¹ Pakumana Jesusi kughamba yinu yi, ghayeyure meho ghendi kuwiru no kughamba,''Tate, viri ne dhineya, yeyure Mwanoye podiyo Mwanoye ghakuyeyure we- ² thika di wamupire mangcamu gho panyama podiyo eshi ghatape yipara yokuroruheya kwa keheyuno oyu wamutapera. ³ Eyi ne yipara yokuroruheya: Eshi hakudimuka we, pithoye ghoghushemwa Nyambi, no yu wauma, Jesusi Kristusi. ⁴ Na kutumera we gho pakaye. Namana yirughana eyi wanipire ni tende. ⁵ Pano, Tate, niyeyure papoye no matumero agha nakarire noye kughutho gho kaye hakatendire. ⁶ Naneghedhire dina dyoye kohanu wa wanipire kutundamukaye. Hakarire hoye, no wahatapire kukwange, no haturire nando dhoye. ⁷ Pano hana dimuka eshi yoyihe eyi wanipire kukoye yatunda, ⁸ ame nawapire manando ghomahe agha wanipire. Hagha tambure no ghushemwa hadimukire eshi ame kukoye natundire, no hatawire eshi yowe wanitumine. ⁹ Nakuwa raperitha wo. Kadi narapereranga kaye ene kowo wanipire me, hadimuka yoye. ¹⁰ Keheyino yange ne yoye, no yoye ne yange, no ame haniyeyura mumwagho. ¹¹ Ame ne kadi nidi karo shime mukaye, ene wa hanu ne mukaye hadi, ame kuna kwiya kukoye. Wapongoka Tate, wature mudina dyoye edi wanipire me podiyo podiyo hakare yofotji, thika kenge twe eshi twayofotji. ¹² Apa nakarirenagho, nahaturire mudina dyoye, edi wanipa. Nawa kungire, no yofotji temba ghayipire, kutundithako mwana muyipithi, podiyo matjangwa ghakukumenemo. ¹³ Pano kuna kwiya koye, ene kuna kuyighamba yinuyi mukaye podiyo hakukare no ruhafo rokuyarera mumwagho. ¹⁴ Na wapa wo nandodhoye, no kaye kawanyengire wo pamurandu eshi awo ne kadi haka kaye, thika me kadi no mukakaye. ¹⁵ Kadi nakumuromba mwe mukawashwayitha mukaye, ene kukwenu mukawashwayitha mughuyi. ¹⁶ Awo ne kadi haka kaye, yira kenge name eshi kadi no mukakaye. ¹⁷ Hature kumutara ghoghushemwa. Nando dhoye ne ghushemwa. ¹⁸ Thikadi wanitumine mukaye, name dyonawatuma mukaye. ¹⁹ Pamurandu wagho nakushwaghithako me, podiyo nawo hathinda hakuwature mughushemwa. ²⁰ Nakuraperera kadi poyi ngenyu, ene mowa hakutawa mumwange kupitera ²¹ munando dhagho podiyo eshi wahe hakukare yofotji, yira we, Tate, ghudi mumwange, no ame mumoye. Ninge nagho hakare mumwetu podiyo kaye kakutawe eshi wanitumine me. ²² Mangcamu gha wanipa, naghatapa kukwagho, podiyo ghakukare ghofotji, yira kenge tudi yofotji. ²³ Ame mumwagho, nowe mumwange-podiyo hakuwarete kughuhura ghomakupakerero, podiyo kaye kakudimuke eshi yowe wanituma me, no wawahakire wo yira kenge wanihakire. ²⁴ Tate, nashana waya watapire kukwange hakare nange oku nidi, hamone mangcamu ghange, mangcamu awa wanipire pamurandu wanihakire kughutho ghokuvareka kaye. ²⁵ Muhunga Tate,kaye mbadi kakudimukire, ene nakudimuka me; no yino wadimuka eshi wanitumine. ²⁶ Natendire dina dyoye hadidimuke kukwagho, no nanyi nakuditende hakudidimuke podiyo ruhakitho oru wahakire me rwakukare mwagho, name nakukare mumwagho.''