¹ Ku ntaazi kuveena Liinzwi, mmi Liinzwi lyiveena ne Ireeza, mmi Liinzwi lyivalyi Ireeza. ² Wuuzu iveena ku ntaanzi ne Ireeza. ³ Ziintu zoonse zivachitwa chaakwe, mmi kuundaakwe ni kuseena ngati chimwiina zivachitwa cheeti ni chivachitwa. ^{4 5} Kwaalyi kuveena vuhalo, mmi vuhalo avalyi iseri lya vaantu. Iseri lyiminika mwi fifi, mmi iififi kana lyiva lyizuundi. ⁶ Kuveena mukwaame ya vakatumwa ne Ireeza, iziina lyaakwe avalyi nje Johani. ⁷ A veeza naalyi mushupi kwiizuzirikiza kaha iiseri, kuti voonse vawoolye kuzumina chaakwe. ⁸ Johani kana avalyi iiseri, mmi aveeza kuku shupa ze iiseri. ⁹ Iiseri lyo vusakusima, lyi minikira vaantu voonse, lyi valyi kwiiza munkaanda. ¹⁰ A veena munkaanda, mane inkaanda yiva vuumbwa chaakwe, mmi iinkaanda kana yiva mwiizivi. ¹¹ A veeza kuchaakwe, mmi chaakwe kana chiva mutambulyi. ¹² Mmi vuungi vu vamutambulyi, va vazumina mwizina lyaakwe, a vavahi maziimo wokusuumpwa vana ve Ireeza. ¹³ Aava kana vava zalwa cha malaha, kapa cho kusuna kwe inyama, kapa cho kusuna ko muuntu, kono kwe Ireeza. ¹⁴ Lyiinzwi ni lyaava iinyama ni lyeekala mukati keetu. Tuvavoni kuveera kwaake, kuveere kwaakwe wumwiina ya vakazwi kwa Tayo, ne zwiire chisemo ne vusakusima. ¹⁵ Johani ava shupi kahakwe na huwereza, naati, ''Wuuzu njeye yi Ni valyi kuwaamba chaakwe, 'Iye yo keeza mumasulye aangu mukaando ku Ni zaamba, mukuti aveeza kuvusu vwaangu.'' ¹⁶ Mukuti mukwiizula kwaakwe tuvoonse tu vatambulyi chisemo mu chishemo. ¹⁷ Mukuti mulawo wu vaheewa cha Mushe. Chisemo ne vusakusima ziveeza cha Jeeso Kirisiti. ¹⁸ Ka kwiina ya va voni Ireeza; yeyena Ireeza, wiina kumbalyi ye Iisi, ava chiti kuti Ireeza ee zivwa. ¹⁹ Wuuvu mbo vushupi vwa Johani ma-Juta chiva tumina vapirisita ne ma-Livi kukazwa ka Jerusalema kukwiiza ku kumuvuuza, ''Njowe iini lyinu?'' ²⁰ Na waamba vuniti- kana ava kanani, mmi na waamba vuniti-'' Ka heena iime Kirisiti.'' ²¹ Lyinu cho kumuvuuza, ''Lyinu njowe iini? Njowe Elija?'' Naati, ''Ka heena Ime.'' Ni vaati, ''Wu muporofita?'' Ne tava, ''Nee.'' ²² Mmi ni vamucho kuti, ''Njowe iini, kuti tuvooza ikaravo kuva ka tutuma? Lyinu wutiinzi chaako?'' ²³ Naati, ''Ni lyiinzwi, lyihuwa munkaanda: 'Kushiyamisa iinzira ya Simwiine kuti itamalalye,' ²⁴ Lyinu cho kutumina vamwi vazwa ku Mfarasi, ²⁵ cho ku muvuuza ni vamucho kuti, ''Chiinzi ho koloveza chikuti kaheena wuuwe Kirisiti kapa Elija kapa muporofita?'' ²⁶ Johani na veetava, naati, ''Ime nikoloveza cha meenzi. Mmi mukati keenu kwiina muuntu wumwi yi museezi. ²⁷ Njo nisheere mumasulye, sikakwere kee inangu ka Ni salukeere kusumununa.'' ²⁸ Iizi ziintu zivalyi kuchitwa mwa Betani kulyimwi ishiira lya Jorodani, kwa valyi kukoloveza Johani. ²⁹ Iizuva lyichirira Johani cho kuvona Jeeso nakeeza kwaalyi naati, ''Mulolye, Imberere ye Ireeza yo zwiisa zivi mu nkaanda! ³⁰ Nje wuuzu yi ni valyi kucho, 'Yi wiiza mumasulye aangu wuni zaamba, aveena havusu vwaangu.' ³¹ Kana ni va mwiizi, mmi kuveena vulyo kuti eziviiwa mwa Isiraere cho kwiiza ze ni koloveze cha meenzi.'' ³² Johani nashupa, naati, ''Na vona Luhuho lusuka siina inkwirimba luzwa kwiiwulu, mmi nilwekala helwulu lyaakwe. ³³ Kana ni va mulyemuhi, mmi iiye ya va nitumi kukoloveza cha meenzi ava nicho kuti, 'Iiye yeeti no vone Luhuho lusukira haalyi ne kwiikala, njeye yeeti na koloveza cho Luhuho Lujolola.' ³⁴ Ni vavoni zoonse mane ne kushupa kuti wuuzu njo Mwaana we Ireeza.'' ³⁵ Hape, iizuva lyiichirira, Johani cho zimene ne varutiwa vaakwe vovere, ³⁶ ni vavona Jeeso na keeza, mmi Johani naati, ''Muvone, Imberere ye Ireeza!'' ³⁷ Varutwana vaakwe vovere ni vamuzuwa na waamba vulyo lyinu cho kwichirira Jeeso. ³⁸ Lyinu Jeeso cho kuchevuka cho kuvavona va mwiichirire na vacho kuti, ''Chiinzi chi musaka?'' Ni veetava, "Rabbi" (Haisandulwa "Muruti"), "wikala kwihi?" ³⁹ Na vacho kuti, "Mwiize ze muvone." Mmi niveeza kukuvona hekala; ni vekala naaye ilyo izuva , mukuti chivalyi innako ye chiteengu. ⁴⁰ Wumwi wa vovere ya vazuwi Johani cho waamba ne chirira Jeeso avalyi nje Andiriya, mwaancha a Sayimoni Pitoroso. ⁴¹ A vatangi kuvona mukulwe Sayimoni na mucho kuti, ''Twa wana Mesiya" (Ha kutaluswa nje "Kirisiti''). ⁴² Na mulyeeta kwa Jeeso, mmi Jeeso na mulola naati, "Njowe Sayimoni mwana a Johani. Mbo kusuumpa Kefasi" (ha kutaluswa nje "Pitorosi"). ⁴³ Iizuva lichirira, Jeeso chi chosaka kuya kwa Galilea, na waana Filipo na mucho kuti, "Ni chirire." ⁴⁴ Lyinu Filipo a valyi kuzwa kwa Betisaida, mulyeneng'i wa Andiria ne Pitorosi. ⁴⁵ Filipo cho kuwaana Nataniele, na mucho kuti, " Iiye Mushe yava ng'olyi kahakwe mu mulawo, ne vaporofita, twa muwana: Jeeso mwaana wa Josefa, kwa Nazareta." ⁴⁶ Nataniele na mucho kuti, "Kwiina chiintu chilotu chizwa mwa Nazareta?" Filipo na mucho kuti, "Wiize zo vone." ⁴⁷ Jeeso chokuvona Nataniele na keeza kwaalyi nawamba kahaakwe, "Muvone, mu-Isiraele wo vusakusima, kuseena kuziyeza kwaalyi!" ⁴⁸ Nataniele na mucho kuti, ''Wu niizi vulye?" Jeeso na mwiitava naati, "Filipo naseeni kukusuumpa, Na kuvona no siina mwikoonde lye isamu lye feiga.'' ⁴⁹ Nataniele netava, "Rabbi, wu Mwaana we Ireeza! Njowe Simwiine wa Isiraele!" ⁵⁰ Jeeso na mwitava kuti naati, "Mukuti Na kucho kuti, 'Na kuvona mwiikonde lye isamu lye ifeige,' wu zumina? Mbo vone ziintu zikaando kuzaamba iizi.'' ⁵¹ Lyinu cho kuti, ''Vusakusima, vusakusima, Ni kucho kuti, ko vone yiwulu ni liwukitw, mang'iloi e Irreza na ataantuka ne kusuka hewulu lyo Mwaana wo Muuntu.''