¹ Mukulwana ku musunwa Gayusi, Inisuni chovusakusima. ² Musunwa, nirapera kuti uwolye kuzwira havusi muzintu zonse, mane mavuko ako alingane. Moona luhuho lwako mululyisantite. ³ Mmi nivasangi ahulu, vamwaako chingaveeza kuha vupaki kaha vusakusima vwaako, moona moyenda muvusakusima. ⁴ Ka nina kusanga kuzamba uku, kuzuwa kuti baana vaangu bayenda chovusakusima. ⁵ Musunwa, uchita chovusakusima cho chitira vamwaako mane ne vasazi, ⁶ vavavi vashupi che irato lyako havusu bye kereke. Uchita neenza kuvatumina mumusipiri uswanere munzira ishiyeme ye Ireza, ⁷ nkokuti ivalyi chevaka lye izina chingi vavayendi ni vasahindite chimwi ku Malyichava. ⁸ Lyinuaha tulukera kutambula vaswana naava, kuti tuwolye kutendisana naavo chovusakusima. ⁹ Ni vang'olyri ikekereke, kono Dioterefesi yo suni kulyihisa kuvamwi katutambulyi. ¹⁰ Lyinuaho, chikuti niniza kanize zenimilyire mitendo yakwe yachita, maanzwi mavilala atuwamba asashiyeme. Kusalyitumerera izi zintu, iyemwiine ka tambulyi vamwaakwe. U viinda vana vasaka kuchita vulyo mane uva hindika ne mwikereke. ¹¹ Basunwa, musiye kuziya zivilala mmi muziye zishiyeme. Iye yochita vulotu ngwe Ireeza; yochita vuvilala keeni kuvona Ireeza. ¹² Demitiriyasi uwambwa vulotu ne voonse mmi uvo mbovusakusima. Uswe naswe tuha vusakusima kahakwe, mmi mwiizi kuti vupaki bweetu vusakusima. ¹³ Nina zintu ziingi zinisaka kuming'olyera. Kanisuni kuziming'olyera che ipene ne iyenge. ¹⁴ Kono nisaka kumivona chovuhweeru, mmi katuwambe nitulyilyete mumenso. ¹⁵ Ikozo ive naawe. Bamweetu vakurumeresa. Urumeresa vamweetu chamazina aavo.