¹ Kunyima dhoyi yinu, Jesusi ghayendire kumutara ghumwe gho dikuruviya dyaGalileya, hadithire eshi dikuruviya dyaTiberia. ² Mbunga dhodhikuru dhamukuthire pamurandu hamonine yineghedhitha eyi ghatendire kowo hakarire tjitju. ³ Jesusi ghayendire kumarundu no ghakahungumane no hakathishongero wendi. ⁴ (Pano Pasika, mukandi waJuda, pepi wakarire.) ⁵ Apa Jesusi ghakengire kuwiru gha monine mbunga dhina kamwiyera, ghaghambire kwaPhilip,''Kupi shotukaghure ghuroto oghu shonohadye?'' ⁶ (Ene Jesusi ghaghambire yi mukuyereka Philip, aye papendi ghadimukire eshi nyeghana kutenda.) ⁷ Philip ghamuhuthire ye,''Mathere mawadi gho denari gho ghuroto kadi shoghurikanye kwakeheyuno ghawane kokambiru.'' ⁸ Ghofotji ghopawakathishongero, Andrew, mukurwa Simoni Peter, ghaghambire kwaJesusi,'' ⁹ Pwadi mungaghu ghadi no maghuroto makwoko no tuthi tuwadi, ene nye yi mukatji kohanu hohengi?'' ¹⁰ Jesusi ghaghambir,''Muninge hanu hahungumane.''Pakarire muhonyi ghowingi padyango paya. Podiyo hanu hahungumane, hakarire mayovi makwoko muyitara. ¹¹ Podiyo Jesusi ghashimbire maghuroto no pakumana kutapa ndangi, ghaghutapire kowo hahungumane. Ghatendire kemo ku thi, wingi ghoghu hashanine. ¹² Apa hanu hakutire, ghaghambire kwawa kathishongero wendi,''Mukongwedhe yigonyogonyo yoghuroto eyi yina thigharako, podiyo eshi kadiko eyi shoyiyongarepo.'' ¹³ Podiyo hayikongwedhire no kuyaritha yikote dikumi no yiwadi yoyigonyogonyo kutunda kumaghuroto makwoko yokuthigharako koyo hadire. ¹⁴ Podiyo, apa hanu haomonine thineghedhitho thi, haghambire,''Oyu ne yo muporofeta oyu ghakwiya mukaye.'' ¹⁵ Apa Jesusi ghamonine eshi tamba heye no kuna mushaghekitha pangcamu no kuna mutura fumu, ghayendire kudirundu papendi. ¹⁶ Apa weyire ghuthiku, hakathishongero wendi haghurumukire kudikuruviya. ¹⁷ Hengenine muwato, nohatjinane dikuruviya kutamba Capernaum. Kwakarire makokore ruvedhe ru, na Jesusi kadi gheyire kukwagho roruvedhe. ¹⁸ Mupepo ghongcamu wapungire, no dikuruviya dyakarire mangumbi. ¹⁹ Apa havuyire ghure gho thinema tho makumi mawadi nokwoko endi makumi mahatu rure, hamonine Jesusi ghana kuyenda padikuruviya nokuna kwiya pepi nowato, no hayapire. ²⁰ Ene ghaghambire kukwagho,''Mwayapa.'' ²¹ Podiyo hashanine kumutambura muwato, popo wato wakakumine pandundu oku hatambire. ²² Diyuwa dyo kurandako, mbunga dhiya dhemanine kuthambo diya dyodikuruviya hamonine kadiko karo wato ghumweya kutundithako ghuya ghofotji, naJesusi kadi ghengenine mo nawakathishongero wendi ene hakathishongero wendi hayendire pithagho. ²³ Ngambi kemo, pakarire mato agha ghatundere kuTiberia pepi no dyango edi hadyerere maghuroto kunyima Fumu ghatapire ndangi. ²⁴ Apa mbunga dha dimukire eshi ngambi Jesusi endi hakathishongero wendi hakarirepo, hathinda hengenine mumato no hayendire kuCapernaum mukushana Jesusi. ²⁵ Apa hakamuwanine kuthambodiya dho dikuruviya, hakaghambire kukwendi,''Muhongi, ruvedhe munye ghuneyako kuno?'' ²⁶ Jesusi ghawahuthire, ghughamba,''Ghushemwa, ghushemwa, kunishana mwe, kadi pamurandu muna mono yidimukitha, ene pamurandu muna di ghuroto no muna kuta. ²⁷ Kadi murughane pamurandu ghoyidya eyi yokuyongara, ene mwakona kurughanena yidy eyi yokutapa moyo ghororuheya oghu ghakumupa Mwana Munu,mwa Nyambi gho Wihe ghatura thirameka papendi.'' ²⁸ Podiyo haghambire kukwendi,''Nye sho tutende, podiyo eshi turughane yirughana yaNyambi?'' ²⁹ Jesusi ghahuthire no kughamba kukwagho,''Eyi ne yirughana yaNyambi: Podiyo eshi mutawe moyu ghatuma.'' ³⁰ Podiyo haghambire kukwendi,''Yidimukitho munye wa kutenda, podiyo twakumone no kutawa moye? Nye wakutenda? ³¹ Hawihetu hadire maka mumuthitu, thika di hayitjanga, 'Ghawapire ghuroto ghokutunda kudiwiru hadye.''' ³² Podiyo Jesusi ghawahuthire,''Ghushemwa, ghushemwa, kadi yame Moses oyu ghamupire ghuroto ghokutundamudiwiru, ene Tate oyu ghakumupa ghuroto ghoshemwa kutunda mudiwiru. ³³ Ghuroto wa Nyambi ne ghuya ghokughurumuka kutunda kudiwiru no kutapa moyo mukaye.'' ³⁴ Podiyo haaghambire kukwendi,''Ghodikuto, tupange ghuroto ghu kehepano.'' ³⁵ Jesusi ghaghambire kukwagho,''Ame ne yame ghuroto ghomoyo; keheyu gho kwiya kukwange kadi mbaghafa ndhara, no keheyu ghokutawa mumwange kadimboghafa dinota. ³⁶ Ene namutongwere eshi kenge mwanimona me, no kadi mwakutawa. ³⁷ Keheyu Tate ghanipa me nanyi ghakwiye kukwange, noyu gho kwiya kukwange kadi na kumuvukuma panundaa. ³⁸ Ame kwaghurumuka kutunda mudiwiru, kadi mukuna tenda yihima yange,ene yihima yendi yu ghanituma. ³⁹ Eyi ne yihima yendi oyu ghanituma, eshi kadi nakuyongarithe noghofotji temba powa ghanipa me, ene mukawa yeyura mudiyuwa dyoghuhura. ⁴⁰ Eyi ne yoyihima yaTate, eshi keheyuno gho kumona Mwana no kutawa mumwendi nanyi ghakukare no moyo ghororuheya no nanyi nakumuyeyure mudiyuwa dyoghuhura.'' ⁴¹ Podiyo haJuda hakukanane kuhatera ye yoyishi ghaghambire,''Ame yame ghuroto oghu watunda kuwiru.'' ⁴² Haghambire,''Kadi Jeusi mwana Jeseph, oyu twadimuka wihe na nyina? Ngepi keho edi shoghaghambe,'Ame neya pamuve kutundera kudiwiru'?'' ⁴³ Jesusi ghahuthire no kughamba kukwagho,''Mushagheke kukushivanena mukatji kenu mwathinda. ⁴⁴ Noghofotji temba gho kwiya kukwange shimengwa Tate oyu ghanituma ghana mushimbi ye, no nanyi nakumuyeyure me mudiyuwa dyoghuhura. ⁴⁵ Hayitjanga mwawaporofeta,'Keheyuno nanyi ghakumuhonge Nyambi.' Keheyuno oyu ghayuva no kukuhonga kutundera kwaTate kwiya kukwange. ⁴⁶ Kadi keheyuno eshi ghamona Tate, kutundithako oyu ghatunda kwa Nyambi- aye ghamona Tate. ⁴⁷ Ghushemwaa, ghushemwa, oyu ghokutawa ghana kuwana moyo ghororuheya. ⁴⁸ Ame ne yame ghuroto gho moyo. ⁴⁹ Hawihenu hadire maka mumuthitu, no hafire. ⁵⁰ Oghu ne ghoghuroto oghu watunda kuwiru, podiyo munu ghakona kudyako no kadi ghakufa. ⁵¹ Ame ne yame ghuroto gho kupara oghu waghurumuka kutunda kudiwiru. Ngeshi kehe yuno kudya koghu ghuroto, nanyi ghakupare kuroruheya. Ghuroto ghu nakutapa ne yirama yange muyipara yokaye.'' ⁵² HaJuda hapatire mukatji kawo hathinda no hatangire kukukanana, ghughamba,''Ngepi yu katughuru shatupe yirama yendi tudye?'' ⁵³ Podiyo Jesusi ghaghambire kukwagho,''Ghushemwa, ghushemwa, shimengwa mwakudye yirama yaMwana Munu no kunwa manyinga ghendi, kadi mwakukara noyipara mumwenu mwathinda. ⁵⁴ Kehe yu gha kudya yirama yange no kunwa manyinga ghange ghana kukara no kupara kororuhe, no nanyi nakumuyeyure mudiyuwa dyokuhurera. ⁵⁵ Yirama yange ne yoyidya yo shemwa, no manyinga ghange ne yoyinwa yoshemwa. ⁵⁶ Kehe yu gho kudya yirama yange no kunwa manyinga ghange ghana kukara mumwange, no name mumwend. ⁵⁷ Thika dighanituma Tate gho kupara me, no thikakenge napara pamurandu waTate, no kehe yuno ghokunidya me ghana kupara pamurandu wange. ⁵⁸ Oghu ne gho ghuroto oghu watundera kudiwiru, kadi thika hawiha hadire no kufa. Kehe yu gho kudya ghuroto ghu nanyi ghakupare kuroruheya.'' ⁵⁹ Ene Jesusi ghaghambire yinu yi mu synagogue oku yene pakuhonga muCapernaum. ⁶⁰ Ap thingi thawa kathishongero wendi hayuvire yi haghambire,''Agha ne makuhongo gho makukutu; yidye gho kukona kughatambura?'' ⁶¹ Jesusi, yoyishi ghakudimuka thinda no hakathishongero wendi hashivane kuhatera yi, ghaghambire kukwagho,''Eyi ne yina mupatitha mwe? ⁶² Podiyo nye ngeshi mwe mumone MwanaMunu ghana kuyenda kuwiru oku ghatundere? ⁶³ Mupepo ghodiyo gho kutenditha kupara; panyama kadipo yiwanapo. Manando agha naghamba kukwenu ne ghomupepo, no aghone moyo. ⁶⁴ Podiyo pohadi hamwe papenu awa hadhira kutawa.'' Aye Jesusi ghayidimukire kutundera kumatangero eshi hadye wo hakudhira kumutawa nodye oyu mbagha muheta. ⁶⁵ Ghaghambire,''Pamurandu ghoyi ponaghambera kukwenu eshi kadiko oyu shogheye kukwange shimengwa ghana mutawedhera Tate.'' ⁶⁶ Pamurandu ghoyi, thingi thawakathishongero hamuyakunukire no kadi hayendangir nendi karo. ⁶⁷ Podigho Jesusi ghaghambire kowa dikumi nohawadi,''Kadi mwakushana kayenda namwe, endi munashana?'' ⁶⁸ Simon Peter ghahuthire,''Fumu, kwadye shotuyende? Wakara no manando ghomoyo ghororuheya, ⁶⁹ no twatawa no kwiya mukudimuka eshi owe Wapongoka Ghofotji waNyambi.'' ⁷⁰ Jesusi ghaghambire kukwagho,''Kadi namutorora mwe, amwe dikumi nohawadi, noghofotji gho papenu ne muhayidena?'' ⁷¹ Pano ghaghambire kwa Judas mwana Simon Iscariot, aye gharire yodiye, ghofotji ghopawa dikumi nohawadi, dye yu shoghakanane Jesusi.