¹ Wayah iti,pulaksanai-pulaksanai,kami kakan kayo karasa anugrah Allah sa haot na ami napot jemaat-jemaat ta Makedonia, ² bahwa huang ajoh e ujian ka rara,ka labihan kasuka nihi ka hante e kasusah here haot bakalabih huang katatau atei here. ³ Kuki basaksi bahwa here ngami susuk nihi kamampu here,bahkan labih tekei kemampuan e entu kerelaan here kakareb. ⁴ Here lako tuu napot kami mat anugerah mat umma ngalap bagian huang pelayanan ulun-ulun kudus. ⁵ Balalu,itilah sa naulah here,bakoi sameh sa na harap kami,ka isa-isa,here ngami tekei here kakareb napot Allah,udi hio napot kami ulah aheng Allah. ⁶ Jari,kami nggasak Titus,sameh awe aye haot mamulai e,sameh hio lei aye sagar nyanyari gawian anugrah iti ta helang kaon. ⁷ Tapi,sameh nihi kayo ba kalabihan huang kaluhan hal,huang iman,paneran,pangarasa,kaluhan usaha,balalu huang kasih nu nadap kami,aheng e kayo lei balabihan huang anugrah iti. ⁸ kuki bakoi ngantuh hal iti jari perintah,tapi mat menguji nangkah katuu an ulun lain gene ka iklasan kasih nu. ⁹ Gene,kayo karasa anugrah Tuhan takam Yesus Kristus,bahwa biar pun Aye tatau,Aye rela jari susah demi kayo mat nangkah ka susah E,kayo jari tatau. ¹⁰ Balalu,huang hal iti kuki ngami pendapatku,hal iti aye hio mat ka untungan nu,sa nekei taun ari,kayo bakoi ekat ngulah e,tapi lei ba aheng mat ngulah e. ¹¹ Jari,wayah iti,sanyari bo lei gawian hio mat sepadan nihi kerelaan nu mat nyanyari inon sa naan tangar kayo. ¹² Gene,amun naan kasiapan ngami,pangamian hio na tarime,berdasarkan inon sa naan ampun erang kulun,balalu bakoi berdasarkan inon sa bakoi naan ampun aye. ¹³ Hal iti bakoi mat nampa nean ulun lain balalu ngabeban gi kayo,tapi mat naan keseimbangan. ¹⁴ elah bo kalabihan nu wayah iti nyansukup kakurangan here mat kalabihan here udi hio nyansukup kakurangan kayo.nihi sameh hio naan keseimbangan. ¹⁵ sameh sa tatulis huang kitab suci,"ulun sa ngumpul ajoh,bakoi balabihan balalu ulun sa ngumpul doho,bakoi kakurangan."Pangutusan Titus ¹⁶ Tapi,sukur napot Allah sa nagndak atei Titus babujur sa sameh nihi sa ta kuki napot kayo. ¹⁷ Gene,aye bakoi ekat narime anjuran kami,tapi nihi sabujur-bujur e sa hante,aye hawi napot kayo nihi aheng e kakareb. ¹⁸ Hayak Titus,kami mangutus pulaksanai sa na puji-puji ta helang kaluhan jemaat huang hal pemberitaan Injil. ¹⁹ Bakoi ekat hio lei,aye lei na tutui ulah jemaat-jemaat mat tulak hayak kami huang pelayanan anugerah iti,sa na ulah kami mat nunda kemuliaan napot Tuhan nihi mat nutui kerelaan kami. ²⁰ kami ba hati-hati tuu mat bakoi naan ulun sa mawarah kami huang hal huang pangamian hante sa na atur kami iti. ²¹ kami bausaha ngulah inon sa wuah,bakoi ekat huang pangini Tuhan,tapi lei huang pangini murunsia. ²² Balalu,hayak here,kami mangutus pulaksanai kami sa haot gaha na uji kami balalu tabukti rajin huang ajoh hal,labih lagi wayah iti aye magin rajin gene aye naan keyakinan sa hante napot kayo. ²³ wayah iti gene Titus,aye aye hio pasangan palus hengau gawi ku sa sagar ba manfaat napot kayo.balalu gene pulaksanai-pulaksanai takam sa lain,here utusan jemaat-jemaat,isa kemuliaan napot Kristus. ²⁴ Jari,tutui bo napot here,ta hadap jemaat-jemaat,bukti kasih nu nihi kebanggan kami entu kayo.