¹ Paulosi, muapositola wa Kirisiti Jeeso kuya che Taulo ye Ireeza Simwiine ne Kirisiti Jeeso isepo yeetu, ² Timoti, mwaana wo vusakusima mwiitumero: Chishemo, iinse, ne ikozo izwa kwe Ireeza Isheetu ne Kirisiti Jeeso Simwiine weetu. ³ Moona mu ni va mikuumbiri chi nikaya kwa Makedonia, mushalye mwa Efesasi kuti muwoolye kulyemusa vamwi vaantu kuti kaanzi varuti ivangelyi isalyi njooyo. ⁴ Nangati kuteeka makande ne luzuvo lusamani. Iizi zilyeta iinkaani kuunda a maikaerero e Ireeza, ee tumero. ⁵ Lyinu maikaerero wo mulawo iirato kuzwa munkulo ijolola, mu maikuto a shiyeeme, ne itumero imaniniine. ⁶ Vamwi vaantu vachi vava zovi mweenzi ziintu mane chiva vasanduki vaantu valyiwambira ziseena ituso. ⁷ Va saka kuva varuti vo mulao, mmi nivasa zuwiseza zi vawaamba kapa kwi zuzirikiza cho vuniti. ⁸ Mmi twiizi kuti mulawo wushiyeeme chi wuteendeswa neenza. ⁹ Twiizi kuti, mulawo ka wuchitiirwa vaantu vashiyeeme, kono ngwa valuuta mulawo ne vaantu vasazuwi, ne vaantu vasa tiyi Ireeza ne valewuhi, ne vasi mikwa mivi ne vanyaansa, vana vehaya ve shaavo ne vanyinaavo, ne vehaya, ¹⁰ ne vaantu va mahuulye , ne valyisesa mukuswana, ne veeva vaantu kuvachita vahiikaana, vasimapa, vashupa za mapa, ne chimwi ne chimwi chikananisa ituto zo vusakusima. ¹¹ Chi chirutwabne ivangeri iverenga ye mikoonde yo kuteembwa kwe Ireeza iiyo yi ni vaheewa. ¹² Ni lyitumera kwa Kirisiti Jeeso Simwiine weetu. A va nikoza, mikuti ava ni hiindi kuti niina itumero, mane naani salyira mu musevezi. ¹³ Ni valyi kushuta, ni ni sukulula, mane ne kukataza. Mmi ni va zuwiirwa vutuku mukuti ni valyi kuzichita mukusaazumina. ¹⁴ Mmi chishemo cha Simwiine weetu chivenjihi ahulu che itumero ne irato lyiina kwa Kirisiti Jeeso. ¹⁵ Wuuwu mulayezo wu sepahala mane wulukera kutambulwa, kuti Kirisiti Jeeso a veeza munkaanda kwiiza kuhaza valewuhi, munilyi ni simwiine. ¹⁶ Mmi cheri ivaka ni va zuwirwa vutuku, kuti chaangu, simwiine chivi, Kirisiti Jeeso awoolye kutoondeza inkuloonde yoose. A va chiti vulyo kuti ive mutala kwa vana voonse veeti niva muzumine mu vuhalo vusaamani. ¹⁷ Hanu kwa simwiine ya samani, ya safwi, ya sa vonwa, Ireeza yeyena, a kutekwa kuya kwiire ne mamanimani. Ameni. ¹⁸ Ni viika iiyi kupo havusu vwaako, Timoti, mwanaangu, kuya che chiporofita chi vawaamba chaako, kuti wu woola kulwa iinkoondo indootu, ¹⁹ ku woonderera itumero ne chihakululyi chishiyeeme. Kukaana iichi, vamwi va veetikiza itumero zaavo, ²⁰ Va swana ne Himaniasi ne Alekizanda, va nivahi Satani kuti varutwa kusa nyaansa.