¹ Paulusi, Siluvanasi, ne Timoti kwi ikereke ya Matesolonia mwe Ireeza Isheetu ne Simwiine Jeeso Kirisiti. Mikoonde ne ikozo zive naanwe. ² Innako zoonse tulyitumera kwe Ireeza cheenu muvoonse chitu misumpola mirapero zeetu. ³ Tu zeeza havusu vwe Ireeza ne Isheetu muteendo yeenu ye itumero, kuteenda che irato, inkulo iinde ne kulyi neera che isepo kwa Simwiine weetu Jeeso Kirisiti. ⁴ Vaakweetu musunitwa neIreeza, twiizi kuti ava musalyi ⁵ mukuti ivangeri yeetu iveeza kweenu ising'i che lyiinzwi vulyo, mmi ne che ziho, cho Luhuho Lujolola, mane che isepo. Che iinzira iswana, naanwe mwiizi kuti tuvaantu tuveena vulye che vaka lyeenu. ⁶ Muvaavi valyikanyisa wuuse ne Simwiine chi mutaambula lyiinzwi che injira yo kusululwa ni mulyi tumeere cho Luhuho Lujolola. ⁷ Chikwiina vulyo, mu vaavi vashupi kuvoonse vavalyi kuzumina mwa Makedonia ne Achia ⁸ Mukuti cheenu lyiinzwi lya Simwiine lyiva zuwiiki kuunze, ising'i vulyo mwa Makedonia ne Achia, kono itumero yeenu kwe Ireeza ivezulyinkni kumwi ne kumwi. ⁹ Chikwiina vulyo katulukeere kuwaamba chimwi kahaayo. Mukuti aavo veene kuwaamba kwaavo cheetu ne muva va tutambulyi kuvalyi, ne mumuva zookeri kwe Ireeza kuzwa ku veireeza veenu ne ku teendera Ireeza wo vusakusima, ¹⁰ ne kulyindira Mwaane kuzwa kwiiwulu, yava vuusa kuva fwiire -Jeeso, yo tuhaluza kuvuvi vukeeza.