¹ Paulu, kapostolu ua Kilistu Yesu, ngue ku chiyongola cha Kalunga, vantu vakujela muli Kalunga vali ku Efeso, ava vali naku tu thselela muli Yesu Kilistu. ² Mu Efeso, kavumbi ka kale neni na chiyulo cha kutunda kuli Kalunga Tatetu a kuli Muene Yesu Kilistu. ³ Vamushangale Kalunga na Yishe ya Muene yetu Yesu Kilistu, ou ua tuvedhikitha na vioshe vivedhikitho via Mpundhi yachili mu mihela ya muilu muli Kilistu. ⁴ Kalunga uatu hanguile muli yikeye te nolo vatange mavu, linga tukale vakua kujela, nava kua ku jeneka kapenga kumesho endi mu chilemo. ⁵ Mu chilemo Kalunga uatu hanguile, uatu vandakana mukutu haka muli munendi Yesu Kilistu, kutuala haku shangala chachili ku vipanga viendi. ⁶ Linga chishangale kakodhi ka kavumbi kendi kakeko natu vuedhelelako, hali Ou ya yongola. ⁷ Muli Yesu Kilistu tu novoka mu maninga endi naku tuechela kuku vihitha chetu, ngue ku vufuko vua kavumbi kendi. ⁸ Ikeyee ua vuedhelela kavumbi kendi kuli yetu namana oshe linga tuidhivithe. ⁹ Kalunga na tuidhivitha via kushueketha via ku ciyongola cendi, kutuala kuli evi via yonguele, nevi via lekethele muli Kilistu, ¹⁰ na kumona ca vitumbika mukushula ca nthimbu, mu ku neha vimantu vioshe hamo, vioshe vimantu via muilu nahano hanthi, muinthi lia mutue umo, nambe Kilistu. ¹¹ Muli Kilistu vana tuhangula ngue vashuana. Vatu hanguile kulutue lua nthimbu kushuama ku vidhango vio uje aka panga vioshe kushuama ku cidhango cendi. ¹² Kalunga uatu hanguile vashuana linga etu, vaje vakulivanga kuthelele muli Kilistu, tuka kala vakushangala ku vumpahu vuendi. ¹³ Muli Kilistu, neni luhua, omo mumuovuile lijui lia vushunga, mudhimbu ua kuovoka ceni, muetavele muli yendi keho vami vandakanene na mpundhi yacili, yije ya litavathano, ¹⁴ yije yikeyo lukulahetho luetu lua kushuana noho tukawane kukupala mpundu, kuvishangala via kavumbi kendi. ¹⁵ Mukemuo ange kutunda honjovuile viaku tuala kukuthselela cheni muli Muene Yesu na mukuyongola chendi kuvantu voshe vakujela vaKalunga. ¹⁶ Ko nja likelele kumi shangala kuli Kalunga muku mitumbula na muvi vundilo. ¹⁷ Nji vundila nga chije Kalunga ua Muene uetu Yesu Kilistu, Yishe ya vumpahu ami hana Mpundhi yamana na kujombolola mumana endi. ¹⁸ Nji vundilanga chije nguange mesho a vimbunge vieni linga atue cheke, ngue mu muna dhivuka ku tatelela cha vije uami tuamenene muhete kuvumpahu vua vusuana vuendi muli vantu vendi vakujela. ¹⁹ Muvi vundilo viange njina milombela muidhive ndhili yendi yakama kuli yetu, vakua kutava kutuala kuvipanga via ndhili yendi. ²⁰ Eyi ikeyo ndhili yapangethele Kalunga muli Kilistu haku mu hindula ku kuthsa nakumu tumbika ku livoko liendi lia chilio mu mihela ya muilu. ²¹ Ua tumbikile Kilistu helu lia mashiko oshe na lijui lia lishiko na ndhili na mishovo yoshe na lidhina nkala eli vatumbula Kilistu atuamenena, miaka ino na miaka yakulutue. ²² Kalunga ua haka vimantu vioshe kuinthi lia Kilistu naku muhana kungeleka, linga akale mutue ua ngeleka. ²³ Ngeleka muvila uendi, kushula chendi cha shulitha vioshe na kuoshe.