luhuho Lujolola. ⁴² Na kuwa chelyiinzwi lyiina kwiwulu naati, ''Wiina mikoonde mukati kavakulwakazi voonse, mikoonde ive mwiivumu lyaako. ⁴³ Chiinzi hakwa chitahalala kuti inyina Simwiine ave iime? ⁴⁴ Paho uvone, murumo wo kurumeresa kwaako nga weenjira mumatwi aangu, muhwiire wiina mwiivumu lyaangu wa nyunguntika nkoku saanga. ⁴⁵ Mikoonde ive yaakwe yo zumina kuti kakuve ne kwiizuzirikizwa kweezi ziintu zava lwiirwa ne Simwiine.'' ⁴⁶ Maria naati, ''Luhuho lwaangu luteemba Simwiine, ⁴⁷ mane luhuho lwaangu lulyitumeere kwe Ireeza Muhazi aangu. ⁴⁸ Mukuti a valolyi chiziimo chokuunsi cho muhikaana aake wo mukulwakazi, Mmi vone, kuzwa suunu luzuvo loonse ka lunisuumpe wiina mikoonde. ⁴⁹ Mukuti wiina Ziho ava nichitiri ziintu zikaando, izina lyaakwe lyi jolola. ⁵⁰ Iinse zakwe ziina kuva mutiya kuzwa kumatangiro kuya ku mamanimnani wo luzuvo. ⁵¹ Ava toondeza kukola cha maanza aakwe; na hasanya valyinyemuna mu mihupulo yiina munkulo zaavo. ⁵² Ava suusa vaana vava simwiine muzipura zaavo na nyemwiina kwiwulu veziziimo ziina kuunsi. ⁵³ A vaahi vafwiire inzala zilyo zishiyeeme, mmi vahumi nava vooza nivaseena chiva kweete. ⁵⁴ Ava tusa vahikaana vaakwe ma Isiraere, kuti ni vazeeze kufwiira iinse ⁵⁵ (moona mwa vacho ku vesukuleetu) kwa Aburahama ne luzuvo lwaakwe kuya kumamanimani.'' ⁵⁶ Maria avekalyi ne Elizabeta mweezi yo tatwe ncha vola kunzuvo yaakwe. ⁵⁷ Inako niya sika yo kuti Elizabeta a huzumuke mwaane mmi na huzumuka muswiisu. ⁵⁸ Vazakite naavo ne vakwaakwe ni vazuwa kuti Simwiine ava toondeza iinse zaakwe kwalyi, mmi niva saanga naaye. ⁵⁹ Ni kwaati mwiizuva lyovu 8 chikukeezwa ku kunjirika mwaana mumupato. Ni vava musumpi ''Zakaria,'' izina lyi veesi. ⁶⁰ Mmi vanyina ni veetava nivaati,' ''Nee. Mbwasumpwa Johani.'' ⁶¹ Ni vamucho kuti, '' Kakwiina nangati wumwiina muluzuvo lweenu yo sumpwa cheeri izina.'' ⁶² Ni vawaamba neesi cha maanza kuti wusaka kuti mwaane a awulyikwa iini. ⁶³ Iisi cho kukumbira ching'oliso na ng'ola kuti, ''Iziina lyaakwe nje Johani. ''Voonse vava kukomokerwa iichi. ⁶⁴ Mpohonaho kaholo kaakwe cho kwiiwuka lulyimi lwaakwe cho kusumunuka. Nawaamba ne kuteemba Ireeza. ⁶⁵ Nive zirwa lyoowa voonse vava zimbulukite. Iizi zaambo vi zezulunkana muzivaka zoonse zo kwiwulu lya Judea. ⁶⁶ Voonse vava zizuwi ni vazilyiviikira munkulo zaavo, nivaati, '' Lyinu wuuzu muhwiire kave vulye?'' Mukuti iyaanza lya Simwiine lyiveena naaye. ⁶⁷ Iisi Zakaria neezula cho Luhuho Lujolola cho kupoofita, naati, ⁶⁸ ''Kuteembwa Simwiine, Ireeza wa Isiraere, mukuti weeza kuku tusa mane chava manisa kuhazwa kwa vaantu vaakwe. ⁶⁹ Cha valyeti kuhazwa kweetu muunzuvo yo muhikaana aakwe Dafita ⁷⁰ (mwaava waambi cho tulomo twa vaporofita vajolola kuzwa kalye uukoo), ⁷¹ kuhazwa muzira zeetu ne mumaanza a voonse va tutoyete. ⁷² Ka chite iichi kutoondeza iinse kuve sukulweetu ne kuzeeza chilyikani chaakwe chijolola, ⁷³ kulyikana kwaava chiti ne isheetu Aborahama. ⁷⁴ A valyikani kutuha kuti, kusumununwa mumaanza e zira zeetu, katumuteendere nituseena lyoowa ⁷⁵ mukushiyama ne mukujolola havusu vwaakwe mazuva woonse. ⁷⁶ Eni, naawe, muhwiire, ko suumpwa muporofita wa Simwiine wiina Kwiwuulu, mukuti koyendere havusu vwa Simwiine kumuvaakanyeza iinzira, kuvaankanyeza vaantu kwiiza kwaakwe, ⁷⁷ ku vaha maano ne kuhazwa cho kuwoonderwa kwe zivi zaavo. ⁷⁸ Yiichi kachitendahalye cheevaka lye iinsee ye Ireeza, mukuti kuzwa kweezuva lyizwa kwiwuulu ka kwiize kututusa, ⁷⁹ kuverengera veena mukeerima ne veena mumunzuunde wo lufu. Ka chiite iichi kutoondeza mateende eetu munzira yechisemo.'' ⁸⁰ Mwuhwiire cho kukula na kola muluhuho, neena muunkaanda mane mbwiita izuva lyo kuvoneka muvaantu nchinga lyaasika mwa Isiraele.