¹ Jakobo, muhiikaana e Ireeza ne Simwiine Jeeso Kirisiti, mu mishovo iine ikumi ne toovere ihaseene: Murumere! ² Muhiinde kuti kusaangisa, vaakweetu, chimukopana ne milyiko isiyenesiyene. ³ Mwiizi kuti kulyikwa kwe itumero yeenu kulyeeta inkulyo iinde. ⁴ Musiye inkuloonde ichite muteendo wayo kuti muwoolye kuzakika ku maniine, ni musa taere chimwi. ⁵ Mmi chikuti wuumwi weenu nasaka maano, aka asake kwe Ireeza, iiye yoha che iinkulyo yoonse nasa kalyimeri vana va kumbira, mmi ka muuhe. ⁶ Mmi a kumbire cho kuzumina nasa vireeri chimi, Wumwi ne wumwi yo vireera wusawana ne suunda lyiina mwiwate lyi kaheekerwa kumwi ne kumwi ne luhuho. ⁷ Mukuti wuuzo muuntu asiye kuzeza kuti ka tambulye chimwi kwe Ireeza; ⁸ muuntu we mihupulo yo vere, wa salyisantite munzira zaakwe zoonse. ⁹ Musiye vamweetu vaseena chiveena naacho valyi teembe cha maziimo aakwe eena kwiwuulu, ¹⁰ mmi vaantu vahumine cho kuva kuunsi kwaakwe, mukuti kahite siina induva zo muunknda ziina mulyani. ¹¹ Mukuti izuva lying'atula cho kuhiisa kukaande cho kuzumisa lyaani. Induva cho kuwa, vulotu vwaazo cho kumana. Che inzira iswana, muhumi ka manine hakati ko musipiri. ¹² Veena mikoonde vaantu valyi neera kulyikwa. Mukuti hapasa mulyiko, katambulye iinkava yo vuhalo, iiva sepiswa vana vasuni Ireeza. ¹³ Kaanzi kuvi yo lyikitwa yeti cho chokuti, ''Nilyikitwa ne Ireeza,'' mukuti Ireeza ka lyikwa ne vuvilala, kapa iiye mwiine kulyika muuntu. ¹⁴ Kono muntu wumwi ne wumwi wulyikwa ne itakazo yaakwe, yimu kwiitira mukuchengererwa ne zimukoonda. ¹⁵ Lyinu hakuti itakazo chiye injiha, izaala chivi, mmi lyinu hakuti chivi chichaakula, chizaala lufu. ¹⁶ Musiye ku chengererwa, vaakwaangu vasunitwa ¹⁷ Iimpo yimwi ne yimwi ishiyeeme ni ilikeene izwa kwiwulu. Iizwa kwe Isheetu we iseri. Iiye kakwiina kusanduki siina munzuunde. ¹⁸ Ireeza cho kusuna kwaakwe ava tuhi mazaalo che lyiinzwi lyo vusakusima, kuti tu woolye kuva zihaantu zaakwe zamatangiro kuzi vumbantu zaakwe zoonse. ¹⁹ Mwiizi iichi, vakweetu musunitwa: Muntu wumwi ne wumwi a hweere kuzuwa, vunya ku kuwaamba, ne vunya ku kuveenga. ²⁰ Mukuti kuveenga ko muuntu ka kuchitahaza kushiyama kwe Ireeza. ²¹ Chikwiinavulyo zwiisa zivi zonse ne vufilala ne chivi chiingi chiingi. Mutaamulye cho vuuntu liinzwi lyivyalyitwa, lyiwoola kuhaza iihuho zeenu. ²² Muve vachiti ve lyiinzwi ising'i vazuwa vulyo, mulyiziyeza muveene. ²³ Mmi chikuti wumwi wuzuwa vulyo liinzwi mmi na sachiti, wuswana ne muuntu yo lolyete chifateho chaakwe muchiimponi. ²⁴ Wu lola chifatuho chaakwe kuzwaaho chovuheeru chokuzivala cha vona. ²⁵ Mmi muuntu yo lola neenza mulawo wushiyeeme wo kusumunuka, cho kuzwiira havusu, nasalyi vulyo kuzuwa cho kuzivala, wuuzu muuntu ka ve ne mikoonde mu kuchita kwaakwe. ²⁶ Mmi yo zeza kuti murumeri nasa lawulyi lulyimi lwaakwe, wu ziyeza inkulyo yaakwe mane chirumeri chaakwe kachiina ituso. ²⁷ Iitumero iishiyeeme nje isa sinyehete havusu vwe Ireeza Iisheetu nko kutusa vaseena ve shaavo ne vazike vasukulukite, ne ku lyitokomera muunkanda yisinyehete.