¹ Paghulusi, mupika waNyambi no Apostoli waJesusi Kristusi pamatawero gho hanu waNyambi awa hapwa kutorora no ghudimuki ghoghushemwa nomatawero agha hatawa mughunya no, ² makurupero gho moyo ghororuheya ghaNyambi, gho kupira kwangera, gha toyedhere kughutho gho maruvedhe ghomaheya. ³ Paruvedhe ro ghuhunga ghahokore nando dhendi kupitera mukuyuvitha omu hani kurupera kukutha marawero ghaNyambi mushuturi wetu. ⁴ KwaTitusi, mwana ghoshemwa mumatawero ghetu gho kukupitura. Thinyeke nothiraro thaNyambi wihe naJesusi Kristusi mushuturi wetu. ⁵ Pamurandu gho thitambo thi namuthiyire muCrete, omu shomukone kutura yinu mughuhunga yirongame oku mbadi yina pwererera nokukutekera hakuru mukehe thitata thika kenge namurawere. ⁶ Mukuru ghakona kupira maharwero, katughuru oyu ghakara nombuyama wendi ghofotji,nohanuke ghoghutawedhi mbadi hawarundera kuyipara yoyimango endi kupira dikuto. ⁷ Yaroghera thikuma mupiterithi ghomukuru ngeshi mupiterithi ghondhugho dhaNyambi, ghapire kukara nomaharwero, mbadi ghakona kukara mumango, mbadi kupata wangu, mbadi kuhaka marovu, mbadi mukakuhaka masherenyi no mbadi katughuru ghoghumu. ⁸ Ene ghakona kukara mukakughamwena no mushere kuyinu yoyiwa. Ghakona kughayara thiwana, ghuhungami, mukakupongoka no kukona kukukunga thinda. ⁹ Ghakona kukwaterera thikuma kumbudhi dhomakurupero edhi ha hongire, podigho eshi gha kakone katjokedha ghumweya noyihonga yoyiwa no kuroghuthwera awa ghakumukanana. ¹⁰ Hakara hanu ghohengi awa hemanganyena miragho, hakara gho kughamba yonyaranyara nohaka kwangera thikumenenapa ha kukukena. ¹¹ Yaroghera eshi ngo kuhashaghekitha. Awo kuna kupatitha diko dyodiheya pakuhonga yokufitha honyi eyi yaroghera eshi mbadi ghayihonge. ¹² Muporofita ghumweya ghopapawo ghaghambire eshi,''Ghakambudhi awa roruheya kwangera,ghayi thikuma, hakakahoma ghoghuva.'' ¹³ Thighamba thi thidi mughushemwa. Podigho eshi, muwaroghuthure thikuma, podigho eshi ghayuveke mumatawero, ¹⁴ mbadi kupakera thinga kumathimwethimwe gha waJuda endi kumarawero ghawanu awa gha shwagha kughushemwa. ¹⁵ Kowa hakushuka,yinu yoyiheya yakushuka. Ene kowa hayipa no kupira matawero, mbadiko yokukushuka, ene maghano ghawo ghomaheya ghayipa. ¹⁶ Awo kughamba eshi hadimuka Nyambi ene kumukanana muyitenda yawo. Awo hayi, mbadi wakukutha muragho, no mbadiko ngcamu dhokutenda yirughana yoyiwa.