¹ Pitorosi, mu apositoloyi wa Jeeso Kirisiti, ku vapoti va va haseene, va va salyitwa, koonse vulyo kwa Pontasi, Galashiya, Kapadoshiya, Eshiya, nne Bitiniya. ² Iichi kuya che izivo inkaando ye Ireeza Taayo, yi viikiirwa he imbalyi nne luhuho choku zuwa mane nne ku saanseera kwa malaha a Jeeso Kirisiti. A inse ive kweenu, mane nne ikozo yeenu yi injihe. ³ A Ireeza nne Taayo wa simwiine weetu Jeeso Kirisiti ave nne mikoonde. Mu inse zaakwe inkaando, a va tuhi mazaalo mahiya oku sepahala o vuswa. Uuvu vuswa mvoku vuuka kwa Jeesu Kirisiti ku vafwiire. ⁴ Iichi ncho vuswa vu seeti nni vu mane, vu seeti nni vuve nne ikwe, kavu keeza kuku hita. Muvu viikiirwa ku iwulu. ⁵ Mu vavalyeerwa che ziho ze Ireeza che itumero, kuya cho kuhazwa kweeti nni ku toondezwa cho kuwheera mu inako za mamanimani. ⁶ Mu sangiire iichi, mane nangati hanu ku lukere kuti mulyi zuwe vuvilaala mu vukaavo vungivungi. ⁷ Iichi chi tondeza ku lyikwa kwe itumero yeeno, iduura ku zamba igauda i mana, nangati yi lyikwa cho mulyiro. Iichi chi chitahala kuti itumero yeenu nni yi waanike yiina nne kutembwa, kuverenga nne ku kutekwa mu kuvoneeka kwa Jeeso Kirisiti. ⁸ Ka mwiini ku muvona, mi mu musoni. Ka mwiini ku muvona hanu, mmi mu zumina mwaalyi mane mu sanga cho kusanga ku jolola ku saa woolyi ku wambika. ⁹ Hanu kweete mulyi tambwiira ze itumero yeeno, ku hazwa kwe inhuho zeenu. ¹⁰ Vaporofita vava sakiseza nne ku vuuza kuinjiriri kuya cho uuku ku hazwa, kaha chisemo chi keeza kuva cheenu. ¹¹ Va va sakisisa ku iziva kuti njeeni mane nne kuti luhuho lwa Kirisiti lu vaalyi ku waamba naavo lyiiri. Iichi chi vaalyi ku chitahala cha vaalyi kuva lwiira kuvusu cha masukuluka a Jeeso mane nne ku vereenga che zintu zi vaalyi ku ichirira. ¹² Va va tondezwa kuti ka heena va vaalyi kulyi tendera, mbwiita iiri uunwe, chiva vaalyi ku mulwiira zintu zi chiita kuti hanu kete muzi lwiirwa naavo va vaalyi ku kutaza mulaeza cho luhoho lujolola lu kazwa ku iwulu-zintu zi chita kuti nne mangiloyi a zilakamina. ¹³ Lyiinu hanu mu zaatike mihupulo ye ingana zeenu. Mu twaahalye. Mu viike isepo mu chishemo chi mu ka lyeterwa mu ku voneka kwa Jeeso Kirisiti. ¹⁴ Siina mu mulyi mu vaana va teeka, mu siye ku hala siina mu mu vaalyi ku hala choku shaalyira itakazo cho kulyi tokomolosa. ¹⁵ Mu kuti ya va mu sumpi u jolola, naanwe, mu jololye mu kulyi wonda kwenu konse. ¹⁶ Mmi ku ngolyetwa kuti,''Mu jololye, mu kuti naame nni jolola. ¹⁷ ''Mmi ha mu sumpa ''Taayo'' iye yo u watula naa seena ku ketulula mu musevezi wo zumwi no zumwi, mu tendesa chivaka cho lweendo lweenu mu ku kuteka. ¹⁸ Mu izi kuti ka heena mu vaa hululwa che isilifera nandi igauda i wanjumuka mu kulyi woonda ko vuholo ku mu valyi tuti ku veisheenu. ¹⁹ Mmi mu vaa lukululwa cha malaha malotu a Jeeso kirisiti, yaa vaalyi ku swana ne imberere e seena vuholye nandi vuvilaala. ²⁰ Kirisiti a vaa salwa inu inkanda ne iseeni ku vumbwa, lyiinu hanu chaa a va tondezwa mweenu mwe izinu inako za mamanimani. ²¹ Chaakwe mu zumina mwe Ireeza, yaa va mu vuusa mu vafwiire mane kwaalyi choku muha ku verennga kuti itumero nne ku sepa kweenu zive mwe Ireeza. ²² Mu vaa joloza inhuho zeenu cho ku chitahaza vusakusima. ichi i vaalyi che ivaka lyo ku halyinsaana che chisemo chi tamalyeere, lyinu mu lyi sune cho vuniti ni ku zwa mukati ke inkulo zeenu. ²³ Mu vaa zaalwa chihya, ne isaalyi cho lutanga lu mana, mmi neeri cho lutanga lusa mani,che lyinzwi lyi hala mane ne lyi saa hiti lye Ireeza. ²⁴ Mmi ''inyama yonse i swana ne lyaani, mane ne ku vereenga kwaayo ku swana ne nduva ye lyaani. Lyaani lyi zuma, ne nduva i zuma cho ku wa, ²⁵ mmi lyinzwi lya Simwiine lyi ikalyiriire. ''Anu nga manzwi malotu a mu vaa lwiirwa.