¹ Kuzwa kubahitiri ne mukulwakazi yo salyitwa ne vanabakwe, inisuni chobuniti- isini Ime bulyo, kono naabo boonse beezi vusakusima - ² chebaaka lyo busakusima bwiina kweetu mmi kavushalye naaswe kuya mamanimani. ³ Chishemo chive nanwe, nense, ne kushiyama kuzwa kwe Ireeza Tayo ne kwa Jeso Kirisiti, Mwaana a Tayo, muvusakusima ne irato. ⁴ Nilyitumera ahulu kuwana bwamwi va vaana vaako vasiyenda mwitumero, moona mutuvatambulyi itaero kwe Isheetu. ⁵ Hanu nikukumbira, mukulwakazi- kahena kuti ni kung'olyera itaulo inhya, kono ituvavi nayo kuzwa kumatangiro- yokuti tulukere kulyisuna. ⁶ Mmi ichi nje kulisuna kuti tuyende che milao yakwe. Iyi nje taulo, moona mumuvazuwi kumatangiro, kuti tuyenda chayo. ⁷ Mukuti vachingi vaangi chivavayendi mukanda, mmi kavawambi kuti Jesu Kirisiti aveza munyama. Winavulyo muchengi mane mu antikirisiti. ⁸ Milyilolye muvonse, kuti musiye kuzoverwa zintu zituvatenderi, kono kuti tuwolye ku heewa ineo izwiire. ⁹ Wumwinowumwi yo zwiire munzira yasayendi chetuto za Kirisiti keena Ireeza. Mmi iwikala mwiituto, uzu wiina bonse Tayo ne Mwaana. ¹⁰ Chokuti umwi wiiza kwako nasalyeti iyi tuto, usiye kumutambula munzuvo yako mane usiye kumurumeresa. ¹¹ Mukuti yomurumeresa ukopenera naye mitendo yakwe ye chibi. ¹² Nina zintu zingi zinisaka ku kung'olyera, mmi kanisuni kuzing'ola che pampiri ne yenge. Ngati kwiinabulyo, nisaka kwiiza zetuwambinsane menso chamenso, kuti kusanga kwetu kumaninine. ¹³ Vaana vanchizyako yolyisalyirwa vakurumeresa.