¹ Yeyire yokuhatera ko apa Jesusi ghamanine kurawera hakathishongero wendi, ghatundirepo no kuyenda ghakahonge nokuyuvitha mumadoropa ghawo. ² Apa ghayiyuvire Johanesi oku mudorongo kuyirughana ya Kristusi, ghatumine mbudhi kwawakathishongero wendi ³ no kumutongwera,''Yowe ghuna kwiya ndi, endi tukenge ko ghumwe?'' ⁴ Jesusi ghawahuthire no kughamba kukwagho,''Muyende mukamutongwere Johanesi eyi mwakumona nokuyuva. ⁵ Hakunga kuna kumona, hakakupira kuyenda kuna kuyenda, hakayinondwe kuna kwiruka,hakakufa matwi kuna kuyuva, hakakufa kuna kuwavumbura no kuwapa moyo, no nando kuna kudhiyuvitha kwawahepwe. ⁶ Awa hatungeka ne keheyuno gho kudhira kuniharwera me.'' ⁷ Apa hayendire hatutughuru wa, Jesusi ghatangire kutongwera mbunga kuhatera Johanesi,''Nye muna yendera mumamburundu mukakenge-mbu kuna kudhitutumitha mupepo? ⁸ Ene yipi munayendera panunda mukamone- katughuru yu ghanavata yitere yoyirereya? Yashemwa, awa havatanga yitere yoyirereya ne kwatunga mumaghumbo ghawamafumu. ⁹ Ene yipi muna yendera panunda mukamone-muporofeta? Yi, nakumutongwera,no thingi kupitakana muporofeta. ¹⁰ Oyu ne yodiye oyu hatjangire,'Mukenge, kona kutuma munu wange kughutho ghorupara roye, oyu ghakuroyitha ndhira kughutho dhoye. ¹¹ 'Nakumutongwera ghushemwa, pakatjo kowo hereka hambuyama kadiko ghokupitakana Johanesi gho mukadiyoghero. Podigho gho kuhurera kumudyo mughufumu gho diwiru ghapitakana ye. ¹² Kutunda kumayuwa ghaJohanesi mukadiyoghero kate popano, ghufumu ghodiwiru kunyanda kumaghukukutu, no hatutughuru honyakanyaka kudishimba pangcamu. ¹³ Haporofeta wahe nohakamuragho hapumbire kateJohanesi; ¹⁴ no ngeshi ghuna shana kuyitambura,aye ne Elijah oyu ghakwiya. ¹⁵ Kehe yu ghakara no matwi ghokuyuva, mumutawedhere ghayuve. ¹⁶ Kupi sho nighanekerithe muhoko ghuno? Yira hanuke hana kupepera mokughurithera, hokuhungumana no kukwitha ¹⁷ no kughamba,'Tuna pepi, ene kadi ghuna kini. Twaguvire, ene kadi wadirire. ¹⁸ Ápa gheyireJohanesi kad ghadire ghuroto no kunwa temba vinyu, no haghambire,'Ghadi nomupepo ghoghumango.'' ¹⁹ Mwana Munu gheyire ghudya no kunwa no haghambire,'Mukenge, oyu ne thiharuri no mungorwi, muyendha wakamutero no haharuri' Ene ghunyanyami ne kutwara kuyirughana.'' ²⁰ Jesusi poghatangire kushwena madoropa ghamwe omu ghatendire yitetukitha yoyingi, yoyishi kadi hapirukire. ²¹ ''Woe kukwenu, Chorazin! Woe kukwenu, Bethsaida! Ngeshi yitetukitha yoyikuru hana yitendi mu Tyre naSidon eyi hatendire mumwenu, ngo hapiruka kare muthikehetho shaka no mututwi. ²² Ene nanyi twakuyitawedhere kuTyre na Sidon mudiyuwa dyo matheko namwe. ²³ Amwe, Capernaum, kuna kughayara eshi nanyi mwakuyende mudiwiru? Ka, nanyi hakumurete pamuve kuHades. Ngeshi muSodom hayirughanene yirughana yoyikuru eyi harughane mumwenu, ngo shime poyidi kate dyarero. ²⁴ Ene nakumutongwera nanyi yakukare ghuredhu kumuve wa Sodom mumayuwa gho matheko ghenu.'' ²⁵ Paruvedhe ro Jesusi ghaghambire,''Nakukukugha we, Tate, Fumu gho diwiru no kaye, yoyishi washimbire yinu yi kutunda kwawanyanyami no kutjwathana, nokuwaneghedha wo kohanuke hohambiru. ²⁶ Yi, Tate, poyo yaroghera mumeho ghoye. ²⁷ Yinu yoyihe yi hayitapire mumwange kutunda mwaTate, kadiko yu ghadimuka Mwana kutundithako Wihe, no kadiko yu ghadimuka Wihe kutundithako Mwana no keheyuno kwakeheyuno ghatorora Mwana mukumunegha. ²⁸ Wiye kukwange, yoyihe yirughana no ghuremu, nanyi nikupe maturumuthero. ²⁹ Shimbe joko papoye nokuhongere papange, ame ne mukathinyeke no kwishi mumutjima, no nanyi ghuwane maturumuthero gho midhimu dhenu. ³⁰ Joko dhange ne dhiredhu no murongerero wange ne ghuredhu.''