¹ Muomu lievi ange Paulu nji muka kamenga ua Yesu Kilistu muliyeni vaka vifuti. ² Ange njina vitambula nguange ngechi mo munovu ange va njihana chipanga cha kavumbi ka Kalunga muomu lieni. ³ Ange nji mi thonena ngue mukunji jomboluela vio. Vuno vuchili vua kushueketha kulihungu eli linji mithonena eni. ⁴ Nga mu vitanda evi, nga muvi dhivuka nga mumona vuchili vua kushueketha muli Kilistu. ⁵ Mumemo amo vuchili kovua vudhivukile kuvana vavo. Vunoni vavi jombolola ha mpundhi yakujela ku vapostolo nava polofeto vava hanguilile ku vipanga viendi. ⁶ Lihungu eli lia vuchili ovu ngualio vakua vifuti navo vasuana, navo lalo vamo vamuvila, navo vana vathseleletha muli Yesu Kilistu kuhitila mu mudhimbu ua chili. ⁷ Ange nji ngamba ua mudhimbu ua chili ua vuana vua Kalunga vua kavumbi ka hanene Kalunga kuhitila mu vipanga via ndhili yendi. ⁸ Kuli ange ko nambe movandji haka muntu ua ku kotokela kuvantu va Kalunga vakujela. Aka kavumbi vaka nji hanako. Muku ambuluila vaka vifuti vije kuva thetelele vufuko vua Kilistu, ⁹ linga nji nehe cheke ku nkala uoshe kuneha chiyongola chendi nalihungu valishuekel muli Kalunga ou ua pangele viuma vioshe. ¹⁰ Linga ngechije mangana aje Kalunga aku fua muamona muamo alanguluke kumbunga ku vuMuene ha vukama vuli muili. ¹¹ Evi via kele kushuama ku vutumbe vua yaye vuje vua puithilemo muli Yesu Kilistu Muene uetu. ¹² Muli Kilistu tuli na kuthimpa keho tuatha ku kovela ko naku dhambula omo tuna mu thselela. ¹³ Mukemo tumi kandelela ngechi je keti muhone mukonda lia tuyando tunji mona ange omo lieni, vukevuo vumpahu vueni. ¹⁴ Omo viuma evi nji thsikama ku mavuli ange kuli Tata, ¹⁵ muli ikeye mishovo yoshe ya muilu neyi yahamavu ina tambula madhina ayo. ¹⁶ Nji kandelela linga ikeye a hane kuli eni ngue ku vukama vua vumpahu vuendi, linga eni mu kole na ndhili ha Mpundhi yendi ya chili yije ili muli yeni. ¹⁷ Njilomba Kilistu akale mu vimbunge vieni haku thselela: linga eni mu soke midhi namu kulitungitha mu chilemo chendi, ¹⁸ muku kanyama muku dhivuka hamo navoshe vaka kujela voshe ngue vati muchi kapua muvuihi namu vulahe na muvulahe vua kuilu na mukulova, ¹⁹ naku dhivuka kuyongola cha Kilistu china tuvakana chidhivukitho, linga mushule na kuheta ku kushula choshe cha Kalunga. ²⁰ Mualolo kuli uje ahatha kulinga muaku tuvakana navua-navua mukutuvakana vioshe vije vitulomba, nevi vitu thinganieka, ngue kundhili ije ipanga mukati ketu, ²¹ kuli ikeye kukale ku vuaha mu mbunga mungeleka namuli Kilistu Yesu kuvikota namemo oshe akumiaka ya yaye. Amen.