¹ Jesusighayendire panunda dhotembeli no ghayendire ndhira dhendi. Hakathishongero wendi heyire kukwendi mukuna neya kukwendi dikuma dyotembeli. ² Ene ghawahuthire no kughamba kukwagho,''Kadi mwakumona yinu yoyiheyi? Ghushemwa nakumutongwera, kadiko diwe di hakuthiya padimwe edi hakudhira kumbindumuna.'' ³ Oku ghana hungumana padirundu dyaOlive,hakathishongero wendi heyire no kughamba,''Tutongwere, munye yakuhokoka yinu yi? Yidimukitho munye yakukarapo pamwiyero ghoye no kughuhura?'' ⁴ Jesusi ghawahuthire no kughamba,''Mutakamithe eshi kadiko yu shamupemukithe. ⁵ Hengi hakwiya mudina dyange. Nanyi hakughambe,'Ame ne yame Kristusi,' no nanyi yakuyongarithe hengi. ⁶ Nanyi mwakuyuve yita. Mwakukudhekera, eyi yinu ne yakona kuhokoka; ende ghuhura ne shime. ⁷ Matunga nanyi ghakukwimanganyene, no ghufumu no ghufumu. Nanyikwakukare ndhara no kukunyunga ko muve mumango ghokukuthiyathiya. ⁸ Ene yoyyihe yine ghomatangero gho maretero gho tjitju. ⁹ Nanyi hakumutape no kumupagha. Nanyi hakumunyeke matunga ghmahe pamurandu ghodina dyange. ¹⁰ Hengi hakuyapa, no kukrwitha hamweya nokunyenga hamweya. ¹¹ Thingi tho haporofeta hombango nanyi hakwimane no kuyongaritha hamweya. ¹² Pamurandu kupira muragho nanyi kwakwingipe, kuhaka kohengi nanyi kwakukure noghutenda. ¹³ Ene yu ghakudhidhimeka kate kughuhura nanyi ghakumukunge. ¹⁴ Edhi mbudhi ghoghufumu nanyi hakudhiyuvithe mukaye kokahe no makutapo mumatunga ghomahe. No ghuhura ghowakwiye. ¹⁵ ''Podigho, apa mwakumona matjorero no makuyakunukero, eyi ghaghambire Daniel gho muporofeta, wimana mudyango dyokupongoka''(ninge mukakutoya ghatjwathane), ¹⁶ ''Ninge wa hadi muJudea hatjirere kumarundu, ¹⁷ ninge yu ghadi mukuru gho dighumbo kadi ghayende no kashimba keheyino mundhugho, ¹⁸ no muninge oyu ghadi mudipya kadi ghahuke ghakashimbe viri dhendi. ¹⁹ Ene ghupata kowo hadi no hanuke nowa hana kuyamweka hanuke mayuwa gho! ²⁰ Muraperere eshi yinu yi kadi yakuhokoke pakufu endi muMapeghu. ²¹ Ngo nanyi ghakukare makwirero, yira yi yapirire kumatangero gho kaye kate popano, ka, endi karo. ²² Shimengwa ogho mayuwa ne hakughafupipithe, kadiko nyama edhi hakukunga. Ene pamurandu gho kutorora mayuwa gho nanyi ghaku ghafupipithe. ²³ Ngeshi kehheyuno haghamba,'Kenge, pano ne Kristusi!' endi,'Oyo ne yo Kristusi!' kadi muyitawe. ²⁴ Kwa Kristusi gho mbudhi no haporofeta hombango nanyi hakwiye no kuna neghedha yineghedha no yitetukitha, podiyo hamuyongarithe, ngeshi kukona,ngambi hahunga. ²⁵ Kenge, namutongwera kughutho dhoruvedhe. ²⁶ Podigho,ngeshi haghambe kukwenu,'Kenge, ghana yongara mumuthitu,' watunda mumuthitu. Endi,'Kenge,aye ne mwishi dho ngonda,' kadi muyitawe. ²⁷ Thika diwamunekanga mushoro oghu gho kutunda mudiva no kumunekera ghutambeditokera, no mwiyero waMwana Munu. ²⁸ Kehe ku thakukara thiyama thokufa, tjihere ne kuponga. ²⁹ ''Ene popo pakupwa yihokoka yi gho mayuwa diyuwa nanyi dyakukare dikokore, kaghonda kadi kakukara no thishe, nungwedhi nanyi dhakuwe kutunda kuwiru, no mangcamu gho diwiru nanyi ghakukunyunge. ³⁰ Nothineghedhitho thaMwana Munu nanyi gha kumoneke mudiwiru, no muhoko dhodhihe dhopakaye nanyi dhakudire. Nanyi hakumone Mwana Munu kuna kwiya mumavuyi ghodiwiru no ngcamu no ruhafo. ³¹ Nanyi ghakutume ha engeli wendi no kudiritha torombita, no nanyi hakuponge pofotji no hahungami ho kutunda kudhimupepo dhine, kutunda kughuhura ghofotji gho diwiru. ³² ''Kuhonge thikuhonga kutunda kuthitondo tho thiyu. Popo pakuningamite dhikukute no kupurumuna mahako, ghuna dimuka eshi ditenya pepi didi. ³³ Podiyo karo, pakumona yoyihe yi, wakona kudimuka eshi pepi ghadi, pathero. ³⁴ ''Ghushemwa nakumutongwera, muhoko kadi wakupita kate yoyiheyi yakuhokoke. ³⁵ Diwiru no uve nanyi yakupite, ene nando dhange kadi hakupwa. ³⁶ Ene kuhatera kudiyuwa no viri edhi ghadhira kudimuka keheyuno, ngambi ha engeli mudiwiru, ngambi Mwana, ene pithendi Wihe. ³⁷ Thika mayuwa ghaNoah, dyo ghakukara mwiyero waMwana Munu. ³⁸ Mogho mayuwa kughutho gho kurowera hadire no kunwa, kuyeka nokutapa muyiyeka kate diyuwa Noah ghangenine muwato, ³⁹ no kadiko eyi hadimukire kate kurowera kweyire nokuna washimba wahe- dyo mbokukara mwiyero waMwana Munu. ⁴⁰ Hanu hawadi wa nanyi hakare mudipya- ghofotji nanyi hamushimbe, noghofotji nanyi ghathighare. ⁴¹ Hanu hawadi nanyi hatwange mushungwa- ghofotji nanyi hakumushimbe, noghofotji nanyi ghakuthighare. ⁴² Podiyo mukare muna kukengerera, amwe kadi muna dimuka diyuwa gha kwiya Fumu. ⁴³ Ene dimuke yino, ngeshi mukuru wendi gho ndhugho ghadimuka eshi nako munye ghakwiya mwidhi, ngo ghakarire ghana kukengerera no ngo kadi ghatawedhere ndhugho dhendi ghadhitjore. ⁴⁴ Podiyo namwe mwakona kukuroyithera, Mwana Munu nanyi ghakwiye muviri dhituna piri kutatera. ⁴⁵ ''Oyu ghakara noghutawedhi no ghunyanyami mupika oyu mukuru wendi ghamutura padimbo mukutapayidya paruvedhe roruhunga? ⁴⁶ Mutungeki ne ya mupika oyu ghakunawana ghakurughana yinu yo apa ghakwiya. ⁴⁷ Ghushemwa nakumutongwera mukuruwendi nanyi ghakumuture kuyoyihe yi ghamuna mukuruwendi. ⁴⁸ Ene ngeshi mupika ghomuyi haghamba mumutjima,'Mukuru wange ne hanamuranga,' ⁴⁹ no kutanga kupumura hayendhendi hapika, no kudya no kunwa nawangorwi, ⁵⁰ no mukuru ghoyo mupika nanyi ghakwiye mudiyuwa di hakudhira kutatera no viri dhi hakudhira kudimuka. ⁵¹ Mukuru wendi nanyi ghakumutetaghure muyipindhi no kamutura nawahayidena, oku ghakadira no kukukwetjira mayegho.